Home ព័ត៌មានសំខាន់ៗ ករណី​ហិង្សា ស...

ករណី​ហិង្សា ស្លាប់​ពលរដ្ឋ តវ៉ា​រឿង​ទំនាស់​ដីធ្លីៈ តុលាការ​បាត់ដំបង សម្រេច​ផ្តន្ទាទោស នាយ​អាវុធហត្ថ ឱ្យ​ជាប់ពន្ធនាគារ ម្នាក់​៧​ឆ្នាំ​, ម្នាក់ទៀត ៤​ឆ្នាំ​

​ដោយៈ ប​.​ជ័យ / បន្ទាយ​មាន​ជ័​យៈ ករណី​ហិង្សា ស្លាប់​ពលរដ្ឋ​តវ៉ា រឿង​ទំនាស់​ដីធ្លី នៅ​ស្រុក​អូរជ្រៅ និង​ស្រុក​ស្វាយចេក កាលពី​ថ្ងៃទី​២៩ ខែធ្នូ ឆ្នាំ​២០១៩ តុលាការខេត្ត បាត់ដំបង ដែល​ទទួលបាន​ការផ្ទេ​រ ដែន​សមត្ថកិច្ច​កាត់ក្តី​នោះ សម្រេច​ផ្តន្ទាទោស នាយ​អាវុធហត្ថ​ពីរ​នាក់ ឱ្យ​ជាប់ពន្ធនាគារ ម្នាក់ ៧ ឆ្នាំ និង​ម្នាក់ទៀត ៤ ឆ្នាំ និង​សង​សំណង រដ្ឋប្បវេណី (​លុយ​) ជាច្រើន​លាន​រៀល​។

​បើ​យោងតាម​អ្នកសម្របសម្រួល ប្រចាំខេត្ត​បន្ទាយមានជ័យ របស់​អង្គការ​អាដហុក លោក ស៊ុ ច័ន្ទ​គា បាន​ប្រាប់​កាសែត​រស្មី​កម្ពុជា ថ្ងៃទី​១៥ ខែមករា ឆ្នាំ​២០២១​ថាៈ តុលាការ ខេត្តបាត់ដំបង បានប្រកាស​សាលក្រម កាលពី​ថ្ងៃទី​១៣ ខែមករា ឆ្នាំ​២០២១ វេលា​ម៉ោង ៨ និង ៣០​នាទី​ព្រឹក នូវ​សំណុំរឿង​ខាងលើ ។​

​សាលក្រម​លេខ ៣៣ ឈ ចុះ​ថ្ងៃទី​១៣ ខែ មករា ឆ្នាំ​២០២១ របស់​តុលាការខេត្ត​បាត់ដំបង បានសម្រេច​ផ្តន្ទាទោស នាយ​អាវុធហត្ថ​ពីរ​នាក់ ឱ្យ​ជាប់ពន្ធនាគារ មានៈ ១.​លោក (​វរសេនីយ៍ឯក​) ស ប៊ុន​សឿង អតីត​មេបញ្ជាការរង កង​រាជ​អ​វា​វុ​ធ​ហត្ថ ខេត្តបន្ទាយមានជ័យ ត្រូវ​ផ្តន្ទាទោស ឱ្យ​ជាប់ពន្ធនាគារ រយៈពេល ៤ ឆ្នាំ ។ ២.​លោក (​វរសេនីយ៍​) ឆ​យ រដ្ឋ​នា ហៅ សឿង​តូច អតីត​ជំនួយការ ការិយាល័យ​ប្រឆាំង​គ្រឿងញៀន អាវុធហត្ថ​ខេត្តបន្ទាយមានជ័យ ត្រូវ​ផ្តន្ទាទោស ដាក់ពន្ធនាគារ រយៈពេល ៧ ឆ្នាំ (​គិតពី​ថ្ងៃ​ចាប់ខ្លួន​)​។​

​ចំណែក​សំណង​រដ្ឋប្បវេណី​វិញ គឺ​លោក ស ប៊ុន​សឿង ត្រូវ​សង​សំណង​ខូចខាត បាត់បង់​ទៅ​ពលរដ្ឋ​តវ៉ា​ទំនាស់​ដីធ្លីៈ ១. ត្រូវ​សង​សំណង​ទៅ​លោក អាន រួន ចំនួន ២០ លាន​រៀល ។ ២. សង​សំណង​ទៅ​លោក ហ៊ឹម គី​រី ចំនួន ៣០ លាន​រៀល ។ ៣. សង​សំណង ទៅ​លោក នូវ នឿន ចំនួន ២០ លាន​រៀល ។ ៤. សង​សំណង​ទៅ អ្នកស្រី ប៊ុ​យ គឹម​ឡាក់ (​ប្រពន្ធ​របស់​ទុយ ស្រស់ ) ចំនួន ៣០ លាន​រៀល ។ ចំណែក លោក ឆ​យ រដ្ឋ​នា ហៅ សឿង​តូច ត្រូវ​សង​សំណង​ជូន​អ្នកស្រី ប៊ុ​យ គឹម​ឡាក់ ចំនួន ៤០ លាន​រៀល​។ សាលក្រម បាន​បន្តថាៈ តុលាការ បើក​សិទ្ធិ​ឲ្យ​ប្តឹង​ឧទ្ធរណ៍ ដូច​មានចែង ក្នុង​ច្បាប់ ។

