ដោយៈ រ៉ាម៉ន / ភ្នំពេញៈ លោក ឃឹម ស៊ុនសូដា អភិបាលខណ្ឌកំបូល បានចុះជួបសំណេះ សំណាល ជាមួយមន្ត្រីសង្កាត់ប្រទះឡាង មន្ត្រីនគរបាលប៉ុស្តិ៍ រដ្ឋបាលប្រទះឡាង និងក្រុមការងារសាលាខណ្ឌ ដែលចុះសហការ ជាមួយប៉ុស្តិ៍នគរបាល ដើម្បីសសេរ សៀវភៅស្នាក់នៅ (ក២) ដែលជាឯកសារ តម្រូវការចាំបាច់របស់ ប្រជាពលរដ្ឋសម្រាប់ ប្រើប្រាស់ ក្នុងជីវភាពរស់នៅប្រចាំថ្ងៃ ។
សូមបញ្ជាក់ថាៈ រដ្ឋបាលខណ្ឌកំបូល បានបង្កើតក្រុមការងារ សហការជាមួយអធិការដ្ឋាន នគរបាលខណ្ឌ ចុះធ្វើសៀវភៅស្នាក់នៅ ជូនប្រជាពលរដ្ឋ ឲ្យស្របទៅតាមភូមិសាស្ត្រ រដ្ឋបាល នៃការបង្កើតខណ្ឌកំបូល ដែលរហូតមកដល់បច្ចុប្បន្ននេះ ក្រុមការងារ បានអនុវត្តន៍ និងចែកជួនប្រជាពលរដ្ឋ ចំនួន ៣ សង្កាត់រួចហើយ គឺសង្កាត់ឪឡោក សង្កាត់ស្នោរ និងសង្កាត់កន្ទោក។
នៅព្រឹកថ្ងៃដដែលនេះ លោក ឃឹម ស៊ុនសូដា ក៏បានឆ្លៀតឱកាស ចុះពិនិត្យប្រព័ន្ធ ប្រឡាយ មួយចំនួន ដើម្បីដាក់ផែនការស្តារ នាពេលខាងមុខ ដែលស្ថិតនៅតាមបណ្តាភូមិ មួយចំនួន ក្នុងសង្កាត់ប្រទះឡាង និងសង្កាត់ភ្លើងឆេះរទេះ ដើម្បីសម្រួលចរន្តទឹកហូរ រំដោះទឹកចេញ ពីភូមិនៅរដូវវស្សា បញ្ចៀសការលិចលង់ លំនៅដ្ឋានប្រជាពលរដ្ឋ៕/V-PC
