Home ព័ត៌មានអន្តរជាតិ យន្តហោះ​ក្រុម...

យន្តហោះ​ក្រុមហ៊ុន Virgin Orbit របស់​លោក​ប្រេន​សុន ដឹក​រ៉ុក្កែត​ទៅដល់​ទី​អវកាស​ជា​លើកដំបូង

​ប្រែ​សម្រួល : កញ្ញា​ដា​លី​ស ៖ យន្តហោះ​របស់​ក្រុមហ៊ុន Virgin Orbit របស់​លោក​រី​ឆាត ប្រេន​សុន​កាលពី​ថ្ងៃអាទិត្យ​ទី​១៧​មករា​បាន​ដឹក​រ៉ុក្កែត​មួយ​ចូល​ទៅ​ទី​អវកាស​ដោយ​ជោគជ័យ​ពី​ស្លាប​យន្តហោះ Boeing 747 កែច្នៃ​របស់ខ្លួន ដែល​នេះ​នឹង​ត្រួសត្រាយ​ផ្លូវ​សម្រាប់​វិធីសាស្ត្រ​ថ្មី​នៃ​ការបាញ់​បង្ហោះ​ផ្កាយរណប​ក្នុងតម្លៃ​ទាប​។​

​នេះ​គឺ​ជា​ការប៉ុនប៉ង​លើក​ទី ២ របស់​ក្រុមហ៊ុន​នេះ បន្ទាប់​ពី​ការសាកល្បង​បរាជ័យ​កាលពី​ខែ​ឧសភា​។​

​ក្រុមហ៊ុន​បាន​បង្ហោះ​សារ​ពី​គណនី Twitter របស់​ខ្លួន​នៅ​ម៉ោង ២៖៤៩ រសៀល ថា “​រ៉ុក្កែត LauncherOne បាន​ទៅ​ដល់​គន្លង​គោច​រហើយ​! គ្រប់​គ្នា​នៅក្នុង​ក្រុម​គ្រប់គ្រង​បញ្ជា​បេសកកម្ម កំពុង​រំភើប​​រីករាយ​យ៉ាងខ្លាំងបំផុត​”​។​

​យន្ដហោះ​បាន​ហោះ​ចេញពី​កំពង់ផែ​អាកាស​និង​អវកាស​ម៉ូ​ចេវ​នៅ​តំបន់​វាល​ខ្សាច់​ភាគ​ខាងជើង​នៃ​ទីក្រុង​ឡូ​ស​អេន​ជេ​ឡេស​និង​បាញ់​បង្ហោះ​រ៉ុក្កែត​នៅលើ​មហាសមុទ្រ​ប៉ាស៊ីហ្វិក​។​

​បង្កើតឡើង​ដោយ​មហាសេដ្ឋី​អង់គ្លេស រី​ឆាត ប្រេន​សុន ក្នុង​ឆ្នាំ ២០១២ ក្រុមហ៊ុន Virgin Orbit ចង់​ផ្តល់​ជូន​នូវ​សេវាកម្ម​រហ័ស​និង​បត់បែន​បាន​សម្រាប់​ប្រតិបត្តិ​ករ​ផ្កាយរណប​តូចៗ​ដែល​មាន​ទម្ងន់​ពី ៣០០ ទៅ ៥០០ គីឡូក្រាម ដែល​ជា​ទីផ្សារ​កំពុង​ត្រូវប៉ាន់​។​

​រ៉ុក្កែត​របស់​ក្រុមហ៊ុន Virgin Orbit ដែល​មាន​ប្រវែង ២១ ម៉ែត​ឈ្មោះថា LauncherOne ត្រូវបាន​ដាក់​នៅ​ពីក្រោម​ស្លាប​យន្តហោះ​កែច្នៃ Boeing 747 ដែល​មានឈ្មោះ​ថា Cosmic Girl ។​

​នៅពេល​វា​ឈាន​ដល់​កម្ពស់​ចាំបាច់​ហើយ​នោះ យន្តហោះ​នឹង​ព្រលែង​រ៉ុក្កែត ដែល​ម៉ាស៊ីន​របស់​វា​នឹង​បញ្ឆេះ​ឡើង​ដើម្បី​រុញ​វា​ចូល​ទៅ​គន្លង​ផែនដី និង យក​ទំនិញ​របស់​វា​ទៅ​ផ្ទុក​នៅក្នុង​លំហ​។​

​ការបាញ់​បង្ហោះ​រ៉ុក្កែត​ពី​យន្ដហោះ​គឺ​មាន​ភាពបត់បែន​ជាង​ការបាញ់​បង្ហោះ​ជា​លក្ខណៈ​បញ្ឈរ​ពី​ផ្ទៃដី ពីព្រោះ​តាម​ទ្រឹស្តី​អ្វីដែល​ក្រុមហ៊ុន​ទាំងអស់​ត្រូវការ​គឺ​មាន​ផ្លូវ​ហោះ​ស្រាប់ៗ​ជាជាង​បង្កើត​ស្ថានីយ​​បាញ់​បង្ហោះ​យាន​អវកាស​។​

​លោក រី​ឆាត ប្រេន​សុន បាន​បង្កើត​ក្រុមហ៊ុន​អវកាស​មួយទៀត​ឈ្មោះថា Virgin Galactic ដែល​កំពុង​ប្រើ​គំនិត​ស្រដៀង​គ្នា​នេះ​ដើម្បី​នាំ​អ្នកទេសចរ​ទៅ​លំហ​អាកាស​ដើម្បី​សាកល្បង​នូវ​បទពិសោធន៍ “​គ្មាន​ទម្ងន់​សោះ​” នៅ​សុញ្ញ​អាកាស​នៅ​កម្ពស់ ៨០ គីឡូម៉ែត្រ​ពី​លើ​ផ្ទៃ​ផែនដី​៕

​រ៉ុក្កែត LauncherOne ត្រូវ​បាន​បង្ហោះ​ទៅ​ទី​អវកាស​ដោយ​ជោគជ័យ​កាលពី​ថ្ងៃអាទិត្យ ក្រោម​ស្លាប​យន្តហោះ​កែច្នៃ Boeing 747 ដែល​មានឈ្មោះ​ថា Cosmic Girl

ទីតាំងផ្សាយពាណិជ្ជកម្ម

- Advertisment -

Most Popular