Home ព័ត៌មានអន្តរជាតិ អ៊ីរ៉ង់​ព្រមា...

អ៊ីរ៉ង់​ព្រមាន​ត្រាំ បន្ទាប់​ពី​យន្តហោះ​B-52 ហោះ​ល្បាត​នៅ​មជ្ឈិមបូព៌ា​

​ប្រែ​សម្រួលៈ​វាសនា​/​តេ​អេ​រ៉ង់​៖ ​មុន​នេះ​កាលពី​ថ្ងៃអាទិត្យ បញ្ជាការ​កណ្តាល​អាម៉េរិក​អាម៉េរិក​(CENTCOM)​បានប្រកាសថា យន្តហោះ​ទម្លាក់​គ្រាប់បែក​B-52​មួយ​គ្រឿង​បាន​ហោះ​ល្បាត​នៅ​មជ្ឈិមបូព៌ា ជា​លើក​ទី​២​ដោយ​ហៅ​វា​ថា​ជា​« ផ្នែក​សំខាន់​មួយ​នៃ​ស្ថានភាព​ការពារ​ខ្លួន​របស់​CENTCOM» តែ​រដ្ឋមន្ត្រី​ការបរទេស​អ៊ីរ៉ង់​លោក ចា​វ៉ាត ហ្សារី​ហ្វ បាន​ថ្កោលទោស​ការ​ល្បាត​នេះ​។​

រដ្ឋមន្ត្រី​ការបរទេស​អ៊ីរ៉ង់​លោក ចា​វ៉ាត ហ្សារី​ហ្វ

​លោក​ហ្សារី​ហ្វ បាន​និយាយថា​« បើ​ការ​ល្បាត​របស់​B-52​របស់​អ្នក​ដើម្បី​បំភិតបំភ័យ​ឬ​ព្រមាន​អ៊ីរ៉ង់ យក​ល្អ​អ្នក​គួរ​ចំណាយ​លុយ​រាប់​ពាន់​លាន​ទាំងនេះ​ទៅ​លើ​សុខភាព​អ្នក​បង់ពន្ធ​របស់​អ្នក​…​។​នៅពេល​​យើង​មិន​ដែល​បានចាប់ផ្តើម​សង្គ្រាម​ណាមួយ​នៅក្នុង​រយៈពេល​ជាង​២០០​ឆ្នាំ​មកនេះ យើង​ក៏​មិន​ខ្លាច​កំទេច​ពួក​ឈ្លានពាន​ដែរ​…»​។​

​សម្តី​របស់​ហ្សារី​ហ្វ បាន​កើត​ឡើង​ក្រោយ​បញ្ជាការ​កណ្តាល CENTCOM អាម៉េរិក​បាន​សរសេរ​បង្ហោះ​ថា​យន្តហោះ​B-52​បាន​ធ្វើ​ការហោះ​ល្បាត​នៅ​តំបន់​មជ្ឈិមបូព៌ា​លើក​ទី​២​នៅ​ឆ្នាំ​២០២១ ដើម្បី​ជា​ផ្នែក​​សំខាន់​នៃ​ស្ថានភាព​ការពារ​ខ្លួន​របស់​CENTCOM​។​

CENTCOM​បាន​និយាយថា ការ​ល្បាត​នេះ​ជា​បេសកកម្ម​ទី​៥​នៃ​កងកម្លាំង​កា​ងារ​របស់​យន្តហោះ​ទម្លាក់​គ្រាប់បែក​នៅ​មជ្ឈិមបូព៌ា​នៅ​ប៉ុន្មាន​ខែ​មកនេះ​។​

​មុននេះ​ក៏​មាន​សេចក្តីរាយការណ៍​ថា យន្តហោះ​B-52​ចំនួន​២​គ្រឿង​ត្រូវ​គេ​ឃើញ​ហោះ​នៅក្នុង​ដែនអាកាស​អ៊ីស្រាអែល ឆ្ពោះទៅ​កាន់​ឈូង​សមុទ្រ​ពែ​ក្ស​។​

​វត្តមាន​យោធា​អាម៉េរិក​នៅ​មជ្ឈិមបូព៌ា​បាន​បង្ក​ការព្រួយបារម្ភ​នៅ​អ៊ីរ៉ង់​ដែល​ទាមទារ​អោយ​រដ្ឋាភិបាល​ក្រុង​វ៉ាស៊ីនតោន​បញ្ឈប់​«​ការ​ផ្សងព្រេង​ក្រៅ​ដែនដី​»​និង​ឈប់​អ្វី​ដែល​រដ្ឋាភិបាល​ក្រុងតេអេ​រ៉ង​ពណ៌នា​​ថា​ជា​«​គោលនយោបាយ​ជ្រៀតជ្រែក​និង​សាប​ព្រួស​ការបែកបាក់​ក្នុងចំណោម​ប្រទេស​នៅក្នុង​តំបន់​»​។​

​សូមបញ្ជាក់​ថា វត្តមាន​យោធា​អាម៉េរិក​រយៈពេល​យូរ​នៅ​មជ្ឈិមបូព៌ា​បាន​កើនឡើង​ជា​ថ្មី​ក្រោយ​ពី​ការធ្វើឃាត​ឧត្តមសេនី​យ៍​អ៊ីរ៉ង់​ម្នាក់​កាលពី​ខែ​មករា​ឆ្នាំ​២០២០​តាម​បញ្ជា​របស់​ប្រធានាធិបតី​ត្រាំ ដោយ​រដ្ឋា​​ភិបាល​ក្រុង​វ៉ាស៊ីនតោន​បាន​បញ្ជូន​យន្តហោះ​និង​នាវាចម្បាំង​បន្ថែម​ចូលក្នុង​តំបន់​។​នៅ​ខែ​នេះ ក្រសួង​ការពារជាតិ​អាម៉េរិក​បាន​បញ្ជា​អោយ​នាវា​ដឹក​យន្តហោះ USS Nimitz​បន្ត​នៅ​មជ្ឈិមបូព៌ា​បន្ទាប់​​ពី​បញ្ជូន​វា​ទៅ​កាន់​តំបន់​នេះ​កាលពី​ខែ​មេសា​ឆ្នាំមុន​ចំពេល​មាន​សញ្ជា​គំរា​មពី​អ៊ីរ៉ង់​៕

 

 

ទីតាំងផ្សាយពាណិជ្ជកម្ម

- Advertisment -

Most Popular