Home ព័ត៌មានសំខាន់ៗ នៅ​ឆ្នាំក្រោយ...

នៅ​ឆ្នាំក្រោយ ខេត្តព្រៃវែង មានទឹក​សម្រាប់ធ្វើ​ស្រូវប្រាំង ដល់ ១៤ ម៉ឺន​ហិកតា​

ដោយៈ ប​.​ខុន / ភ្នំពេញៈ ស្ថានីយ​បូមទឹក​ទាំង​បួន​កន្លែង នៅលើ​ប្រព័ន្ធធារាសាស្ត្រ​វ៉ៃ​កូ ដោយ​ប្រើ​ថាមពល​អគ្គិសនី បាន​តម្លើង និង​ភ្ជាប់​ចរន្ត​រួច បាន​ប្រើប្រាស់ សាកល្បង បញ្ជូន​ទឹក ទៅកាន់​តំបន់ ដែល​កសិករ ត្រូវការ​ទឹក​យ៉ាង មាន​ប្រសិទ្ធភាព​ធ្វើឱ្យ​ផ្ទៃដី​ដាំ​ដុះ ស្រូវប្រាំង ក្នុង​ខេត្តព្រៃវែង មានការ​កើនឡើង​ច្រើន នៅ​ឆ្នាំនេះ ហើយ​អាច​កើន​ដល់ ១៤ ម៉ឺន​ហិកតា នៅ​រដូវប្រាំង ឆ្នាំ​២០២១-២០២២ ខាងមុខ​។​

​លោក ឃុន សា​ខឿន ប្រធាន​មន្ទីរ​ធនធានទឹក និង​ឧតុនិយម ខេត្តព្រៃវែង​បាន​ប្រាប់​ឱ្យ រស្មី​កម្ពុជា​ដឹង នៅ​ថ្ងៃទី​១៨ ខែមករា ឆ្នាំ​២០២១​ថាៈ ស្ថានីយ​បូមទឹក ទាំង​បួន​នៅលើ​ប្រព័ន្ធ វ៉ៃ​គោ បាន​សាងសង់​រួចរាល់​ហើយ តែ​ស្ថិតនៅក្រោម​ការ​គ្រប់​គ្រង់ និង​ទទួលខុសត្រូវ ដោយ​ភាគី​ចិន​មួយរយៈ មុននឹង​ប្រគល់​ឱ្យមក​ក្រសួង​ធនធាន ទឹក និង​ឧតុនិយម គ្រប់គ្រង​បន្ត​។​

​ប្រធាន​មន្ទីរ​ខាងលើ បាន​និយាយថាៈ លោក និង​លោក ម៉ី លី​ហួត អនុរដ្ឋលេខាធិការ ក្រសួង​ធនធានទឹក និង​ឧតុនិយម ដែលជា​ប្រធាន មុខព្រួញ​ខេត្តព្រៃវែង​បាន​ចុះ​សម្រប សម្រួល ជាមួយ​ភាគី​មិត្ត​ចិន ក្នុងការ​បូមទឹក​អន្តរា គម​ន៍ ពី​ស្ថានីយ៍​បូមទឹក​ទី​២ នៃ​ប្រព័ន្ធ ស្រោចស្រព វ៉ៃ​គោ​១ ដាក់ចូល​ប្រឡាយ មេ​ទី​១ មាន​ចម្ងាយ​ប្រវែង ២៨ គីឡូម៉ែត្រ ដើម្បី ជួយ​អន្តរាគមន៍ សង្គ្រោះ​ស្រូវ រដូវប្រាំង របស់​ប្រជាកសិករ ចំនួន​ប្រមាណ​ជា ១.២៨០ ហិកតា នៅក្នុង​ចំណោម ៦.០០០ ហិកតា នៅក្នុង​ឃុំ​ចំនួន​៥ នៃ​ស្រុក​ស្វាយ​អ​ន្ទ​រ​។​

