យុទ្ធនា​ការអប់រំ​ផ្សព្វផ្សាយ​ច្បាប់​ចរាចរណ៍​ផ្លូវគោក ក្រោម​ប្រធានបទ គ្រោះថ្នាក់​ចរាចរណ៍ នៅតែ​ជា​កង្វល់​ដែល​ត្រូវ​រួមគ្នា​ដោះស្រាយ​

ដោយ​: គូលែន / សៀមរាប​: នា​ព្រឹក​ថ្ងៃទី​១៥ ខែមករា ឆ្នាំ​២០២១​នេះ នៅ​សាលា​ខេត្តសៀមរាប​មាន​រៀបចំ​ពិធី​យុទ្ធនា​ការអប់រំ​ផ្សព្វផ្សាយ​ច្បាប់​ចរាចរណ៍​ផ្លូវគោក ក្រោម​ប្រធានបទ គ្រោះថ្នាក់​ចរាចរណ៍ នៅតែ​ជា​កង្វល់​ដែល​ត្រូវ​រួមគ្នា​ដោះស្រាយ ដោយមាន​ការចូលរួម​ពី​លោកស្រី មឹន ម៉ាណ​វី រដ្ឋលេខាធិការ​ក្រសួង​សាធារណការ និង​ដឹកជញ្ជូន និង​ជា​អគ្គលេខាធិការ​នៃ​គណៈកម្មការ​ជាតិ​សុវត្ថិភាព​ចរាចរណ៍​ផ្លូវគោក និង​លោក ពិន ប្រាកដ អភិបាលរង​ខេត្ត និង​ជា​អនុប្រធាន​អនុគណៈកម្មការ​សុវត្ថិភាព​ចរាចរណ៍​ផ្លូវគោក​ខេត្តសៀមរាប ។​

​តាម​របាយការណ៍​រប​ស់ លោក គី វី​រិន្ទ ប្រធាន​មន្ទីរ​សាធារណការ​និង​ដឹកជញ្ជូន​ខេត្តសៀមរាប បាន​ឲ្យ​ដឹងថា នៅក្នុង​ខេត្តសៀមរាប ក្នុង​ឆ្នាំ​២០២០​កន្លងមកនេះ មាន​គ្រោះថ្នាក់​ចរាចរណ៍​កើត​ចំនួន​៧១​ករណី ការថយចុះ​ចំនួន​២៨​ករណី បើ​ធៀប​នឹង​ឆ្នាំ​២០១៩ ដែលមាន​៩៩​ករណី ប៉ុន្តែ​ចំនួន​អ្នករងគ្រោះ​មានការ​កើនឡើង ដោយ​ក្នុងនោះ ចំនួន​អ្នកស្លាប់​ដោយ​គ្រោះថ្នាក់​ចរាចរណ៍​ឆ្នាំ​២០២០​មាន​ចំនួន​៨៦​នាក់ ខណៈ​ឆ្នាំ​២០១៩ មាន​អ្នកស្លាប់​ត្រឹមតែ​៨១​នាក់ ។​

លោកស្រី មឹន ម៉ាណ​វី រដ្ឋលេខាធិការ​ក្រសួង​សាធារណការ និង​ដឹកជញ្ជូន និង​ជា​អគ្គលេខាធិការ​នៃ​គណៈកម្មការ​ជាតិ​សុវត្ថិភាព​ចរាចរណ៍​ផ្លូវគោក

​លោកស្រី មឹន ម៉ាណ​វី រដ្ឋលេខាធិការ​ក្រសួង​សាធារណការ និង​ដឹកជញ្ជូន និង​ជា​អគ្គលេខាធិការ​នៃ​គណៈកម្មការ​ជាតិ​សុវត្ថិភាព​ចរាចរណ៍​ផ្លូវគោក បាន​និយាយថា ពិតណាស់ថា​គ្រោះថ្នាក់​ចរាចរណ៍​វា​បាន​បង្ក​ជា​ក្តីកង្វល់​ដ៏​ធំ​សម្រាប់​មនុស្សជាតិ ដូច្នេះ​តាមរយៈ​យុទ្ធនាការ​នាពេលនេះ នឹង​ជួយ​ឲ្យ​បងប្អូន​ទាំងអស់គ្នា​បាន​យល់ច្បាស់​អំពី​សារប្រយោជន៍​នៃ​ការគោរព​ច្បាប់​ចរាចរណ៍ និង​ការប្រើប្រាស់​ដងផ្លូវ​ប្រក​ប​ដោយ​សុខ​សុវត្ថិភាព ។​

​លោក ពិន ប្រាកដ អភិបាលរង​ខេត្ត និង​ជា​អនុប្រធាន​អនុគណៈកម្មការ​សុវត្ថិភាព​ចរាចរណ៍​ផ្លូវគោក​ខេត្តសៀមរាប បាន​បញ្ជាក់ថា ដោយសារតែ​អ្នកប្រើប្រាស់​ផ្លូវថ្នល់​មួយចំនួន​មិន​គោរព​ច្បាប់​ចរាចរណ៍ បានធ្វើ​ឲ្យ​អត្រា​គ្រោះថ្នាក់​ចរាចរណ៍​កាន់តែ​មានការ​កើនឡើង ដែល​បញ្ហា​ទាំងអស់នេះ ត្រូវតែ​រួមគ្នា​ដោះស្រាយ ព្រោះ​មួយរយៈ​ពេលកន្លងមក​មាន​និន្នាការ​ស្លាប់​ជា​ក្រុម ដែល​បង្កឡើង​ដោយ​ការបើកបរ​ហួស​ល្បឿន​កំណត់ ការបើកបរ​ក្រោម​ឥទ្ធិពល​នៃ​គ្រឿង​ស្រវឹង ការមិន​ពាក់មួក​សុវត្ថិភាព មិន​ពាក់​ខ្សែក្រវាត់​សុវត្ថិភាព ការ​វ៉ា​ជែង​ដោយ​ប្រថុយប្រថាន​បាន​បង្ក​ជា​គ្រោះថ្នាក់​ចរាចរណ៍ ដែលមាន​សភាព​ធ្ងន់ធ្ងរ បណ្តាល​ឲ្យ​បាត់បង់​អាយុជីវិត​មនុស្ស​យ៉ាងច្រើន ដោយបាន​បន្សល់ទុក​នូវ​ស្ត្រី​មេម៉ាយ កុមារកំព្រា ពិការភាព និង​សោដនា​កម្ម​ជាច្រើន​ក្នុងសង្គម​កម្ពុជា ៕​

ទីតាំងផ្សាយពាណិជ្ជកម្ម

- Advertisment -

Most Popular