រដ្ឋបាលខេត្ត​កំពង់ឆ្នាំង​បើក​វគ្គ​បណ្ដុះបណ្ដាល ស្ដីពី​ប្រព័ន្ធ​ព័ត៌មាន​ទាន់​ហេតុការណ៍ និង​អង្កេត​តាមដាន​ស្ថានការណ៍​គ្រោះមហន្តរាយ (PRISM)

ដោយ​: ទេ​ពក​ង្រី / ខេត្តកំពង់ឆ្នាំង​: នៅ​សាលប្រជុំ​សាលាខេត្ត​កំពង់ឆ្នាំង បានរៀបចំ​វគ្គ​បណ្ដុះបណ្ដាល ស្ដីពី​ប្រព័ន្ធ​ព៌​ត៌មាន​ទាន់​ហេតុការណ៍ និង​អង្កេត​តាមដាន​ស្ថានការណ៍​គ្រោះមហន្តរាយ (PRISM) ក្រោម អធិបតីភាព លោក អម សុភា អភិបាលរង​ខេត្ត​, លោក អែម សំណាង អនុប្រធាននាយកដ្ឋាន​ព័ត៌មាន​គ្រប់គ្រង​គ្រោះមហន្តរាយ និង​លោកស្រី អ៊ីវ ច័ន្ទ​មន្នី​រ័ត្ន មន្ត្រី​សម្របសម្រួល​គម្រោង​អង្គការ​កម្មវិធី​ស្បៀងអាហារ​ពិភពលោក និង​មានការ​អញ្ជើញ​ចូលរួម​ពី​លោក លៀង ជុំ សុ​បិ​ន្ត នាយករង​រដ្ឋបាល​សាលាខេត្ត និង​អនុប្រធាន​លេខាធិការដ្ឋាន​គណៈកម្មាធិកា​រ​គ្រប់គ្រង​គ្រោះមហន្តរាយ​ខេត្ត និង​មន្ត្រី​លេខាធិការដ្ឋាន​គ្រប់គ្រង​គ្រោះមហន្តរាយ​ខេត្ត​ក្រុង​ស្រុក ដែល​ពិធី​នេះ​ធ្វើឡើង​នៅ​ថ្ងៃទី​១៥​មករា​២០២១​។​

​មានប្រសាសន៍​ក្នុងឱកាស​នោះ លោក អម សុភា បាន​លើកឡើងថា ដោយមាន​ការយកចិត្ត​ទុកដាក់​ខ្ពស់​ពី​ថ្នាក់ដឹកនាំ​គណៈកម្មាធិការ​ជាតិ​គ្រប់គ្រង​គ្រោះមហន្តរាយ ព្រមទាំង​មានការ​ជួយ​គាំទ្រ​ទាំង​ធនធាន និង​បច្ចេកទេស​ពី​ក្រុមការងារ​អគ្គលេខាធិការដ្ឋាន នៃ​គណៈកម្មាធិការ​ជាតិ​គ្រប់គ្រង​គ្រោះមហន្តរាយ និង​អង្គការ​កម្មវិធី​ស្បៀងអាហារ​ពិភពលោក​លេខាធិការដ្ឋាន នៃ​គណៈកម្មាធិការ​គ្រប់គ្រង​គ្រោះមហន្តរាយ​ខេត្តកំពង់ឆ្នាំង បាន​ពង្រឹង​ជាប្រចាំ​យន្តការ​គ្រប់គ្រង និង​ប្រើប្រាស់​ប្រព័ន្ធ PRISM ដោយ​ធានាបាន​នូវ​ប្រសិទ្ធភាព​ការងារ ល្បឿន​នៃ​ការបញ្ចូល និង​បញ្ជូន​ទិន្នន័យ សុក្រឹត្យភាព​នៃ​ទិន្នន័យ​ដោយមាន​ការផ្ទៀងផ្ទាត់​យ៉ាង​ត្រឹមត្រូវ​រាល់​ហេតុការណ៍​គ្រោះមហន្តរាយ ឬ​ឧប្បទ្ទវហេតុ​នីមួយៗ ដោយ​ឈរលើ​ស្មារតី​ទទួលខុសត្រូវ និង​ឆន្ទៈ​ម្ចាស់ការ​ខ្ពស់​។​

