Home ព័ត៌មានសំខាន់ៗ ចិន​ផ្តល់​អំណ...

ចិន​ផ្តល់​អំណោយ​សម្ភារៈ​បោសសំអាត​មីន​ដល់​កម្ពុជា​

ដោយ​: យោធិន / ភ្នំពេញ​: រាជរដ្ឋាភិបាល​កម្ពុជា​តាមរយៈ​អាជ្ញាធរ​មីន បានទទួល​នូវ​សម្ភារៈ​ជា​ជំនួយ​មនុស្សធម៌​វិស័យ​សកម្មភាព​មីន ពី​សាធារណរដ្ឋ​ប្រជាមានិត​ចិន ក្នុង​គោលបំណង​រួមចំណែក​ជួយ​ដល់​កម្ពុជា បង្កើនបាន​នូវ​សក្តានុពល​លើ​វិស័យ​បោសសំអាត​មីន​។​

​ពិធី​ផ្ទេរ​ប្រគល់​នា​ព្រឹក​ថ្ងៃទី​១៩ ខែមករា ឆ្នាំ​២០២១ នៅ​ទីស្នាក់ការ​អាជ្ញាធរ​មីន​ក្រោម​វត្តមាន​លោក​ទេស​រដ្ឋ​មន្តី​លី ធុជ តំណាង​ដ៏​ខ្ពង់ខ្ពស់​សម្តេច​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​ប្រធាន​អាជ្ញាធរ​មីន អនុប្រធាន​ទី​១ អាជ្ញាធរ​មីន​និង​លោក​Wang Wentian ឯកអគ្គរដ្ឋទូត​វិសាមញ្ញ​និង​ពេញ​សមត្ថភាព​នៃ​សាធារណរដ្ឋ​ប្រជាមានិត​ចិន​ប្រចាំ​នៅ​កម្ពុជា ជា​អធិបតី​ក្នុង​ពិធី​ប្រគល់​-​ទទួល​នូវ​សម្ភារៈ​ជា​ជំនួយឥតសំណង​របស់​រដ្ឋាភិបាល និង​ប្រជាជន​ចិន ជូន​ចំពោះ​រាជរដ្ឋាភិបាល​កម្ពុជា តាមរយៈ​អាជ្ញាធរ​មីន​។

​សូមបញ្ជាក់ថា ពិធី​ប្រគល់​-​ទទួល​នេះ មានការ​អញ្ជើញ​ចូលរួម​ពី​តំណាង​ក្រសួងការបរទេស​និង​សហប្រតិបត្តិការ​អន្តរជាតិ តំណាង​ទី​ស្តី​គណៈរដ្ឋមន្ត្រី មន្ត្រី​ស្ថានទូត​ចិន​ប្រចាំ​នៅ​កម្ពុជា និង​ថ្នាក់ដឹកនាំ​អាជ្ញាធរ​មីន​ជាច្រើនរូប​ផងដែរ​។​

​ថ្លែង​ក្នុងនាម​រាជរដ្ឋាភិបាល​កម្ពុជា លោក​ទេសរដ្ឋមន្ត្រី​លី​ធុជ​បាន​ថ្លែងអំណរគុណ​យ៉ាង​ជ្រាលជ្រៅ និង​វាយតម្លៃ​ខ្ពស់​ជូន​ចំពោះ​រដ្ឋាភិបាល និង​ប្រជាជន​ចិន ដែលជា​និច្ចកាល​តែងតែ​យកចិត្តទុកដាក់ និង​គាំទ្រ​ជួយ​ដល់​ការអភិវឌ្ឍ​នