Home ព័ត៌មានសំខាន់ៗ រដ្ឋមន្ត្រីកា...

រដ្ឋមន្ត្រីការបរទេសៈ​លទ្ធផល​នៃ​ការ​ប្រជែង​គ្នា​រវាង​មហាអំណាច​អាមេរិក និង​ចិន

ដោយៈ​មុនី​រ័ត្ន​/​ភ្នំពេញៈ ប្រមុខ​ការទូត​កម្ពុជា លោក​ឧបនាយករដ្ឋមន្ត្រី ប្រាក់ សុខុន​បាន​បញ្ជាក់ថា​ការ​ប្រជែង​គ្នា​រវាង​មហាអំណាច​អាម៉េរិក និង​ចិន​ដែល​នា​ដើម​អាណត្តិ​របស់​ប្រធានាធិបតី​ត្រាំ​(Trump)​បានចាប់ផ្តើម​ពី​ការបង្ក​សង្គ្រាម​ពាណិជ្ជកម្ម​នោះបាន​រីក​រាលដាល​ដល់​សមរ​ភូមិ ផ្សេងទៀត​មាន សេដ្ឋកិច្ច វិទ្យាសាស្ត្រ បច្ចេកវិទ្យា យោធា ចារកម្ម ល្បែង​ទម្លាក់កំហុស និង​បញ្ហា​សិទ្ធិមនុស្ស លទ្ធិប្រជាធិបតេយ្យ និង​មនោគមវិជ្ជា​។​

រូបថតៈប្រមុខ​ការទូត​កម្ពុជា លោក​ឧបនាយករដ្ឋមន្ត្រី ប្រាក់ សុខុន

​លោក​បន្ថែមថា ទោះបីជា​មានការ​ព្យាករ​ថា ប្រធានាធិបតី​ជាប់ឆ្នោត​ថ្មី​របស់​អាម៉េរិក (​លោក ចូ បៃ​ដិ​ន​)​អាច​ផ្លាស់ប្តូរ​ទិសដៅ​គោ​លន​យោ បាយ​ការបរទេស ពី «​អាម៉េរិក​ជា​ចម្បង​» មក​ផ្តោតលើ «​ប្រព័ន្ធ​ពហុភាគី​និយម​» វិញ​ក៏ដោយ ក៏​ពុំមាន​សញ្ញាណ​ណាមួយ​បង្ហាញថា ការ​ប្រជែង​ឥទ្ធិពល និង​អំណាច​នេះ​បាន​ថមថយ​ចុះ​នោះទេ​។ ផ្ទុយទៅវិញ វា​អាច​បន្ថែម​នូវ​ថាមវន្ត​កាន់តែខ្លាំង និង​បង្ក​នូវ​ការលំបាក ការ​ប្រឈម និង​កង្វល់​ស្មុគស្មាញ​ដល់​ប្រទេស​តូចៗ ដូច​កម្ពុជា ទាំង​នយោបាយ ទាំង​សេដ្ឋកិច្ច​ផង​។​

​ការបញ្ជាក់​របស់​ប្រមុខ​ការទូត​កម្ពុជា​បាន​ធ្វើឡើង​នៅក្នុង​ពិធី​ប្រកាស​ដាក់​ឲ្យ​ប្រើប្រាស់​យុទ្ធសាស្ត្រ​ការទូត​សេដ្ឋកិច្ច​ឆ្នាំ​២០២១-២០២៣ នៅ​ថ្ងៃទី​១៨ ខែមករា​នេះ​។​លោក​ឧបនាយករដ្ឋមន្ត្រី ប្រាក់ សុខុន បាន​សង្កត់ធ្ងន់ថា អ្វីដែល​ធ្ងន់ធ្ងរ​នោះ​គឺ​ការរួមបញ្ចូល​គ្នា​នៃ​កត្តា​ទាំងពីរ ក្នុងពេល​តែមួយ​។ ពោលគឺ​រដ្ឋាភិបាល​ត្រូវ​ចាត់វិធានការ​ប្រយុទ្ធប្រឆាំង​នឹង​ជំងឺ​កូ​វីដ​ផង និង​ដោះស្រាយ​បញ្ហា​ប្រឈម​ខាង​សេដ្ឋកិច្ច និង​សង្គម ដែល​បណ្ដាលមកពី​ការ​រាតត្បាត​នៃ​ជំងឺ​នេះ​ផង​។​ធ្ងន់ធ្ងរ​បំផុត​ទៅទៀត​សម្រាប់​កម្ពុជា​គឺ​ថែម​ពីលើ​អ​ម្រែ​ក​ទាំងសងខាង​ស្មា​របស់ យើង គឺ​ការដក​របប​អនុគ្រោះ​ពន្ធ​ក្រោម​ប្រព័ន្ធ​អ៊ី​ប៊ី​អេ​( EBA)២០ ភាគរយ​។ “​ទណ្ឌកម្ម​” ដែល​អ៊ី​យូ​( EU)​បានសម្រេច​ដាក់​មក លើ​កម្ពុជា​ក្នុង​គ្រា​ដែល​ប្រទេស​តូច​របស់​យើង​កំពុង​ប្រមូល​កិច្ចប្រឹងប្រែង​គ្រប់យ៉ាង​ធនធាន​គ្រប់​ប្រភេទ​និង​មធ្យោបាយ​ចម្រុះ​ដើម្បី​ទប់ទល់​នឹង​ការ​រាលដាល​នៃ​ជំងឺ​កូ​វីដ​-១៩ ផង និង​ទប់​កុំឱ្យ​សេដ្ឋកិច្ច​ដួល​រំលំ​ផង​ត្រូវបាន​សម្តេច​តេ​ជោ​នាយករដ្ឋមន្ត្រី​ហៅ​យ៉ាងច្បាស់​ក្នុង​សុន្ទរកថា ទៅកាន់​មហាសន្និបាត អ​.​ស​.​ប​. លើក​ទី​៧៥ ថា​ជា “​ភាពអយុត្តិធម៌​”​។​

