Home ព័ត៌មានអន្តរជាតិ វៀតណាម​កាត់ទោ...

វៀតណាម​កាត់ទោស​ប្រហារជីវិត​មនុស្ស​៦​នាក់​ចំពោះ​ការជួញដូរ​ថ្នាំញៀន​

​ប្រែ​សម្រួលៈ​វាសនា​/​ហូ​ជី​មី​ញ​(vnexpress)៖​តុលាការ​មួយ​នៅ​ក្រុង​ហូ​ជី​មី​ញ​ភាគខាងត្បូង​កាលពី​ថ្ងៃ​អង្គារ​បាន​កាត់ទោស​ប្រហារជីវិត​អ្នក​លួច​ដឹក​ជញ្ជូន​ថ្នាំញៀន​ចំនួន​១៣,៨​គីឡូក្រាម ទៅ​ពី​កម្ពុជា​​ចូល​ទៅក្នុង​ទីក្រុង​នេះ ។​

​ង្វៀន ថាញ់ ផាត អាយុ​៣៣​ឆ្នាំ ដែល​ជា​មេដឹកនាំ​ក្រុម​នេះ និង​ជន​សមគំនិត​៥​នាក់​ទៀត អាយុ​២៧​ដល់​២៩​ឆ្នាំ ត្រូវបាន​តុលាការ​ផ្តន្ទាទោស​ប្រហារជីវិត នៅពេល​២​នាក់​ទៀត​ទទួលទោស​ជាប់គុក​ម្នាក់ៗ​២០​ឆ្នាំ​។​

​ពួកគេ​ទាំងអស់​ត្រូវបាន​រកឃើញ​ទោស​កំហុស​ពី​បទ​ជួញដូរ​និង​លួច​ចរាចរ​សារធាតុ​ញៀន​ខុសច្បាប់​។​

​យោងតាម​ឯកសារ​កាត់ទោស នៅ​ខែ​កញ្ញា​ឆ្នាំ​២០១៩ ប៉ូលិស​បាន​ឆ្មក់​ចូល​ឆែក​ផ្ទះល្វែង​មួយ​ក្នុង​សង្កាត់​លេខ​៧​នៃ​ក្រុង​ហូ​ជី​មី​ញ និង​បាន​រកឃើញ​ថ្នាំញៀន​សំយោគ​និង​កេតា​មីនចំនួន​៧​គីឡូក្រាម​លាក់​​ក្នុង​បន្ទប់ដេក​និង​កន្លែង​ផ្សេង​ទៀត​។​សមត្ថកិច្ច​ក៏​បាន​ចាប់ខ្លួន​ផាត​និង​ជន​សមគំនិត​នៅពេល​ក្រោយ​ពី​នោះ​បន្តិច​។​

​ការស៊ើបអង្កេត​បន្ថែម ប៉ូលិស​បាន​ដឹងថា ក្រុម​ដែល​ដឹកនាំ​ដោយ​ឈ្មោះ​ផាត​នេះ​បាន​ដឹកជញ្ជូន​ថ្នាំញៀន​១៣,៣​គីឡូក្រាម​ពី​កម្ពុជា​តាម​រថយន្ត​ចូល​ក្រុង​ហូ​ជី​មី​ញ​មុន​ពេល​ចែកចាយ​វា​ទៅ​កាន់​អតិថិជន​​របស់គេ​។​

​សូមបញ្ជាក់​ថា វៀតណាម​មាន​ច្បាប់​ថ្នាំញៀន​តឹងរឹង​បំផុត​មួយ​ក្នុងចំណោម​ច្បាប់​ថ្នាំញៀន​តឹងរឹង​នានា​ក្នុង​លោក​។​ជន​ណា​ដែល​ត្រូវបាន​កាត់ទោស​ចំពោះ​ការ​មាន ឬ​ដឹក​ជញ្ជូន​ថ្នាំញៀន​ហេ​រ៉ូ​អ៊ី​ចាប់ពី​០,៦​គីឡូក្រាម ឬ​មេតំ​ហ្វេ​តា​មីន​២,៥​គីឡូក្រាម​ឡើង ប្រឈម​ការប្រហារជីវិត​។​ការផលិត​ឬ​លក់​ហេ​រ៉ូ​អ៊ីន​ចាប់ពី​១០០​ក្រាម ឬ​ថ្នាំ​ញៀន​ខុស​ច្បាប់​ផ្សេង​ទៀត​ចាប់ពី​៣០០​ក្រាម​ក៏​ប្រឈម​ទោស​ប្រហារជីវិត​​ផងដែរ​។​

​តែ​ទោះជា​មានច្បាប់​ប្រឆាំង​ថ្នាំញៀន​ដ៏​តឹង​រឹងក្តី ក៏​ប្រទេស​នេះ​ក្លាយ​ជា​មណ្ឌល​ប្រើប្រាស់​និង​ឆ្លងកាត់​ថ្នាំញៀន​យ៉ាង​សកម្ម​រីឯ​ការបង្ក្រាប​ធ្វើឡើង​ជារឿយៗ​៕

​សមាជិក​៨​នាក់​នៃ​ក្រុម​ជួញដូរ​ថ្នាំញៀន​មួយ​ត្រូវបាន​នាំ​ឡើង​សវនាការ​នៅ​ក្រុង​ហូ​ជី​មី​ញ​កាលពី​ថ្ងៃ​១២​មករា​

ទីតាំងផ្សាយពាណិជ្ជកម្ម

- Advertisment -

Most Popular