ប្រែសម្រួល : កញ្ញាដាលីស ៖ ក្រុមហ៊ុន Samsung កាលពីថ្ងៃព្រហស្បតិ៍ទី១៤មករា បានបង្ហាញត្រកូលស្មាតហ្វូនស៊េរីថ្មី Galaxy S21 ជាមួយនឹងតម្លៃទាបជាងមុន ២០០ដុល្លារពីជំនាន់មុននៃស្មាតហ្វូនកំពូលរបស់កូរ៉េខាងត្បូង។
ដោយបង្ហាញផ្សាយតាមអនឡាញ ឧបករណ៍S21 ដែលមានអេក្រង់ទំហំ ៦,២ អ៊ីញនេះអាចរកបញ្ជាទិញទុកមុនបានក្នុងតម្លៃទិញចូល ៨០០ ដុល្លារសម្រាប់អតិថិជននៅសហរដ្ឋអាម៉េរិក។
ក្រុមហ៊ុននាំមុខខាងស្មាតហ្វូនទូទាំងពិភពលោកនេះក៏បានបង្ហាញនូវស្មាតហ្វូនទំហំ ៦,៧ អ៊ីញ S21 Plus និងស្មាតហ្វូនដ៏ពិសេស S21 Ultra ដែលមានអេក្រង់ទំហំ ៦,៨ អ៊ីញផងដែរ។ឧបករណ៍ទាំងអស់គឺមានបណ្តាញឥតខ្សែ 5G ដែលកំពុងដាក់ប្រើជាសកល។
លោកធីអឹម រ៉ូ ប្រធានផ្នែកទំនាក់ទំនងចល័តសម្រាប់ក្រុមហ៊ុន Samsung Electronics បាននិយាយថា “យើងកំពុងរស់នៅក្នុងពិភពទូរស័ព្ទចល័តជាចម្បងហើយដោយពួកយើងភាគច្រើនធ្វើការពីចម្ងាយនិងចំណាយពេលច្រើននៅផ្ទះ យើងចង់ផ្តល់ជូននូវបទពិសោធន៍ស្មាតហ្វូនដែលឆ្លើយតបទៅនឹងតម្រូវការពហុព័ត៌មានដ៏ខ្លាំងក្លានៃទម្លាប់ផ្លាស់ប្តូរជាបន្តរបស់យើង”។
ចំណាត់ការនេះធ្វើឡើងបន្ទាប់ពីការសម្រេចចិត្តរបស់ក្រុមហ៊ុន Apple ក្នុងការរក្សាតម្លៃថេរសម្រាប់ទូរស័ព្ទ iPhone របស់ខ្លួន ខណៈផ្តល់ជូននូវឧបករណ៍ជាច្រើននៅចំណុចតម្លៃផ្សេងៗគ្នា។
ត្រកូលថ្មីរបស់ Samsung នេះនឹងមានតម្លៃចាប់ពី ១.២០០ ដុល្លារឡើងទៅសម្រាប់តម្លៃចាប់ផ្តើមរបស់ Ultra S21 ដែលជាឧបករណ៍សម្បូរលក្ខណៈពិសេសបំផុតនៅក្នុងស៊េរីចុងក្រោយនេះ។
លោក បប់ អូដូននែល មកពីក្រុមហ៊ុន Technalysis Research និយាយថា “ទីផ្សារស្មាតហ្វូនថ្លៃៗកំពុងត្រូវបានកំណត់ឡើងវិញ។ យើងកំពុងមើលឃើញការវិលត្រឡប់ទៅរកតម្លៃនៅកម្រិតមធ្យម។ ក្រុមហ៊ុននានានឹងកាន់តែអាចបន្តដំណើរទៅមុខបានឆ្ងាយ ហើយពួកគេកំពុងដកថយពីតម្លៃថ្លៃ ដែលពួកគេធ្លាប់មានកាលពីច្រើនឆ្នាំកន្លងទៅ”៕
Galaxy S21 អាចបញ្ជាទិញទុកមុនក្នុងតម្លៃ ៨០០ ដុល្លារសម្រាប់អតិថិជននៅអាម៉េរិក
