Home ព័ត៌មានជាតិ រាជធានី​ភ្នំព...

រាជធានី​ភ្នំពេញ​នឹងមាន​រថយន្ត​ពន្លត់​អគ្គិភ័យ​បំពាក់​ដោយ​កាំជណ្តើរ​កម្ពស់​៤០​ម៉ែត្រ​មួយគ្រឿង ក្រោម​ជំនួយ​របស់​ប្រទេស​ជប៉ុន​

ដោយ​៖​រ៉ា​ម៉ន / ភ្នំពេញ​៖ រាជរដ្ឋាភិបាល​ជប៉ុន​នឹង​ផ្តល់​ថវិកា​ចំនួន ២ ២៧,៧៣៦​ដុល្លារ​អាមេរិក សម្រាប់​ការដាក់​ឲ្យ​ប្រើប្រាស់​នូវ​រថយន្ត​ពន្លត់​អគ្គិភ័យ​ដែល​បំពាក់​ដោយ​កាំជណ្តើរ​កម្ពស់​៤០ ម៉ែត្រ ចំនួន​មួយគ្រឿង​។ រថយន្ត​ពន្លត់​អគ្គិភ័យ​ប្រភេទ​បែបនេះ នឹង​ក្លាយជា​រថយន្ត​ពន្លត់​អគ្គិភ័យ​លើកដំបូង​គេ និង​មិន​ធ្លាប់មាន​ដែល​បានដាក់​ឲ្យ​ប្រើប្រាស់ នៅ​រាជធានី​ភ្នំពេញ​។​

​លោក មិ​កា​បំ ម៉ាសា​ហ៊ី​រ៉ូ ឯកអគ្គរាជទូត​វិសាមញ្ញ និង​ពេញ​សមត្ថភាព​របស់​ប្រទេស​ជប៉ុន ប្រចាំ​ព្រះរាជាណាចក្រ​កម្ពុជា ក្នុង​ពិធី​ចុះហត្ថលេខា​លើ​កិច្ចសន្យា​ផ្តល់​ជំនួយឥតសំណង សម្រាប់​គម្រោង​ទ្រង់ទ្រាយ​តូច​សន្ដិសុខ​មនុស្សជាតិ KUSANONE ជាមួយ​លោក​ឃួ​ង ស្រេង អភិបាល​រាជធានី​ភ្នំពេញ នៅ​ព្រឹក​ថ្ងៃទី​១៨​មករា​២០២១ នេះ​បាន​មានប្រសាសន៍​លើកឡើងថា​៖ ចាប់តាំងពី​ឆ្នាំ​១៩៩១ បន្ថែម​លើ​គម្រោង​ឥណទាន​និង​ជំនួយឥតសំណង​ខ្នាត​ធំ​រដ្ឋាភិបាល​ជប៉ុន បាននិងកំពុង​អនុវត្ត​កម្មវិធី KUSANONE នៅ​កម្ពុជា ដើម្បី​ជួយ​ដល់​អាជ្ញាធរ​មូលដ្ឋាន និង​អង្គការក្រៅរដ្ឋាភិបាល​ក្នុងការ​អនុវត្ត​គម្រោង​របស់​ពួកគាត់​។ KUSANONE មានន័យថា “​មូលដ្ឋាន​” ក្នុង​ភាសា​ជប៉ុន​។ នៅក្នុង​រយៈពេល​បី​ទសវត្សរ៍​ចុងក្រោយ​នេះ​ស្ថានទូត​ជប៉ុន ប្រចាំ​ប្រទេស​កម្ពុជា បាន​ចូលរួមចំណែក​ក្នុង​គម្រោង​ជាង​៦០០​តាមរយៈ​ជំនួយឥតសំណង KUSANONE ។​

