Home ព័ត៌មានសំខាន់ៗ អ្នកកាសែត​បើ​...

អ្នកកាសែត​បើ​មិន​បំពេញការងារតាមវិជ្ជាជីវៈ ប្រៀបដូចជា​សម្លាប់ខ្លួន​ឯង !

ដោយ​:​ម៉េង​ឆៃ​/​ភ្នំពេញ​:​រសៀល​ថ្ងៃទី​១៤​ខែមករា​នេះ​កាលពី​ឆ្នាំ​មិញ​អ្នកសារព័ត៌មាន​ចម្រុះ​រាប់ពាន់នាក់​មកពី​គ្រប់​ស្ថាប័ន​សារព័ត៌មាន​ទាំង​បែប​ប្រពៃណី​ទាំង​បែប​ទំនើប​ឌីជីថល​បាន​ជួបជុំគ្នា​យ៉ាង​សប្បាយរីករាយ​ក្នុង​ពិធី​ជួប​ប្រចាំឆ្នាំ​រវាង​អ្នកកាសែត​និង​សម្តេច​អគ្គមហាសេនាបតី​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​ក​កម្ពុជា​។​សម្តេច​តេ​ជោ​ហ៊ុនសែន​បានកំណត់​យក​ថ្ងៃទី​១៤​ខែមករា​ដែលជា​ថ្ងៃ​ខួប​សម្តេច​ឡើងកាន់តំណែង​ជា​នាយករដ្ឋមន្ត្រី​នា​ថ្ងៃ​១៤​មករា​ឆ្នាំ​១៩៨៥​ជា​ថ្ងៃ​ជួប​សំណេះសំណាល​និង​ទទួលទាន​អាហារ​ពេល​ល្ងាច​ជាមួយ​ក្រុម អ្នកកាសែត​យ៉ាងកក់ក្តៅ។​

រូបថតៈសម្តេចតេជោហ៊ុនសែនក្នុងជំនួបជាមួយអ្នកកាសែតលើក​ទី​៤ នៅ​ថ្ងៃទី​១៤ ខែមករា ឆ្នាំ​២០២០ នៅ​កោះ​ពេជ្រ​ក្នុង​រាជធានី​ភ្នំពេញ​។​

​សម្តេច​តេ​ជោ ហ៊ុន សែន បាន​ជួប​ជាមួយ​ក្រុម​អ្នកសារព័ត៌មាន​លើកដំបូង នៅ​ថ្ងៃទី​១៤ ខែមករា ឆ្នាំ​២០១៧ នៅ​សណ្ឋាគារ​សុខា ភ្នំបេញ​។ លើក​ទី​២ នៅ​ថ្ងៃទី​២១ ខែមករា ឆ្នាំ​២០១៨ នៅ​កោះ​ពេជ្រ​។ លើក​ទី​៣​នៅ​ថ្ងៃទី​១១ ខែមករា ឆ្នាំ​២០១៩ នៅ​កោះ​ពេជ្រ និង​លើក​ទី​៤ នៅ​ថ្ងៃទី​១៤ ខែមករា ឆ្នាំ​២០២០ នៅ​កោះ​ពេជ្រ​ក្នុង​រាជធានី​ភ្នំពេញ​។​

​ប៉ុ​ន្កែ​ទិវា​នៃ​ពិធី​ជួបជុំ​រវាង​ប្រមុខ​រាជរដ្ឋាភិបាល ជាមួយ​អ្នកសារព័ត៌មាន​កម្ពុជា លើក​ទី​៥​ថ្ងៃទី​១៤​ខែមករា​ឆ្នាំ​២០២១​នេះ​មិនត្រូវ​បានរៀបចំ ធ្វើឡើង ដោយសារតែ​វិបត្តិ​កូ​វីដ​១៩​។​

​ទោះជា​ដូចនេះ​ក្តី​សម្តេច​តេ​ជោ ហ៊ុន សែន បាន​ផ្ញើ​សារលិខិត​ជូន​អ្នកសារព័ត៌មាន​ជាតិ និង​អន្តរជាតិ​ជំនួស​ឲ្យ​ជំនួប​ផ្ទាល់​។ សម្តេច តេ​ជោ​បាន​លើកសរសើរ​អ្នកកាសែត​ក្នុង​ការងារ​មួយឆ្នាំ​កន្លងមក ទោះបីជា​ប្រឈម​នឹង​កូ​វីដ​ក៏ដោយ​។ ក្នុង​សារលិខិត​សម្តេច​តេ​ជោ ក៏បាន​ណែនាំ​ផង និង​ថែមទាំង​ព្រមាន ដោយ​មិន​លើកលែង​ឡើយ ចំពោះ​អ្នកសារព័ត៌មាន ដែល​ខិលខូច និង​បំពាន​ច្បាប់​។​