​លោក អម សុភា ក៏បាន​ថ្លែង​នូវ​ការកោតសរសើរ និង​វាយតម្លៃ​ខ្ពស់​ចំពោះ​កិច្ចខិតខំ​ប្រឹងប្រែង​រប​ស់​ក្រុមការងារ​ប្រព័ន្ធ PRISM ខេត្ត ក្រុង ស្រុក​,​គណៈកម្មាធិការ​គ្រប់គ្រង​គ្រោះមហន្តរាយ​ក្រុង ស្រុក លេខាធិការដ្ឋាន​ក្រុង ស្រុក​, គណៈកម្មាធិការ​គ្រប់គ្រង​គ្រោះមហន្តរាយ​ឃុំ សង្កាត់ និង​មន្ត្រី​ពាក់ព័ន្ធ ដែលជា​និច្ចកាល​តែង​បាន​យក​អស់កម្លាំង​កាយ​ចិត្ត ក្នុងការ​បំពេញភារកិច្ច​ប្រកបដោយ​ការទទួលខុសត្រូវ​ខ្ពស់ លើ​ការងារ​ត្រៀម​បង្កា ឆ្លើយតប សង្គ្រោះបន្ទាន់ និង​ស្ដារឡើងវិញ​ក្រោយ​គ្រោះមហន្តរាយ ទាំង​មុនពេល អំឡុងពេល និង​ក្រោយពេល​គ្រោះមហន្តរាយ កាត់បន្ថយ​ផលប៉ះពាល់​ចំពោះ​អាយុជីវិត​មនុស្ស សត្វ ផលដំណាំ ផ្ទះសម្បែង ហេដ្ឋារចនាសម្ព័ន្ធ​រូបវ័ន្ត​នានា ពង្រឹង​ភាព​ធន់​របស់​ប្រជាពលរដ្ឋនៅក្នុង​សហគមន៍ កាត់បន្ថយ​ភាពក្រីក្រ ស្របតាម​កម្មវិធី​នយោបាយ និង​យុទ្ធសាស្ត្រ​ចតុកោណ​របស់​រាជរដ្ឋាភិបាល ដែលមាន សម្ដេច​តេ​ជោ នាយករដ្ឋមន្ត្រី ជា​ប្រមុខ​ដឹកនាំ​ប្រកបដោយ​គតិបណ្ឌិត​។​

​លោក អម សុភា ក៏បាន​ជម្រុញ​ឲ្យ​មន្ត្រី​បង្គោល​គ្រប់​ថ្នាក់ ដែល​បាន​ចូលរួម​វគ្គ​បណ្ដុះបណ្ដាល​នៅថ្ងៃនេះ ត្រូវ​យកចិត្តទុកដាក់​ចំពោះ​បទ​ឧ​ទេ្ទ​សនាម​របស់​អ្នកសម្របសម្រួល បើទោះបីជា​ខេត្តកំពង់ឆ្នាំង ទទួលបាន​នូវ​ការកោតសរសើរ​ពី​ថ្នាក់ជាតិ ដោយ​មន្ត្រី​បង្គោល​ក្រុង​ស្រុក​អាច​បញ្ចូល​ទិន្នន័យ​គ្រោះមហន្តរាយ តាម​ប្រព័ន្ធ PRISM នេះ​យ៉ាងណាក៏ដោយ ក៏​យើង​ត្រូវ​យកចិត្តទុកដាក់​តាម​ដាន ព្រោះ​ក្រែង​លោកអ្នក​សម្របសម្រួល​គាត់​មានចំណេះដឹង​ថ្មីៗ ទាក់ទង​ទៅនឹង​បច្ចុប្បន្នភាព នៃ​ប្រព័ន្ធ​ដែល​ត្រូវ​ចែករំលែក ដើម្បី​ឲ្យ​មាន​ភាពល្អប្រសើរ​ជាង​មុន​។​

​លោក​ក៏បាន​ក្រើនរំលឹក​បន្ថែម​សូម​ឲ្យ​មានការ​ប្រុងប្រយ័ត្ន និង​ចូលរួម​អនុវត្ត​វិធានការ​ការពារ​ជំងឺ​កូ​វីដ​-១៩ តាម​ការណែនាំ​របស់​ប្រមុខ​រាជរដ្ឋាភិបាល​កម្ពុជា ក៏ដូចជា​តាម​សេចក្ដីណែនាំ​របស់​ក្រសួងសុខាភិបាល ផងដែរ​៕​

ទីតាំងផ្សាយពាណិជ្ជកម្ម

- Advertisment -

Most Popular