​លោក ស៊ុ ច័ន្ទ​គា បានបង្ហាញ​ទស្សនៈ​ថាៈ នៅក្នុង​រឿងនេះ ជា​អំពើ​ទារុណកម្ម និង​អំពើ ឃោរឃៅ អមនុស្សធម៌ ដែលមាន​ចែង នៅក្នុង​ច្បាប់​ជាតិ និង​អន្តរជាតិ​។ ប៉ុន្តែ​ទោស ដែល​ត្រូវដាក់​បង្ខំ​ឲ្យ​ជន​ត្រូវ​ចោទ ទាំងពីរ ដូច​មាន​ស្ថាន​សម្រាល អប្បបរមា​ពេក ទៅជា​បទ​ម​ជ្ឈឹ​ម​ទៅវិញ​។​

​លោក​បាន​អះអាង ក្រោយ​ទទួលដំណឹង ពី​ពលរដ្ឋ ជា​ជនរងគ្រោះ​ទាំងនោះ​ថាៈ ចំពោះ រឿងនេះ ភាគី​ដើម​បណ្តឹងរដ្ឋប្បវេណី មិន​យល់ព្រម លើ​សេចក្តីសម្រេច​នេះ​ទាំង​ការ​ផ្តន្ទា ទោស និង​សំណង​រដ្ឋប្បវេណី ។ ពួកគាត់​អាច​ប្តឹង​ឧទ្ធរណ៍ បន្ត​។​

​សូម​រំលឹកថា ករណី​ហិង្សា ស្លាប់​ពលរដ្ឋ​តវ៉ា​រឿង​ទំនាស់​ដីធ្លី នៅ​ស្រុក​អូរជ្រៅ និង​ស្វាយចេក នេះ បានកើត​ឡើង កាលពី​ថ្ងៃទី​២៩ ខែធ្នូ ឆ្នាំ​២០១៩ ក្រោយពី​កម្លាំង​អាវុធហត្ថ​ខេត្ត​អនុវត្ត បណ្តឹង​របស់​អាជ្ញាធរ​ខេត្ត និង​ដីកា​បង្គាប់​អោយ​ចាប់ខ្លួន របស់​ព្រះរាជអាជ្ញា អម​សាលាដំបូង ខេត្តបន្ទាយមានជ័យ ចាប់ខ្លួន​មេខ្លោង​ញុះញង់ ទំនាស់​ដីធ្លី ចំនួន ៥ នាក់ ក្នុងចំណោម​ពលរដ្ឋ មក​តវ៉ា​ប្រមាណ ១០០ នាក់ នៅ​ខាងក្រៅ​បរិវេណ​សាលា ខេត្តបន្ទាយមានជ័យ ។​

​ក្នុងអំឡុងពេល​សួរចម្លើយ ទុយ ស្រស់ ដែលមាន​សុខភាព ទ្រុឌទ្រោម​ស្រាប់ ញៀន​ស្រា និង​អត់​ហូប​អាហារ ហើយ​ទទួល​ការវាយដំ ពី​អតីតមន្ត្រី​អាវុធហត្ថ ទាំង​២ និង​ពី​យុវជន អប់រំ​បន្សាប​ផ្តាច់​គ្រឿងញៀន នៅ​អាវុធហត្ថ​ខេត្ត​ផង បាន​រងរបួស និង​គ្រាំគ្រា ហើយ​បាន ស្លាប់​។ ចំណែក​ពលរដ្ឋ ៤ នាក់​ទៀត រងរបួស​ធ្ងន់ និង​ស្រាល ។​

​រឿងរ៉ាវ​នេះ កើតចេញពី​ទំនាស់​ដីធ្លី ដែល​កើត​ពី​ការការពារ និង​តវ៉ា​ទាមទារ​ដី​កម្មសិទ្ធិឯកជន មាន​បង្កាន់ដៃ , មាន​ប្លង់រឹង ឬ​ប័ណ្ណ​សម្គាល់​កម្មសិទ្ធិ លើ​អចលវត្ថុ នៃ​ការចុះបញ្ជី​ដីធ្លី​មាន លក្ខណៈ​ជា​ប្រព័ន្ធ ក្នុង​បទបញ្ជា ០១ បប ឆ្នាំ​២០១២ និង​ដី​គម្រប​ព្រៃឈើ​រដ្ឋ នៅ​ភូមិ សាស្ត្រ​ឃុំ​អូរ​បី​ជាន់ ស្រុក​អូរជ្រៅ និង​នៅ​ឃុំ​ស្លក្រាម ស្រុក​ស្វាយចេក បានអូសបន្លាយ រាប់​ខែ ពី​ខែមីនា ដល់​ខែធ្នូ ឆ្នាំ​២០១៩ ។ ក្នុងនោះ មាន​ពលរដ្ឋ​ចម្រុះ មកពី​ក្នុង និង​ក្រៅ​ខេត្ត បន្ទាយមានជ័យ ហើយ​មាន​ចលនា អ្នក​នៅ​ពី​ក្រោយខ្នង ទាំង​អ្នកធំ ទាំង​អ្នកនយោបាយ និង​សង្គម​ស៊ីវិល​ផង​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular