Home ព័ត៌មានសំខាន់ៗ ក្រុម​អ្នក​ស៊...

ក្រុម​អ្នក​ស៊ើបអង្កេត​របស់ WHO មក​ដល់​ទីក្រុង​វូ​ហាន ខណៈ​ចិន​រាយការណ៍​ករណី​ស្លាប់​ទី​មួយ​ក្នុង​រយៈពេល​ជា​ច្រើន​ខែ​

​ប្រែ​សម្រួល : កញ្ញា​ដា​លី​ស ៖ ក្រុម​អ្នកជំនាញ​មកពី​អង្គការ​សុខភាព​ពិភពលោក​បាន​ទៅដល់​ទីក្រុង​វូ​ហាន​ប្រទេស​ចិន​នៅ​ថ្ងៃ​ព្រហស្បតិ៍​នេះ ខណៈ​ចិន​រាយការណ៍​ករណី​ស្លាប់​ដោយកូវី​ដ​ទី​មួយ​ក្នុងរយៈពេល ៨ ខែ ចំពេល​មាន​ការកើនឡើង​ករណី​វីរុស​កូរ៉ូណា​ឡើងវិញ​។​

​ប្រជាជន​ជាង ២០ លាន​នាក់​កំពុង​ជាប់​គាំង​នៅ​ភាគ​ខាងជើង​នៃ​ប្រទេស​ចិន ហើយ​ខេត្ត​មួយ​បាន​ប្រកាស​ស្ថានភាព​អាសន្ន ខណៈ​ចំនួន​ករណី​កូវី​ដ​១៩​បាន​កើនឡើង​បន្ទាប់​ពី​ចិន​រាយការណ៍​ករណី​​ឆ្លង​តិចតួច​ប្រចាំ​ថ្ងៃ​អស់​ពេល​ជា​ច្រើន​ខែ​។​

​ចិន​បង្ក្រាប​វីរុស​កូរ៉ូណា​បាន​ភាគច្រើន​តាមរយៈ​ការបិទ​ខេត្ត​ក្រុង​តឹងរ៉ឹង​និង​ការ​ធ្វើតេស្តិ៍​ទ្រង់ទ្រាយ​ធំ​។ ប៉ុន្តែ​ការឆ្លង​ចំនួន ១៣៨​ករណី​ផ្សេង​ទៀត​ត្រូវបាន​រាយការណ៍​ដោយ​គណៈកម្មការ​សុខភាព​​ជាតិ​នៅ​ថ្ងៃ​ព្រហស្បតិ៍​នេះ ដែល​ជា​ចំនួន​កើនឡើង​ខ្ពស់​បំផុត​គិត​ចាប់តាំងពី​ខែ​មីនា​ឆ្នាំ​មុន​។​

​ការឆ្លង​នេះ​នៅតែ​មាន​ទំហំ​តូច​បំផុត​នៅឡើយ​បើ​ប្រៀបធៀប​ជាមួយ​ប្រទេស​នានា​ដែល​កត់ត្រា​ករណី​ឆ្លង​ខ្ពស់ៗ​ប្រចាំ​ថ្ងៃ​រាប់ពាន់​និង​ម៉ឺន​ប៉ុន្តែ​រដ្ឋាភិបាល​ក្រុង​ប៉េកាំង​អន្ទះសារ​ចង់​លុបបំបាត់​ឱ្យបាន​នូវ​ចង្កោម​មេរោគ​ក្នុងស្រុក មុន​ថ្ងៃ​បុណ្យចូលឆ្នាំថ្មី​នៅ​ខែ​ក្រោយ​ចូលមក​ដល់ នៅពេលដែល​មនុស្ស​រាប់​រយ​លាន​នាក់​នឹង​ធ្វើដំណើរ​ឆ្លងកាត់​ទូទាំង​ប្រទេស​។​

​ករណី​ស្លាប់​ម្នាក់​នេះ​កើតឡើង​ខណៈ​ចិន​ត្រៀមខ្លួន​ជាស្រេច​សម្រាប់​ការមកដល់​នៃ​ក្រុម​អ្នកជំនាញ​ផ្នែក​វិទ្យាសាស្ត្រ​មកពី​អង្គការ WHO​ដែល​នឹង​ចាប់ផ្តើម​ធ្វើ​ការស៊ើបអង្កេត​ដ៏​រសើប​ខាង​នយោបាយ​​អំពី​ប្រភព​នៃ​ជំងឺ​រាតត្បាត​កូវី​ដ​១៩​។ ក្រុម​អ្នក​ស៊ើបអង្កេត ដែល​មាន​គ្នា​១០​នាក់ រ​មក​ដល់​ទីក្រុង​វូ​ហាន​នៅ​ព្រឹក​ថ្ងៃ​ព្រហស្បតិ៍​។

​លោក​ភី​ត​ធឺ បិ​ន អេម​បារិក ជា​មេក្រុម​បេសកកម្ម​នេះ និយាយថា ក្រុម​អ្នកជំនាញ​នឹង​ចាប់ផ្តើម​ធ្វើ​ចត្តា​ឡី​ស័ក​២​សប្តាហ៍​នៅ​សណ្ឋាគារ​មួយ​ផ្អែក​តាម​ការតម្រូវ​របស់​ចិន​។

​លោក​និយាយថា “​ក្រោយ​រយៈពេល​២​សប្តាហ៍ យើង​នឹង​អាច​ចេញ​ក្រៅ​ទៅ​ជួប​សម​ភាគី​ចិន​របស់​យើង​ដោយ​ផ្ទាល់​និង​ទៅ​ទីកន្លែង​ផ្សេងៗ​ដែល​យើង​ចង់ទៅ​”​។

​លោក​បាន​ក្រើនរំលឹក​ថា “​វា​អាច​ជា​ដំណើរ​ដ៏​វែងឆ្ងាយ មុន​ពេល​យើង​យល់​ពេញលេញ​អំពី​អ្វី​ដែល​បាន​កើតឡើង​”៕

​ក្រុម​អ្នក​ជំនាញការ​របស់​WHO​បាន​ទៅដល់​ទីក្រុង​វូ​ហាន​ប្រទេស​ចិន​កាលពី​ថ្ងៃ​១៤​មករា​ដើម្បី​ចាប់ផ្តើម​ស៊ើបរក​ប្រភព​នៃ​ការកកើត​វីរុស​កូរ៉ូណា​

ទីតាំងផ្សាយពាណិជ្ជកម្ម

- Advertisment -

Most Popular