Home ព័ត៌មានអន្តរជាតិ តុលាការ​កំពូល...

តុលាការ​កំពូល​កូរ៉េខាងត្បូង​តម្កល់​ទោស​២០​ឆ្នាំ​របស់​អតីត​ប្រធានាធិបតី​

​ប្រែ​សម្រួល : កញ្ញា​ដា​លី​ស ៖ តុលាការ​កំពូល​របស់​កូរ៉េខាងត្បូង​បាន​សម្រេច​តម្កល់​ទោស​ជាប់​ពន្ធនាគារ​រយៈពេល ២០ ឆ្នាំ​ចំពោះ​អតីត​ប្រធានាធិបតី ប៉ាក ហ្គុន​ហេនៅ​ថ្ងៃ​ព្រហស្បតិ៍​នេះក្នុង​សេចក្តីសម្រេច​​ចុង​ក្រោយ​លើ​រឿងអាស្រូវ​ពុករលួយ​ដែល​ធ្វើឱ្យ​លោកស្រី​ខ្ទាត​ពី​តំណែង​។​

​សេចក្តីសម្រេច​នេះ​នាំមក​នូវ​ទីបញ្ចប់​នៃ​នីតិវិធី​ច្បាប់​ជា​ហូរហែ​ដែល​ពាក់ព័ន្ធ​នឹង​ការជំនុំជម្រះ​ជាច្រើនលើក​និង​បណ្តឹងឧទ្ធរណ៍​ជាច្រើន​រួម​ទាំង​សវនាការ​លើក​មុន​នៅ​តុលាការ​កំពូល​។​

​ប្រធានាធិបតី​ស្រី​ដំបូងបង្អស់​របស់​ប្រទេស​នេះ​ត្រូវបាន​ចោទប្រកាន់​ក្នុង​ឆ្នាំ ២០១៧ បន្ទាប់ពី​មាន​ការតវ៉ា​តាម​ដងផ្លូវ​ដ៏​ធំ​ប្រឆាំងនឹង​ការគ្រប់គ្រង​របស់​លោក​ស្រី​។​

​លោកស្រី​ត្រូវបាន​ផ្តន្ទាទោស​នៅ​ឆ្នាំ​បន្ទាប់​ពី​បទ​ទទួល​សំណូក​និង​រំលោភ​អំណាច​និង​ត្រូវ​ជាប់​ពន្ធនាគារ​រយៈពេល ៣០ ឆ្នាំ​។ បណ្តឹង​សារទុក្ខ​ជា​បន្តបន្ទាប់ ការកាត់ទោស​ឡើងវិញ និង​បណ្តឹងឧទ្ធរណ៍​ជាច្រើន​​ទៀត បាន​បន្ថយ​ទោស​របស់​លោក​ស្រី​មក​ត្រឹម ២០ ឆ្នាំ​។​

​នៅ​ថ្ងៃ​ព្រហស្បតិ៍​នេះ រឿងក្ដី​នេះ​បាន​កើត​ឡើង​ជា​លើក​ទី ២ នៅ​ចំពោះមុខ​តុលាការ​កំពូល ដែល​និយាយថា ខ្លួន​សម្រេច​ទទួលយក​និង​បញ្ជាក់​ពី​ការកាត់ទោស​ជាប់​ពន្ធនាគារ​រយៈពេល ២០ ឆ្នាំ​។​

​តុលាការ​ក៏​បាន​តម្កល់​ការពិន័យ​និង​ការដកហូត​ទ្រព្យសម្បត្តិ​សរុប​ចំនួន ២១,៥ ពាន់​លាន​វ៉ុន (១៩,៥ លាន​ដុល្លារ​អាម៉េរិក​) ផងដែរ​។​

​លោកស្រី​ប៉ាក​បាន​ធ្វើ​ពហិការ​មិន​ចូលរួម​កិច្ចដំណើរការ​នីតិវិធី​នេះ​ទេ ដោយ​និយាយថា ពួកគេ​លម្អៀង​ប្រឆាំងនឹង​លោក​ស្រី ហើយ​មិន​មាន​វត្តមាន​នៅក្នុង​តុលាការ​នៅ​ថ្ងៃ​ព្រហស្បតិ៍​នេះ​ទេ​។​

​ក្រៅពីនេះ លោកស្រី​ត្រូវបាន​ផ្តន្ទាទោស​ឱ្យ​ជាប់​ពន្ធនាគារ​រយៈពេល ២ ឆ្នាំ​ដាច់ដោយឡែក ពី​បទ​រំលោភ​ច្បាប់​បោះឆ្នោត​។​

​ឥឡូវ​លោកស្រី​ប្រឈម​មុខ​នឹង​ការ​ជាប់​ពន្ធនាគារ​សរុប ២២ ឆ្នាំ​ហើយ​នឹង​អាយុ​៨០ ឆ្នាំ​នៅ​ពេល​ចេញពី​គុក​៕

លោកស្រី​ផាក​នឹង​មាន​អាយុ​៨០​ឆ្នាំ​ពេល​ចេញពី​គុក​

ទីតាំងផ្សាយពាណិជ្ជកម្ម

- Advertisment -

Most Popular