​សម្តេច​តេ​ជោ ហ៊ុន សែន ក៏បាន​ណែនាំ​ដល់​អ្នកកាសែត ឲ្យ​បន្ត​អនុវត្ត​វិជ្ជាជីវៈ ច្បាប់ ស្តីពី របប​សារព័ត៌មាន និង​គោរព​តាម​គោលការណ៍ “​កុំ​បំពាន​សិទ្ធិ​អ្នកដទៃ កុំ​បំភ្លៃ​ការពិត​”​។

​ជាមួយគ្នានេះ សម្តេច​តេ​ជោ ហ៊ុន សែន ក៏បាន​ព្រមាន​ដល់​អ្នកកាសែត​មួយចំនួន​តូច ដែល​បាន និង​កំពុង​ប្រើប្រាស់​ស្ថាប័ន​ព័ត៌មាន ធ្វើ​សកម្មភាព​ទុច្ចរិត​ជំរិត​ទារប្រាក់ ការដើរ​តួនាទី​ជា​ចៅក្រម​កាត់សេចក្តី​នូវ​រឿង​ទំនាស់ បញ្ហាដីធ្លី​ការផ្សព្វផ្សាយ​ព័ត៌មាន​ក្លែងក្លាយ បំភ្លៃ​ការពិត បំប៉ោង​សភាពការណ៍ ជេរប្រមាថ ញុះញង់ និង​បំពុលបរិយាកាស​សង្គម ដើម្បី​ផលប្រយោជន៍​ផ្ទាល់ខ្លួន​ដែល​ប្រាសចាក ពី​វិជ្ជាជីវៈ​សារព័ត៌មាន ដែល​ធ្វើ​ឲ្យ​ខូច​តម្លៃ កិត្តិយស សេចក្តីថ្លៃថ្នូរ និង​កិត្យានុភាព​របស់​ស្ថាប័ន​សារព័ត៌មាន និង​អ្នកសារព័ត៌មាន ដែល​អនុវត្តបាន​ត្រឹមត្រូវ​តាម​ក្រមសីលធម៌​វិជ្ជាជីវៈ​។​

​ក្នុង​សារលិខិត​សម្តេច​តេ​ជោ​ក៏បាន​រម្លឹក​ពី​ជំនួប​លើក​ទី​៤​រវាង​រាជរដ្ឋាភិបាល​ជាមួយ​អ្នកសារព័ត៌មាន​កាលពី​ឆ្នាំ​កន្លង​ទៅដោយ​រាជរដ្ឋាភិបាល បានផ្តល់​មេធាវី​ស្ម័គ្រចិត្ត​សម្តេច​តេ​ជោ សែន ដើម្បី​ការពារ​អ្នកសារព័ត៌មាន​តាម​កា​រ​ស្នើសុំ​របស់​ស្ថាប័ន​សារព័ត៌មាន​ដើម្បី​ជួយ​សម្រួល ដល់​ការលំបាក​របស់​បងប្អូន​។ ប៉ុន្តែ​សម្តេច​តេ​ជោ​បាន​គូសបញ្ជាក់ថា រាជរដ្ឋាភិបាល​នឹងមិន​អត់ឱន​ដល់​អ្នកសារព័ត៌មាន ដែល​បំពាន​ច្បាប់ មិន​គោរព​វិជ្ជាជីវៈ ហើយ​ប្រព្រឹត្ត​អំពើ​ទុច្ចរិត ជ្រក​ក្រោម​ស្លាក​សារព័ត៌មាន បម្រើ​ផលប្រយោជន៍​ផ្ទាល់ខ្លួន​ដែល​ធ្វើ​ឲ្យ ប៉ះពាល់​ដល់​សន្តិសុខ សណ្តាប់ធ្នាប់​របៀបរៀបរយ​សង្គម​ឡើយ​។​

