Home ព័ត៌មានអន្តរជាតិ ជប៉ុន​ពង្រីក​...

ជប៉ុន​ពង្រីក​តំបន់​ត្រូវ​អនុវត្តិ​ស្ថានភាព​អាសន្ន​ហួស​ពី​ទីក្រុង​តូ​ក្យូ​ចូល​ដល់​អូសា​កា ណាហ្គោ​យ៉ា និង​ហ្វ៊ុយ​គូកា​

​ប្រែ​សម្រួល : កញ្ញា​ដា​លី​ស ៖ ជប៉ុន​បាន​ពង្រីក​ស្ថានភាព​អាសន្ន​ដើម្បី​ទប់ស្កាត់​កូវី​ដ​១៩​ទៅ​ខេត្ត​ចំនួន​៧ បន្ថែមទៀត ដែល​គ្របដណ្តប់​ទីក្រុង​ធំៗ ដូចជា​អូ​សា​កា ណាហ្គោ​យ៉ា កូបេ និង ហ្វ៊ុយ​គូ​កាក្នុង​​គោលបំណង​ដើម្បី​ទប់ស្កាត់​ការរីក​រាលដាល​នៃ​វីរុស​កូរ៉ូ​ណា​នៅ​ទូទាំង​ប្រទេស​។​

​វិធានការណ៍ ដែល​បាន​ប្រកាស​កាលពី​ថ្ងៃ​ពុធ (១៣ មករា​) ចូល​ជា​ធរមាន​ទាំង​កណ្តាលអធ្រាត្រ​។ តំបន់​ទាំង ៧ នេះ​ចូលរួម​ជាមួយ​ទីក្រុង​តូ​ក្យូ​និង​ខេត្ត​ជិតខាង​ចំនួន ៣​ជា​កន្លែង​ដែល​ស្ថានភាព​អាសន្ន​​បាន​ចូល​ជា​ធរមាន​កាលពី​ថ្ងៃ​សុក្រ​សប្តាហ៍​មុន​នៅក្នុង​សេចក្តីប្រកាស​ដែល​នឹង​មាន​រយៈពេល​រហូតដល់​ថ្ងៃទី ៧ ខែ​កុម្ភៈ​។​

​ដើម្បី​ប្រយុទ្ធប្រឆាំង​នឹង​ការកើនឡើង​នៃ​ករណី​ឆ្លង ជប៉ុន​កាលពី​ថ្ងៃ​ពុធ​ទី​១៣​មករា​ក៏​បាន​ដាក់​បម្រាម​ហាម​ចូល​ទាំងស្រុង​ចំពោះ​ជនបរទេស ដែល​មិនមែន​ជា​អ្នកស្រុក​រហូត​ដល់​ថ្ងៃទី ៧ ខែ​កុម្ភៈ​។​នេះ​​គឺ​គ្របដណ្តប់​លើ​តំបន់​ចំនួន ១១ ដែល​ជប៉ុន​បាន​បង្កើត​ជា​កន្លែង​ណាត់ជួប​ផ្នែក​ធុរកិច្ច រួម​មាន​ចិន​សិង្ហ​បុរី​និង​កូរ៉េខាងត្បូង​។​

​លោកនាយក​រដ្ឋមន្ត្រី​យ៉ូ​ស៊ី​ហ៊ី​ដេ ស៊ូ​ហ្គា បាន​ប្រាប់​សន្និសីទ​សារព័ត៌មាន​ថា “​យើង​ត្រូវការ​អោយ​ប្រជាជន​ពិចារណា​ឡើងវិញ​នូវ​សកម្មភាព​របស់​ពួកគេ ជាពិសេស​យុវវ័យ​ក្នុង​អាយុ​ខ្ទង់ ២០​ឆ្នាំ​ឬ​មនុស្ស​​អាយុ​ខ្ទង់​៣០ ឆ្នាំ ដែល​ជា​ក្រុម​មនុស្ស​ចម្លងរោគ​ធំ​បំផុត​។ មនុស្ស​ភាគច្រើន​អាច​មិន​មាន​រោគសញ្ញា​និង​ចេញ​ទៅ​ក្រៅ​ដោយ​មិន​បាន​ដឹងខ្លួន​ថា​ពួកគេ​កំពុង​ដើរ​ចម្លង​វីរុស​”​។​

​លោក​បាន​និយាយថា “​នេះ​គឺជា​តថភាព​ពិត ដែល​យើង​កំពុង​ប្រឈម​” ដោយ​បន្ថែម​ថា​វា​ចាំបាច់​ក្នុងការ​ផ្ញើ​សារ​ដ៏​ខ្លាំងក្លា​ដើម្បី​បញ្ចុះបញ្ចូល​មនុស្ស​ឱ្យ​ផ្លាស់ប្តូរ​ឥរិយាបថ​របស់​ពួកគេ​។​

​វិធានការ​នេះ​បាន​កើតឡើង​ខណៈ​ជប៉ុន​ចុះបញ្ជី​អ្នកស្លាប់​ដោយកូវី​ដ​១៩​យ៉ាងតិច ៩៧ នាក់​កាលពី​ថ្ងៃ​ពុធ ដែល​ជា​ចំនួន​ស្លាប់​ខ្ពស់បំផុត​ក្នុង​រយៈពេល​តែ​មួយ​ថ្ងៃ​។​ចំនួន​អ្នកជំងឺ​ស្ថិតក្នុង​ស្ថានភាព​​ធ្ងន់ធ្ងរ​បាន​កើនឡើង​ដល់ ៩០០ នាក់ ខណៈ​ការឆ្លង​ថ្មីៗ​យ៉ាងហោចណាស់ ៥.៨៤៥ នាក់​ត្រូវបាន​កត់ត្រា​ទូទាំង​ប្រទេស​៕

​ជប៉ុន​បាន​ពង្រីក​ស្ថានភាព​អាសន្ន​ទប់ស្កាត់​កូវី​ដ​១៩​ទៅ​ខេត្ត​ចំនួន​៧ បន្ថែមទៀត

ទីតាំងផ្សាយពាណិជ្ជកម្ម

- Advertisment -

Most Popular