​លោក ឃុ​ត សា​ខឿន បាន​និយាយ​ឱ្យដឹងទៀតថាៈ ការងារ​អន្តរាគមន៍ ខាងលើ​បានបញ្ចប់ ហើយ​បន្ទាប់ពី​បាន​បញ្ជូន​ទឹក ដាក់​ពេញ​ប្រឡាយ តាម​ការស្នើសុំ​របស់​ប្រជា កសិករ នៅ​ប្រឡាយ​មេ​ខ្សែ​ទី​១ ឯ​នៅ​ប្រឡាយ​មេ​ខ្សែ​ទី​២ មិនទាន់​ខ្វះ​ទឹក​ទេ ។ ការងារ​ដាំ​ដុះ ស្រូវប្រាំង នៅក្នុង​ខេត្តព្រៃវែង មកដល់ពេលនេះ អនុវត្តបាន​ដល់​ចំនួន ៨៨.០០០​ហិកតា ហើយ​។ ផ្ទៃដី​ស្រូវវស្សា ត្រូវបាន​ដាំ​ដុះ​បន្ថែម ដោយ​ស្រូវប្រាំង បន្ទាប់ពី​នៅតាម​ប្រព័ន្ធ ធារាសាស្ត្រ​វ៉ៃ​គោ មានទឹក​គ្រប់គ្រាន់ ។ នៅ​ឆ្នាំនេះ​យើង មិនទាន់​ផ្សព្វផ្សាយ​ឱ្យមាន​ការ ពង្រីក​ផ្ទៃដី​ដាំ​ដុះ ស្រូវប្រាំង​នៅឡើយ​ទេ ដោយសារ​ប្រព័ន្ធ ស្ថិតនៅក្នុង​ការប្រើប្រាស់ សាកល្បង តែ​ប្រជាកសិករ បាន​បង្កើន​ការដាំដុះ ច្រើន​រួចទៅហើយ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​១៨ ខែមករា ឆ្នាំ​២០២១​ថាៈ ស្ថានីយ បូមទឹក​ទាំង ៤ កន្លែង​នៅតាម​ប្រព័ន្ធ​វ៉ៃ​គោ បាន​ត​ភ្ជាប់​រួចរាល់ អស់ហើយ និង​បាន​ដំណើការ សាកល្បង រួចហើយ​ដែរ តែ​តម្រូវការ​ប្រើប្រាស់​ទឹក ទើប​មាន មួយកន្លែង គឺ​ស្ថានីយ៍​តូច​លេខ​២ ដើម្បី​អន្តរាគមន៍​បូមទឹក ដាក់​នៅ​ស្រុក​ស៊ីធរ​កណ្តាល និង ស្វាយ​អ​ន្ទ​រ ដែល​បច្ចុប្បន្ន ប្រជាពលរដ្ឋ បានចាប់ផ្តើម​ធ្វើ​ស្រូវប្រាំង បាន​ប្រមាណ​ជា ៦.០០០ ហិកតា​។​

​អ្នកនាំពាក្យ​ក្រសួង​ជំនាញ​ខាងលើ បាន​និយាយ​ឱ្យដឹងទៀតថាៈ នៅ​ឆ្នាំក្រោយ ផ្ទៃដី​ស្រូវ ប្រាំង ក្នុង​ខេត្តព្រៃវែង អាច​នឹង​បង្កើន​ប្រមាណ​ជា ៥ ម៉ឺន​ហិកតា​ទៀត បន្ទាប់ពី​ប្រព័ន្ធ​វ៉ៃ​គោ បានរៀបចំ​រួចរាល់ ទាំង​ស្ថានីយ​បូមទឹក សម្រាប់​បញ្ជូន​ទឹក​ស្រោចស្រព ផ្ទៃដី​ស្រូវប្រាំង នៅ​ស្រុក​ស៊ីធរ​កណ្តាល ស្វាយ​អ​ន្ទ​រ កញ្ជ្រៀច កំចាយមារ មេសាង និង ស្រុក​កំពង់ត្របែក ដែល​ស្ថិតនៅ​សងខាង​ប្រព័ន្ធ​វ៉ៃ​គោ ។ បច្ចុប្បន្ន ខេត្តព្រៃវែង មាន​ផែន​ការផលិត​ស្រូវប្រាំង ៧៥.០០០ ហិកតា តែ​ជាក់ស្តែង កសិករ​ដាំ​ដុះ បាន​ដល់​ជាង ៨ ម៉ឺន​ហិកតា រួចទៅហើយ​។​

​លោក ចាន់ យុ​ត្ថា បានឱ្យដឹង​ទៀតថាៈ ផ្ទៃដី​ជាង ៥ ម៉ឺន​ហិកតា ដែល​កន្លងមក កសិករ ធ្វើ​តែ​ស្រូវវស្សា ត្រូវបាន​គេ​គ្រោង ផលិត​ស្រូវប្រាំង​បន្ថែម ចាប់ពី​ឆ្នាំ ក្រោយ​ទៅ បន្ទាប់ពី​ប្រព័ន្ធ​វ៉ៃ​គោ មានលទ្ធភាព​ទឹក​គ្រប់គ្រាន់ ដើម្បី​ស្រោចស្រព​។ នៅ​ឆ្នាំក្រោយ ខេត្តព្រៃវែង អាចមាន​លទ្ធភាព ផលិត​ស្រូវប្រាំង ប្រមាណ​ជា ១៤ ម៉ឺន​ហិកតា ដែលជា​ខេត្ត ធ្វើស្រែ​ប្រាំង​ច្រើនជាងគេ​។​

​ចំណែកឯ​ការងារ​អន្តរាគមន៍​បូមទឹក នៅពេលនេះ លោក ចាន់ យុ​ត្ថា បាន​និយាយថាៈ មិនទាន់បាន​បូមទឹក នៅ​ស្ថានីយ​ពី​ទន្លេតូច មក​ប្រើ​នៅឡើយ​ទេ ដោយ​ប្រើ​ត្រឹម​ស្ថានីយ​តូច បូមទឹក​ចេញ ពី​បឹង​កា​ពិត ដាក់ចូល​ប្រឡាយ​មេ​។ ដោយឡែក នៅ​ខេត្តស្វាយរៀង ក៏​នឹង​បន្ថែម​ផ្ទៃដី ផលិត​ស្រូវប្រាំង បន្ថែមទៀត​ដែរ នៅក្នុង​ស្រុក​ស្វាយជ្រុំ ក្រុង​ស្វាយរៀង កំពង់​រោទ៍ និង​ស្រុក​រំដួល សរុប​ស្មើ​ប្រមាណ​ជា ៧.០០០ ហិកតា​ទៀត​៕/V​-PC/សរន

ទីតាំងផ្សាយពាណិជ្ជកម្ម

- Advertisment -

Most Popular