Home ព័ត៌មានជាតិ សេដ្ឋកិច្ច ​គ្រោង​ស្តារ​...

​គ្រោង​ស្តារ​ប្រឡាយ​ទួល​ពង្រ​ទី​១ ឱ្យបាន​ធំ​ទូលាយ ក្នុង​ខណ្ឌ​៣ នៅ​ជាយ​រាជធានី​ភ្នំពេញ

​ដោយៈ រ៉ា​ម៉ន / ភ្នំពេញៈ អាជ្ញាធរ​រាជធានី​ភ្នំពេញ គ្រោង​ស្តារ​ប្រឡាយ​បង្ហូរទឹក ទួល​ពង្រ​ទី​១ ឱ្យបាន​ធំ​ទូលាយ នៅក្នុង​ខណ្ឌ​ចំនួន​៣ នៅ​ជាយ​រាជធានី​ភ្នំពេញ គឺ​នៅ​ខណ្ឌដង្កោ ខណ្ឌ​កំបូល និង​ខណ្ឌ​ពោធិ៍​សែន​ជ័យ ដើម្បី​រំដោះ​ទឹកជំនន់​ទឹកភ្លៀង នា​រដូវវស្សា ខាងមុខ​។​

​ការលើកឡើង​គម្រោង​ស្ដារ​ប្រឡាយ​បង្ហូរទឹក ខាងលើនេះ បានធ្វើ​ឡើង នៅ​រសៀល ថ្ងៃទី​១៤ មករា នេះ នៅក្នុង​អង្គប្រជុំ​ពិភាក្សា​មួយ ក្រោយពេល​តំបន់​នេះ តែងតែ​ទទួលរង នូវ​ការលិចលង់ ដោយ​ទឹកជំនន់​ទឹកភ្លៀង នាពេល​កន្លងមក​។​

​លោក ឃួ​ង ស្រេង អភិបាល​រាជធានី​ភ្នំពេញ បានបញ្ជាក់​ឱ្យដឹង នៅក្នុង​កិច្ចប្រជុំ​នោះ​ថាៈ កិច្ចប្រជុំ​នេះ ធ្វើឡើង ដើម្បី​ពិភាក្សាគ្នា រក​ដំណោះស្រាយ ដើម្បី​ស្តារ​ប្រឡាយ​មេ​មួយ​នេះ ឱ្យបាន​ធំ ក្រោយពី​ទឹកជំនន់ បាន​ជន់​លិច នាពេល​កន្លងមក ខណៈ​ប្រឡាយ​នេះ ត្រូវបាន​គេ​រំលោភបំពាន ធ្វើ​ឲ្យ​កន្លែង​ខ្លះ តូចចង្អៀត ដែល​ពិបាក​ឱ្យ​ទឹក​ហូរ​បាន​។​

​លោក ឃួ​ង ស្រេង បាន​បន្តថាៈ បើ​កិច្ចប្រជុំ​លើក​នេះ មិនមាន​ដំណោះស្រាយ ឱ្យបាន​ល្អ​ទេ រដ្ឋបាល​រាជធានី​ភ្នំពេញ នឹង​លើក​ជា​អង្គប្រជុំ នៅ​សប្តាហ៍ ខាងមុខ​ទៀត ដើម្បី​ធ្វើយ៉ាងណា អនុវត្ត​ការស្ដារ​ប្រឡាយ​នេះ ឲ្យ​បាន​ជោគជ័យ បញ្ចៀស​នូវ​ការលិចលង់ លំនៅដ្ឋាន​ប្រជាពលរដ្ឋ​។​

​ក្នុង​កិច្ចប្រជុំ​នោះ លោក​អភិបាល ក៏បាន​លើកឡើង ពី​គម្រោង​នៃ​ការស្ដារ​ប្រឡាយ ទួល​ពង្រ​១ ដែលមាន​ប្រវែង​ជាង ៤.០០០ ម៉ែត្រ ហើយ​ការស្តារ​ប្រឡាយ​ធំ​នេះ លោក​បាន​ជំរុញ​ឲ្យ​មន្ទីរ​ពាក់ព័ន្ធ ដូចជា​មន្ទីរ​ធនធាន​ទឹក មន្ទីរ​សាធារណការ និង​ដឹកជញ្ជូន និង​អាជ្ញាធរ​ខណ្ឌ រួមគ្នា ដើម្បី​កោះហៅ​ប្រជាពលរដ្ឋ ដែល​ពាក់ព័ន្ធ​នឹង​ប្រឡាយ​នេះ មក​ប្រជុំ ធ្វើការ​ដោះស្រាយ ធ្វើយ៉ាងណា ជំរុញ​ការងារ​នេះ អោយបាន​លឿន និង​ទាន់ពេលវេលា​។​

​លោក សាំ ពិសិដ្ឋ ប្រធាន​មន្ទីរ​សាធារណការ និង​ដឹកជញ្ជូន រាជធានី​ភ្នំពេញ បានបញ្ជាក់​ឲ្យ​ដឹងថាៈ ប្រឡាយ​ទួល​ពង្រ​១ ដែល​គ្រោង​ស្តារឡើងវិញ​នេះ ទំហំ​ប្រឡាយ មាន​លក្ខណៈ​រួម​តូច មាន​គេ​ចាក់ដី បិទមុខ​ទឹក​ហូរ ដែល​ត្រូវ​ស្ដារ​ប្រឡាយ​នេះ​ជាបន្ទាន់ ហើយ​ការសាងសង់​ប្រឡាយ​នេះ ត្រូវ​សាងសង់ឡើង ជា​ប្រឡាយ​បេតុង ឱ្យបាន​ទទឹង ៨​ម៉ែត្រ បណ្ដោយ ៤.៥៤៥ ម៉ែត្រ ចាប់ពី​ភូមិ​ព្រៃ​ព្រីង​ខាងត្បូង ដល់​បុរី​ជីបម៉ុង ដោយ​ដាក់លូ​ប្រអប់ ទំហំ ២,៦៥ ម៉ែត្រ គុណ​នឹង ២,៦៥ ម៉ែត្រ មាន​ចំនួន ៣ ជួរ ប្រវែង ៤៤៥ ម៉ែត្រ ចាប់ពី​បុរី​ជីពម៉ុង ដល់​ប្រឡាយ​បឹង​ហា​, ដាក់លូ​ប្រអប់​ស្របតាម​ផ្លូវជាតិ​លេខ​៣ ទំហំ ៦​ម៉ែត្រ គុណ​នឹង ២ ម៉ែត្រ ប្រវែង ១.២២០ ម៉ែត្រ ចាប់ពី​បូរី Green Vill ដល់​ដើម​ប្រឡាយ​ទួល​ពង្រ និង​ដាក់លូ​ជ្រុង ចំណុច​ផ្លូវ​ឆ្លងកាត់ មាន​ចំនួន ៧ កន្លែង​ផងដែរ​៕/V​

ទីតាំងផ្សាយពាណិជ្ជកម្ម

- Advertisment -

Most Popular