Home ព័ត៌មានសំខាន់ៗ អាកាសធាតុ​ត្រ...

អាកាសធាតុ​ត្រជាក់​ខ្លាំង​ត្រឡប់​មកដល់​ជាថ្មី​ម្តងទៀត​

ដោយ​: ប​.​ខុន / ភ្នំពេញ​: អាកាសធាតុ​ត្រជាក់​ខ្លាំង នឹង​មកដល់​នៅ​យប់​ថ្ងៃទី​១៨​និង ទី​១៩​ខែ មករា​ឆ្នាំ​២០២១ ហើយ​នៅ​ចុង​សប្តាហ៍​នេះ អាច​នឹង​ភ្លៀង​ធ្លាក់​តិចតួច​នៅលើ​ផ្នែក​ខាងត្បូង នៃ​ប្រទេស​កម្ពុជា ជាពិសេស​នៅ​តំបន់​មាត់សមុទ្រ ដោយសារ​ឥទ្ធិពល​សម្ពាធ​ទាប​មួយ រុញ​មកពី​សមុទ្រ​ចិន​ខាងត្បូង​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ​ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​១៨​ខែមករា​ឆ្នាំ​២០២១​ថា អាកាសធាតុ​ត្រជាក់​លើក​ទី​៤ នៅក្នុង​រដូវរំហើយ​នេះ បាន​មកដល់​ទៀតហើយ ដោយ​ការចុះ​ត្រជាក់​ខ្លាំង​នឹង​កើត​មាននៅ​យប់​ថ្ងៃទី​១៨​និង​១៩​ខែមករា គឺ​ត្រជាក់​ដូច​ការ ត្រជាក់​លើក​ទី​៣​កន្លងទៅ ដែល​នៅ​កន្លែង​ខ្លះ​សីតុណ្ហភាព​អប្បបរមា បាន​ចុះ​ដល់​រង្វង់​៨ អង្សា​សេ​។​

​អ្នកនាំពាក្យ​ក្រសួង​ជំនាញ​ខាងលើ​បាន​បញ្ជាក់ថា ធាតុអាកាស​ត្រជាក់​ខ្លាំង កើតមានឡើង​នៅ​តំបន់​ជួរ​ភ្នំ និង​តំបន់​ខ្ពង់រាប​ភាគ​ឦសាន​។ ឯ​តំបន់​វាលទំនាប ក៏​ត្រជាក់​ខ្លាំង​ដែរ តែ​ដល់​ថ្ងៃទី​២១​ខែមករា សីតុណ្ហភាព​ចាប់ផ្តើម​កើន​ឡើងវិញ​បន្តិច ដោយសារ​ឥទ្ធិពល​សម្ពាធ​ទាប​រុញ​ខ្លាំង​មកពី​សមុទ្រ​ចិន​ខាងត្បូង​។​

​លោក ចាន់ យុ​ត្ថា និយាយ​ឱ្យដឹងទៀតថា សម្ពាធ​ទាប​ដែល​បាន​ដើរកាត់​លើ ប្រទេស​ហ្វីលីពីន​ចូលក្នុង​សមុទ្រ​ចិន​ខាងត្បូង រួច​ងាក​ទៅលើ​(​ជើង​) រក​កោះ​តៃវ៉ាន់ នឹង​បង្កឱ្យមាន​ភ្លៀង​ធ្លាក់​នៅលើ​ផ្នែក​ខាងត្បូង នៃ​ប្រទេស​កម្ពុជា ពិសេស​នៅ​តំបន់ មាត់សមុទ្រ​នា​ចុង​សប្តាហ៍​នេះ​។ សីតុណ្ហភាព​ចាប់ផ្តើម​ងើបឡើង​វិញ នៅ​អំឡុង​ថ្ងៃទី​២១​ខែមករា​នេះ គឺ​ឡើង​ដោយ​សន្សឹមៗ​៕​srn

ទីតាំងផ្សាយពាណិជ្ជកម្ម

- Advertisment -

Most Popular