​លោក​បន្តថា​៖ គម្រោង​ទាំងនេះ បាន​ចូលរួមចំណែក​ដោយផ្ទាល់ ក្នុងការ​លើកកម្ពស់​គុណ​ភាព​នៃ​ជីវភាព​របស់​ប្រជាជន​កម្ពុជា​នៅ​កម្រិត​មូលដ្ឋាន ហើយ​គម្រោង​ដែល​បាន​ចុះហត្ថលេខា​នេះ​មាន​ដូចខាងក្រោម​៖ ក្រោម​គម្រោង​រដ្ឋបាល​រាជធានី​ភ្នំពេញ រាជរដ្ឋាភិបាល​ជប៉ុន​នឹង​ផ្តល់​ថវិកា​ចំនួន ២ ២៧,៧៣៦​ដុល្លារ​អាមេរិក សម្រាប់​ការដាក់​ឲ្យ​ប្រើប្រាស់​នូវ​រថយន្ត​ពន្លត់អគ្គីភ័យ​ដែល​បំពាក់​ដោយ​កាំជណ្តើរ​កម្ពស់​៤០ ម៉ែត្រ ចំនួន​មួយគ្រឿង ដែល​នឹង​ក្លាយជា​រថយន្ត​ពន្លត់អគ្គីភ័យ​ប្រភេទ​បែបនេះ​លើកដំបូង​គេ ដែល​មិន​ធ្លាប់​ដាក់​ឲ្យ​ប្រើប្រាស់ នៅ​រាជធានី​ភ្នំពេញ​។

​លោក​បញ្ជាក់ថា​៖ ជប៉ុន​ក៏​នឹង​ផ្គត់ផ្គង់​រថយន្ត​ពន្លត់អគ្គីភ័យ​ដែល​បំពាក់​ដោយសារ​ធាតុគីមី ចំនួន​មួយគ្រឿង និង​ឡានទឹក​ពន្លត់អគ្គីភ័យ ចំនួន​ពីរ​គ្រឿង សម្រាប់​ប្រើប្រាស់​នៅក្នុង​រាជធានី​ភ្នំពេញ​។ លើសពីនេះ​ទៀត មូលនិធិ​ជំនួយឥតសំណង​នេះ នឹង​ផ្តល់​ហិរញ្ញវត្ថុ​សម្រាប់​កម្មវិធី​បណ្តុះបណ្តាល​ស្តីពី​ប្រតិបត្តិការ និង​ការថែរក្សា​ឧបករណ៍​ពន្លត់អគ្គីភ័យ​នេះ​។ កម្មវិធី​បណ្តុះបណ្តាល​នេះ នឹង​ជួយ​អ្នក​ពន្លត់អគ្គីភ័យ​ជនជាតិខ្មែរ​ឆ្លើយតប​ចំពោះ​អគ្គិភ័យ​នៅក្នុង​អគារ​ខ្ពស់ៗ និង​ឧប្បត្តិហេតុ​នានា​ដែល​ពាក់ព័ន្ធ​នឹង​វត្ថុ​ធាតុ​ដែលមាន​គ្រោះថ្នាក់​ខ្ពស់ ដោយ​មានន័យថា​ពួកគេ នឹង​អាចឆ្លើយតប​ឲ្យ​បាន​លឿន និង​មាន​ប្រសិទ្ធភាព​។ ជំនួយ​នេះ នឹង​ជួយ​លើកកម្ពស់​សុវត្ថិភាព​និង​ជួយ​ការពារ​ទ្រព្យសម្បត្តិ​របស់​ប្រជាជន​ប្រមាណ ៤០០,០០០​នាក់ នៅ​រាជធានី​ភ្នំពេញ ក៏ដូចជា​ភ្ញៀវទេសចរ និង​អ្នកដំណើរ​ជំនួញ​មកពី​ជុំវិញ​ពិភពលោក​ផងដែរ​។​ស្រប​ពេលដែល​កិច្ចសន្យា​ផ្តល់​ជំនួយឥតសំណង​នេះ​ត្រូវបាន​ចុះហត្ថលេខា អនុស្សារណៈ​យោគយល់​គ្នា រវាង​កងកម្លាំង​ពន្លត់អគ្គីភ័យ​រាជធានី​ភ្នំពេញ និង​ក្រុមហ៊ុន Safety Sakura Service Co., Ltd.​ត្រូវបាន​ចុះហត្ថលេខា​ក្នុង​គោលបំណង​ពង្រឹង​ទំនាក់ទំនង និង សមត្ថភាព​បន្ថែមទៀត​។​