រូបថតៈ​ពិធី​ប្រកាស​ដាក់​ឲ្យ​ប្រើប្រាស់​យុទ្ធសាស្ត្រ​ការទូត​សេដ្ឋកិច្ច​ឆ្នាំ​២០២១-២០២៣ 

​សម្តេច​បាន​ថ្លែងថា​នាឱកាស​នោះ​ថា «​រឿង​អយុត្តធម៌​នេះ រំលឹក​ខ្ញុំ​អំពី “​ស្លាកស្នាម​” ប្រវត្តិសាស្ត្រ​។ ប្រមាណ​ជាង​៤០​ឆ្នាំមុន កម្ពុជា​ត្រូវបាន​រំដោះ​ចេញពី​របប​ប្រល័យពូជសាសន៍​ខ្មែរក្រហម​ដែល​ប្រជាជន​កម្ពុ​ជាជាង​២​លាន​នាក់​បាន​បាត់បង់​ជីវិត​នៅក្នុង​របប​ដ៏​ព្រៃផ្សៃ នេះ​។ អ្នក​រស់រានមានជីវិត​ទាំង​បាក់​ស្មារតី និង​សល់​តែ​បាត​ដៃទទេ គឺជា​អ្នក​ដែល​ស្តារ​ប្រទេសជាតិ​ពី​គំនរ​ផេះផង់​។​អ្វីដែល​គួរឱ្យ​ហួស ចិត្ត​គឺ​អ្នក​ដែល​រស់រានមានជីវិត​ទាំងនោះ​បែរជា​ទទួលរង​ទណ្ឌកម្ម​ពី​សមាជិក​ភាគច្រើន​នៃ​អង្គការសហប្រជាជាតិ​ដែល​ថែមទាំង​បានអនុញ្ញាត​ឱ្យ​មេ​ពិឃាត​ខ្មែរក្រហម​កាន់​អាសនៈ​របស់​កម្ពុជា​នៅ​អង្គការសហប្រជាជាតិ​ទៅវិញ​។​រដ្ឋាភិបាល​ទាំងនោះ​ដែល​បាន​ផ្សព្វផ្សាយ​ឥត​ឈប់ ឈរ​អំពី​លទ្ធិ​ប្រជា​ធិ​ប​ត្យេ និង​សិទ្ធិមនុស្ស គឺជា​អ្នក​ដែល​បាន​រារាំង​ប្រជាជន​យើង​ពី​ការទទួលបាន​នូវ​សិទ្ធិ​មូលដ្ឋាន​បំផុត​របស់​មនុស្ស គឺ ចំណីអាហារ សុខុមាលភាព ការអប់រំ ផ្ទះសម្បែង ការអភិវឌ្ឍ និង​ជាពិសេស​សុខសន្តិភាព អស់​រយៈពេល​ជាង​១២​ឆ្នាំ​។​

​លោក​ឧបនាយករដ្ឋមន្ត្រី​បាន​លើកឡើងថា ការដែល​សហភាព​អឺរ៉ុប​ដកហូត EBA មួយផ្នែក​ពី​កម្ពុជា​នៅពេលដែល​ប្រទេស​នេះ​កំពុង ប្រឹងប្រែង​តស៊ូ​ជម្នះ​ជំងឺ​រាតត្បាត​កូ​វីដ​១៩​គឺជា​រឿង​ច្រំ​ដែល​នៃ​ប្រវត្តិសាស្ត្រ​។​ទោះបីយ៉ាងណា​ក៏ដោយ​ក៏​កម្ពុជា​នៅតែ​ប្តេជ្ញាចិត្ត​យ៉ាង​ពេញទំហឹង ដូចដែល​ខ្លួន​ធ្លាប់​បានធ្វើ​អស់​រយៈពេល​៤០​ឆ្នាំ​កន្លងមកនេះ ក្នុងការ​ការពារ​នូវ​អ្វីដែល​ខ្លួន​ជឿជាក់ថា​ជា​មាគ៌ា​ដ៏​ត្រឹមត្រូវ នោះ​គឺ​ការពារ​អធិបតេយ្យ​ជាតិ​និង​ថែរក្សា​សន្តិភាព​ដែល​កសាងបាន​យ៉ាង​លំបាកលំបិន​និង​ទទួល​បានការ​សាទរ​ពេញទំហឹង​ដោយ​ប្រជាជាតិ​កម្ពុជា ទាំងមូល ដែល​បាន​ឆ្លងកាត់​សោកនាដកម្ម​ដ៏​ខ្លោចផ្សា​បំផុត និង​កំពុងតែ​ងើបឈរ​ឡើងជា​ប្រជាជាតិ​មួយ ស្មើមុខ​មាត់ ស្មើភាព និង​ស្មើ​សិទ្ធិ ជាមួយ​បណ្តា​ប្រទេស​នៅក្នុង​តំបន់ និង​សក​លោក​៕​សរន​

រូបថតៈ​ពិធី​ប្រកាស​ដាក់​ឲ្យ​ប្រើប្រាស់​យុទ្ធសាស្ត្រ​ការទូត​សេដ្ឋកិច្ច​ឆ្នាំ​២០២១-២០២៣ 

ទីតាំងផ្សាយពាណិជ្ជកម្ម

- Advertisment -

Most Popular