​សមត្ថកិច្ច​ស្រុក​ឈូក រុះរើ​សំណង់​លើ​ចិញ្ចើមផ្លូវ មួយកន្លែង តាម​បណ្តឹង​របស់​សមាគម​ខ្មែរ​-​ចិន​


​ដោយៈ បូកគោ / កំ​ពតៈ ផ្អែក​តាម​ចំណារ អភិបាល​ខេត្តកំពត ឆ្លើយតប​ចំពោះ​បណ្តឹង​របស់ សមាគម​សម្ព័ន្ធ​ខ្មែរ​-​ចិន នៅ​កម្ពុជា អាជ្ញាធរ​ស្រុក​ឈូក បាន​រុះរើ​សំណង់ ធ្វើ​ពី​ដែក និង​ស័ង្កសី​មួយកន្លែង រហូត​សម្រេច​រួចរាល់ ទោះបី​មាន​ឧបសគ្គ​បន្តិចបន្តួច​ក្តី​។ ប្រតិបត្តិការ​នេះ បានធ្វើ​ឡើង នា​ព្រឹក​ថ្ងៃទី​១៤ ខែមករា ឆ្នាំ​២០២១ ស្ថិត​នៅជាប់​ចិញ្ចើម​ផ្លូវជាតិ​លេខ​៣ ក្នុងភូមិ​សត្វ​ពង ឃុំ​សត្វ​ពង ទី​ដែល​អ្នកដំណើរ ឆ្លងកាត់​ទៅមក​មិន​ដាច់​។
​ក្នុង​ភាព​សង្ស័យថា មិនមែន​ធ្វើ​ដើម្បី​ផលប្រយោជន៍​រដ្ន តែ​ជាការ​បំពេញ​បំណង ជន​ទី​បី ម្ចាស់​សំណង់ អះអាង​ពី​ការស្វែងរក​យុត្តិធម៌ ដោយ​ដាក់​បណ្តឹង តាម​លំដាប់ថ្នាក់​បន្តទៀត​។​

​សូមបញ្ជាក់ថាៈ លិខិត​លេខ​០៥៨/២០២០ របស់​សមាគម​សម្ព័ន្ធ​ខ្មែរ​-​ចិន នៅ​កម្ពុជា ចុះ​ថ្ងៃទី​១៨ ខែវិច្ឆិកា ឆ្នាំ​២០២០ ដាក់ជូន​អភិបាល​ខេត្តកំពត មាន​ខ្លឹមសារ​ថា កាលពី​យប់​ថ្ងៃទី​២២ ខែសីហា ឆ្នាំ​២០២០ ក្រុមគ្រួសារ​លោក ម៉ៅ ថា​ត់ បាន​សាង​សង់រោង ពី​ខាងក្រៅ ដឹក​យកមក​ដាក់ នៅមុខ​សាលារៀន​ខ្មែរ​-​ចិន ហេង​មាន និង​ធ្វើ​សកម្មភាព​ចាក់ដី លើ​ចំណីផ្លូវ​មុខ​សាលារៀន តាម​បណ្តោយ​ផ្លូវជាតិ​លេខ​៣​។ ព្រោះតែ​ការដោះស្រាយ ជាច្រើនលើក មិនមាន​លទ្ធផល សមាគម​សម្ព័ន្ធ​ខ្មែរ​-​ចិន នៅ​កម្ពុជា សំណូមពរ​លោក​អភិបាលខេត្ត ជួយ​អន្តរាគមន៍ ទៅ​អភិបាលស្រុក​ឈូក ព្រមទាំង​អាជ្ញាធរ​ពាក់ព័ន្ធ ឱ្យធ្វើ​ការរុះរើ និង​បញ្ឈប់​សកម្មភាព​ទាំងអស់ របស់​ក្រុមគ្រួសារ​លោក ម៉ៅ ថា​ត់ នៅមុខ​សាលារៀន​ខ្មែរ​-​ចិន ហេង​មាន ដោយ​ក្តី​អនុគ្រោះ​។​