​លោក​បន្តទៀតថា​៖ តាម​អនុស្សារណៈ​នេះ រដ្ឋបាល​រាជធានី​ភ្នំពេញ កងកម្លាំង​ពន្លត់អគ្គីភ័យ​នៃ​ព្រះរាជាណាចក្រ​កម្ពុជា​និង​ក្រុមហ៊ុន Safety Sakura Service Co., Ltd. នឹង​សហការគ្នា​ដើម្បី​សំរេចបាន​នូវ​ការធ្វើ​ឲ្យ​ប្រសើរឡើង​នូវ​សមត្ថភាព​ពន្លត់អគ្គីភ័យ និង​ជួយសង្គ្រោះ របស់​កង​ពន្លត់អគ្គីភ័យ​រាជធានី​ភ្នំពេញ​។​
​លោក​បន្ត​ទៀយ​ត​ថា​៖​នៅពេល​ថ្មីៗ​នេះ​ប្រទេស​កម្ពុជា​បាននិងកំពុង​មានការ​អភិវឌ្ឍ​យ៉ាង​ឆាប់រហ័ស​។​ទន្ទឹមនឹងនេះ​ក៏មាន​បញ្ហា​ប្រឈម​មួយចំនួន​ដែល​ត្រូវ​ដោះស្រាយ​។ ប្រទេស​ជប៉ុន​នឹង​បន្ត​ចូលរួមចំណែក​ក្នុងការ​ដោះស្រាយ​បញ្ហា​ប្រឈម​ទាំងនោះ តាមរយៈ​គ្រោងការណ៍​សហប្រតិបត្តិកា​រ​សេដ្ឋកិច្ច​និង​អភិវឌ្ឍន៍ ផ្សេងៗ រួមទាំង​គូ​សាណូ​ណ៌​។​គួរ​បញ្ជាក់ថា​៖​ដូច្នេះ​អគារ​កម្ពស់​៤០​ម៉ែត្រ​លែង​ព្រួយ​ពេល​មាន​អគ្គិភ័យ​ហើយ​។​

​ក្នុងឱកាស​នោះ លោក ឃួ​ង ស្រេង អភិបាល​រាជធានី​ភ្នំពេញ​បាន​ថ្លែង​ការ​អរគុណ​យ៉ាង​ជ្រាលជ្រៅ​ចំពោះ​ប្រទេស​ជប៉ុន ដែលជា​និច្ច​ជា​កាល​តែងតែ​ជួយ​ជា​ជំនួយ​មក​កម្ពុជា ដោយ​ឥត​សំណង​ពិសេស​នៅ​រាជធានី​ភ្នំពេញ ជប៉ុន​បាន​ជួយ​ជំនួយ​ជាច្រើន​មិន​ថា ថវិកា​និង​បច្ចេកទេស​នោះទេ ។​ជាក់ស្តែង​ជប៉ុន​បាន​ជួយ​លើ​ប្រព័ន្ធ​ការពារ​ទឹកជំនន់​ដែល​មកដល់ពេលនេះ​បាន​ឈានដល់​គម្រោង​ការពារ​ទឹកជំនន់​ជំហាន​ទី​៤​ហើយ​។​លោក​ឃួ​ង ស្រេង​បន្តថា​៖ កម្ពុជា​និង​ជប៉ុន​បាន​ចងសម្ព័ន្ធ​មេត្រីភាព​ជាមួយ​ប្រទេស​កម្ពុជា​យើង​ចំនួន​៦២​ឆ្នាំ​ហើយ​ហើយ​ទំនាក់ទំនង​នេះ​កម្ពុជា​បាន​ផ្លែផ្កា​ជាច្រើន​ពី​ប្រទេស​ជប៉ុន ៕​

ទីតាំងផ្សាយពាណិជ្ជកម្ម

- Advertisment -

Most Popular