ការជួសជុល​ប្រឡាយ​បេតុង​លេខ​៧៨ សម្រេចបាន​៧០​ភាគរយ​ហើយ​

​ដោយៈ​ប​.​ខុន​/​ភ្នំពេញៈ​ប្រឡាយ​បេតុង​លេខ​៧៨ ដែលមាន​មុខងារ​សំខាន់​ក្នុងការ​ដោះ​ទឹក ជំនន់​ស្ទឹង​ព្រែក​ត្នោត និង​ជា​ប្រឡាយ​នាំ​ទឹក​ពី​ស្ទឹង​ព្រែក​ទៅ​ទន្លេបាទី ដែល​រង​ការ​ខូច ខាត​ដោយសារ​ជំនន់​ទឹកស្ទឹង​ព្រែក​កាលពី​ក្នុង​រដូវវស្សា​កន្លងទៅ កំពុងធ្វើការ ជួសជុល​ឡើងវិញ​ដោយ​ក្រសួង​ធនធានទឹក​និង​ឧតុនិយម សម្រេចបាន​លទ្ធផល ៧០​ភាគរយ នៃ​គម្រោង​ដែល​ត្រូវ​បញ្ចប់​នៅក្នុង​រដូវប្រាំង​នេះហើយ​។​

​លោក​ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក និង ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​១៣ ខែមករា ឆ្នាំ​២០២១ ថា​ប្រឡាយ​បេតុង​លេខ​៧៨ ជា​ប្រឡាយ​មាន​មុខងារ​សំខាន់​ក្នុង​ការនាំ​ទឹក និង ដោះ​ទឹកជំនន់ ស្ទឹង​ព្រែក​ត្នោត តែ​វា​បាន​រង​ការខូចខាត​ដោយសារ​ទឹកជំនន់​កាលពី​ក្នុង​រដូវវស្សា​កន្លង ទៅដោយ​ពេលនេះ​ក្រសួង​កំពុងធ្វើការ​ជួសជុល​ឡើងវិញ​។​

​លោក​ហៀ​ង ម៉េង​ប្រធាន​នាយកដ្ឋាន​វិស្វកម្ម​នៃ​ក្រសួង​ធនធានទឹក​និង​ឧតុ និយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​១៣​ខែមករា​ឆ្នាំ​២០២១​ថា ការជួសជុល កែលម្អ​ប្រឡាយ​មេលេខ​៧៨ ស្ថិតនៅក្នុង​ឃុំ​ត្រពាំងវែង ស្រុក​កណ្តាលស្ទឹង ខេត្ត កណ្តាល ដែល​បាក់​ដាច់​ខូចខាត​ដោយ​ជំនន់​ទឹកភ្លៀង​ក្នុង​រដូវវស្សា​កន្លងទៅ គិត​ត្រឹម​ថ្ងៃ​១៣ មករា នេះ​សម្រេចបាន​លទ្ធផល​ប្រមាណ​ជា​៧០​ភាគរយ​នៃ​គម្រោង​ហើយ​។​

​ការងារ​ដែល​ត្រូវ​ជួសជុល​កែលម្អ​ឡើងវិញ នៅ​ប្រឡាយ​បេតុង​លេខ​៧៨ នេះ លោក​ហៀ​ង ម៉េង បញ្ជាក់ថា រួមមាន​ការងារ​ជួសជុល​ជើងទេរ​ភ្លឺ​ប្រឡាយ ដែល ទឹក​ហូរ ច្រោះ ខូច​ប្រវែង ៦០០​ម៉ែត្រ ជួសជុល​សាងសង់​ជើងទេរ​ប្រឡាយ​បេតុង ប្រវែង​២០០​ម៉ែត្រ និង​សាងសង់​លូ​ដោះ​ទឹក​ចំនួន​២​កន្លែង​។​គម្រោង​នេះ​នឹង បញ្ចប់ នៅ ក្នុង​រដូវប្រាំង​នេះ​៕​

ទីតាំងផ្សាយពាណិជ្ជកម្ម

- Advertisment -

Most Popular