​សម្តេច​តេ​ជោ គូសបញ្ជាក់ថា កន្លងមក សម្តេច​បាន​លើកឡើងថា ជំងឺ​កូ​វីដ​១៩ ជា​ជំងឺឆ្លង​កាច​សាហាវ​ប៉ុន្តែ​ការផ្សព្វផ្សាយ​ព័ត៌មាន បំពុលសង្គម គឺ​វា​កាច​សាហាវ​ឆ្លង​លឿន​ជាង​ការឆ្លង​រីក​រាលដាល​នៃ​ជំងឺ​កូ​វីដ​១៩ ទៅទៀត ដែល​ទាមទារ​ឲ្យ​រាជរដ្ឋាភិបាល​ចាត់វិធានការ ចាំបាច់ ដើម្បី​ការពារ​សេចក្តីសុខសាន្ត​របស់​ប្រជាជន និង​ថែរក្សា​សុខសន្តិភាព ការអភិវឌ្ឍ​នៅ​កម្ពុជា​។​

​ជាការ​ពិត អ្នកកាសែត​ត្រឹមត្រូវ ដែល​ឆ្លងកាត់​ការបណ្តុះបណ្តាល​ជំនាញ​វិជ្ជាជីវៈ ទោះជា​វគ្គ​ខ្លី ឬ​វគ្គ​វែង មិន​ថា នៅ​អង្គការ​នៅ​ក្លិប​អ្នក កាសែត នៅ​សមាគម ឬ​វគ្គ​រៀបចំ​ដោយ​ក្រសួង​ព័ត៌មាន សាកលវិទ្យាល័យ​ភ្នំពេញ គឺ​ក្រុមអ្នកកាសែត​ទាំងនេះ ស្ទើរតែ​ទាំងអស់ បាន​បំពេញការងារ​ស្ទើរតែ​មួយជីវិត មិនមាន​បញ្ហា​អ្វី​ក្នុង​វិជ្ជាជីវៈ​ការងារ​របស់ខ្លួន​ឡើយ​។​

​ផ្ទុយទៅវិញ​អ្នកកាសែត​មួយចំនួន​តូច​ណា​នោះ​ដែល​មិនបាន​ឆ្លងកាត់​ការបណ្តុះបណ្តាល​ជំនាញ​កាសែត​ឬ​មានបំណង​បំពាន​វិជ្ជាជីវៈ ក្រមសីលធម៌​បានធ្វើ​ឲ្យ​មាន​បញ្ហា​ប៉ះពាល់​ដល់​អ្នកសារព័ត៌មាន​ដែលមាន​វិជ្ជាជីវៈ​ក្រមសីលធម៌​ត្រឹមត្រូវ​។​ប្រការនេះ​ដែល​បាន​បង្កើតជា​ក្លិន​មិនល្អ​ដល់​អ្នកកាសែត​ទូទៅ​។​

​ក្រៅពី​គោរព​ឲ្យ​ខ្ជាប់ខ្ជួន​នូវ​វិជ្ជាជីវៈ​ហើយ​អ្នកកាសែត​យើង ក្នុងសម័យ​ណា​ណាក៏ដោយ បើសិនជា​មិន​សរសេរ​ការពិត​ទេ​គឺមាន​ស្មើនឹង សម្លាប់​អាជីព​ខ្លួនឯង​។ អ្នកកាសែត ឬ​អង្គភាព​សារព័ត៌មាន​ណាក៏ដោយ ត្រូវតែ​ចងចាំ​ក្នុង​អាជីព​ជានិច្ច​ថា “​ការពិត ការពិត ការពិត​”​។ សារព័ត៌មាន ជា​កញ្ចក់​ឆ្លុះ​សង្គម​។ មានន័យថា បើ​រូបភាព​ស ចេញមក​ស បើ​ខ្មៅ ចេញ​ខ្មៅ​។​

​អ្នកកាសែត​យើង ក៏​តោង​តែ​ប្រកាន់ខ្ជាប់​នូវ​ក្រមសីលធម៌ វិជ្ជាជីវៈ​អ្នកសារព័ត៌មាន គឺ​មិន​ថា​ជា​អ្នកកាសែត​ឯករាជ្យ​ឬ​អ្នកកាសែត​នៅ អង្គភាព​ណា​នោះទេ ក្នុងពេល​បំពេញការងារ​នឹង​កម្រ​ហើយក៏​មិន​ជួប​បញ្ហា​អ្វី​ឡើយ​។​ចូរ​កុំភ្លេចថា​ក្រមសីលធម៌​និង​វិជ្ជាជីវៈ​អ្នកសារព័ត៌មាន ប្រៀបដូចជា​អាវ​ក្រោះ​របស់​អ្នកកាសែត​៕​

ទីតាំងផ្សាយពាណិជ្ជកម្ម

- Advertisment -

Most Popular