ក្រសួង​ប្រៃសណីយ៍​និង​ទូរគមនាគមន៍​ប្រកាស​ផ្ដល់​អាហារ​រូបករណ៍​ផ្នែក​ឌីជីថល​តម្លៃ ១៧.០០០​ដុល្លារ​

ដោយ​:​ជា​សីហ​:/​ភ្នំពេញ​:ក្រោម​ការយកចិត្តទុកដាក់​ដ៏​ខ្ពង់ខ្ពស់​លើ​ការកសាង​ធនធានមនុស្ស​ឆ្នើម និង​អនាគត​យុវជន​ក្នុង​យុគសម័យ ឌីជីថល​របស់ សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ក្រសួង​ប្រៃសណីយ៍​និង​ទូរគមនាគមន៍ បានសម្រេច​ផ្តល់​អាហារូបករណ៍​១០០% ឈ្មោះថា “​អាហារូបករណ៍​ទេពកោសល្យ ឌីជីថល​តេ​ជោ Techo Digital Talent Scholarship” ចំនួន​១០០​កន្លែង​។​

​និស្សិត​ដែល​ទទួល​អាហារូបករណ៍​និង​អាច​ចូលទៅ​សិក្សា​លើ​ជំនាញ​សម្រាប់​សិក្សា​ថ្នាក់​បរិញ្ញាបត្រ (១) ទូរគមនាគមន៍​និង​បណ្តាញ (Telecoms & Network) (២) វិទ្យាសាស្ត្រ​កុំព្យូទ័រ (Computer Science) និង (៣) ពាណិជ្ជកម្ម​អេឡិចត្រូនិក (e-Commerce) នៅ​បណ្ឌិត្យសភា បច្ចេកវិទ្យា​ឌីជីថល​កម្ពុជា​។​

​ក្រសួង​ជំនាញ​មួយ​នេះ​បាន​បន្តទៀតថា​បេក្ខជន​ជ័យលាភី​ម្នាក់ៗ​នឹង​ទទួលបាន​អាហារូបករណ៍​ដែលមាន​តម្លៃ​សរុប​ប្រមាណ ១៧.០០០ ដុល្លារ សម្រាប់​ការសិក្សា​រយៈពេល ៤​ឆ្នាំ ក្នុងនោះ​រួមមាន​ប្រាក់ឧបត្ថម្ភ ១២០​ដុល្លារ​ក្នុង​មួយខែ និង​កុំព្យូទ័រ​ចំនួន​មួយគ្រឿង​។ និស្សិត ដែល​រៀន​ចប់​នឹងមាន​ឱកាស​ចូល​បម្រើកា​រងារ​នៅ​ក្រសួង​ប្រៃសណីយ៍​និង​ទូរគមនាគមន៍​។​

​បេក្ខជន​ដែលមាន​បំណង​ស្នើសុំ​អាហារូបករណ៍​នេះ ត្រូវមាន​សញ្ញាបត្រ​មធ្យមសិក្សា ទុតិយភូមិ (​ថ្នាក់ វិទ្យាសាស្ត្រ​) និង​ជា​សិស្ស​ឆ្នើម (​សិស្ស​មាន​ជីវភាព​ក្រីក្រ និង​សិស្ស​នារី ត្រូវបាន​លើកទឹកចិត្ត​)​។ បេក្ខជន​ទាំងអស់​នឹង ត្រូវ​ឆ្លងកាត់​ការប្រឡង​ដែល​រៀបចំឡើង តាម​ប្រព័ន្ធ​កុំព្យូទ័រ​លើ​វិញ្ញាសា​គណិតវិទ្យា តក្កវិជ្ជា រូបវិទ្យា និង​ភាសា​អង់គ្លេស​។​

​បេក្ខជន​ដែលមាន​បំណង​ស្នើសុំ​អាហារូបករណ៍​ខាងលើនេះ សូម ចុះឈ្មោះ​ប្រឡងប្រជែង តាមរយៈ​គេហទំព័រ www.niptict.edu.kh/apply ចាប់​ពីថ្ងៃ​ជូនដំណឹង​នេះ​រហូតដល់​ថ្ងៃទី​១៤ ខែកុម្ភៈ ឆ្នាំ​២០២១​។ សម្រាប់​ព័ត៌មាន លម្អិត​សូម​ទាក់ទង​បណ្ឌិត្យសភា​បច្ចេកវិទ្យា ឌីជីថល​កម្ពុជា តាមរយៈ​ទូរ​សព្ទ​លេខ ០១០ ៣៤០ ០០០ ឬ​អឺ​មែ​ល info@niptict.edu.kh ឬ​គេហទំព័រ www.niptict.edu.kh ៕​/PC

ទីតាំងផ្សាយពាណិជ្ជកម្ម

- Advertisment -

Most Popular