​ឆ្លើយតប​លិខិត​ខាងលើ លោក ជាវ តា​យ អភិបាល​ខេត្តកំពត បាន​ចារ​ជូន​លោក អភិបាលស្រុក​ឈូក ពិនិត្យ ដោះស្រាយ និង​របាយការណ៍​។ អនុវត្ត​ចំណារ​នេះ គណៈបញ្ជាការ​ឯកភាព រដ្ឋបាល​ស្រុក​ឈូក បាន​បង្កើត​ក្រុមការងារ ចុះ​ប្រតិបត្តិការ នា​ព្រឹក​ថ្ងៃទី​១៤ ខែមករា ឆ្នាំ​២០២១ ដើម្បី​រុះរើ​រោង​ដែក និង​ស័ង្កសី នោះ​តែម្តង​។​

​លោក ម៉ៅ ថា​ត់ ម្ចាស់​សំណង់ ដែល​អាជ្ញាធរ រុះរើ​បាន​រៀបរាប់ថាៈ តាំងពី​ក្រោយ​ឆ្នាំ​១៩៧៩ ទីនេះ​ជា​ដី​ប្រឡាយ ដែល​ក្រុមគ្រួសា​លោក ស្ទូងស្រូវ រៀងរាល់ឆ្នាំ​។ ក្រោយមក ផ្លូវថ្នល់​លើក​ខ្ពស់ ឯ​អ្នកជិតខាង ក៏​ចាក់ដី​ខ្ពស់ មិនអាច​ធ្វើ​ស្រូវ​កើត លោក​បានសម្រេច​ចាក់ដី ធ្វើ​រោង​តូចតាច បណ្តោះអាសន្ន ឱ្យ​កូនចៅ​លក់ដូរ​។ ថ្ងៃ​ណាមួយ រដ្ឋ​ត្រូវការ លោក​នឹង​ប្រគល់ជូន ដោយ​ឥត​លក្ខខណ្ឌ​។​

​ម្ចាស់​រោង​ដដែល បាន​បន្តថា សកម្មភាព បែបនេះ ក្រុមគ្រួសារ​លោក មិនអាច​ទទួលយកបាន​ទេ​។ និយាយ​រួម បើ​រុះរើ សូម​ធ្វើឱ្យ​ស្មើភាព​គ្នា ព្រោះ​នៅក្នុង​ស្រុក​ឈូក​ទាំងមូល មាន​ប្រជាពលរដ្ឋ មិនតិច​រយ​គ្រួសារ​ទេ ដែល​នៅ​អាស្រ័យ​ផល លើ​ចំណីផ្លូវ​។ លោក ម៉ៅ ថា​ត់ បាន​សម្តែង​ក្តី​សង្ស័យថា ទង្វើ​នេះ អាច​មិនមែន​ធ្វើ ដើម្បី​ផលប្រយោជន៍​រដ្ន​ទេ តែ​ជាការ​បំពេញ​បំណង ជន​ទី​បី ក៏​ថា​បាន​។ ដូច្នេះ លោក​នឹង​ស្វែងរក​យុត្តិធម៌ ដោយ​ដាក់​ពាក្យបណ្តឹង តាម​លំដាប់ថ្នាក់ ជា​បន្តទៀត​។​

​លោក ឡុង ទូច អភិបាលរង​ស្រុក​ឈូក បានបញ្ជាក់​ថាៈ លោក ម៉ៅ ថា​ត់ បាន​ស្ទូង និង​អាស្រ័យ​ផល លើដី​ចំណីផ្លូវ​នេះ យូរ​ឆ្នាំ​ហើយ​។ ក្រោយមក គាត់​បាន​ចាក់ដី ដោយ​អាជ្ញាធរ បាន​ហាមប្រាម មិនឱ្យ​សង់​សំណង់​រឹង​ទេ​។ លុះ​ប្រហែល​ប្រាំ​ខែ​មុន លោក ម៉ៅ ថា​ត់ បាន​សង់រោង ហើយ​អាជ្ញាធរ មកឃាត់ និង​តម្រូវឱ្យ​រុះរើ​វិញ តែ​គាត់​មិន​ធ្វើតាម​។​

​លោក​អភិបាលរង​ស្រុក បាន​បន្តថាៈ ជា​បន្ត ស្រុក​ក៏បាន​ចេញ​សេចក្តី ជូនដំណឹង បី​លើក​បន្ថែមទៀត គាត់​មិន​ព្រម​ដដែល​។ ម្ល៉ោះហើយ ទើប​រដ្ឋបាល​ស្រុក សម្រេច​ចុះមក​រុះរើ ថ្ងៃនេះ​តែម្តង​៕/V​

ទីតាំងផ្សាយពាណិជ្ជកម្ម

- Advertisment -

Most Popular