ដោយៈ គ្រញូង / បាត់ដំបងៈ កាលពីរសៀល ថ្ងៃទី១៣ ខែមករា ឆ្នាំ២០២១ លោក អ៊ុយ សុធាវី អភិបាលរងខេត្ត តំណាងលោក ងួន រតនៈ អភិបាលខេត្ត បានអញ្ជើញចូលរួម ក្នុងការដុតកម្ទេច ទំនិញខូចគុណភាពចម្រុះ ជិត ២ តោន នៅទីលានចាក់សម្រាម ស្ថិតក្នុងសង្កាត់អូរចារ ក្រុងបាត់ដំបង។
ក្នុងឱកាសនោះ លោកអភិបាលរងខេត្តបាត់ដំបង រូបនេះ បានអំពាវនាវដល់អ្នកលក់ដូរ ទំនិញ និងអ្នកទិញ ទំនិញវេចខ្ចប់ ភេសជ្ជៈ គ្រឿងកំប៉ុង យកទៅប្រើប្រាស់ ឬក៏ហូបចុក ត្រូវ ពិនិត្យពីកាលបរិច្ឆេទ នៃទំនិញទាំងនោះ ជាមុនសិន ជៀសវាងបង្កការប៉ះពាល់ ដល់សុខភាពផ្ទាល់ខ្លួន និងក្រុមគ្រួសារ។
លោក ហាក់ សុខរិន ប្រធានសាខាការពារ អ្នកប្រើប្រាស់ កិច្ចការប្រកួតប្រជែង និងបង្ក្រាប ការក្លែងបន្លំ ខេត្តបាត់ដំបង បានឲ្យដឹងរថាៈ ទំនិញទាំងអស់នេះ គឺត្រូវបានភ្នាក់ងារសមត្ថកិច្ច សាខារបស់លោក សហការជាមួយ មន្ទីរពាណិជ្ជកម្ម និងអាជ្ញាធរដែនដី ចុះត្រួតពិនិត្យ និងដកហូតបាន តាមផ្សារនានា ក្នុងក្រុង – ស្រុក មួយចំនួន ក្នុងខេត្តបាត់ដំបង កាលពីឆ្នាំ ២០២០ កន្លងទៅនេះ សរុបទម្ងន់ ចំនួន ១.៨១០ គីឡូក្រាម។
លោក ហាក់ សុខរិន បានបញ្ជាក់ថាៈ ទំនិញដែលខូចគុណភាពទាំងនោះ រួមមាន ភេសជ្ជៈ គ្រឿងកំប៉ុង ស្រា អាហារ ងៀត នំ និង អាហារកំប៉ុង ជាដើម ។
សូមបញ្ជាក់ថា ការដុតកំទេចទំនិញ ខូចគុណភាពចម្រុះ ជិត ២ តោននេះ ក៏មានការចូលរួម ពីលោក ផេង សិទ្ធី អភិបាលក្រុងបាត់ដំបង, លោកព្រះរាជ អាជ្ញារង អមសាលាដំបូង ខេត្ត អនុប្រធានមន្ទីរពាណិជ្ជកម្មខេត្ត ព្រមទាំងមន្ត្រីពាក់ព័ន្ធ មួយចំនួនទៀត៕/V-PC
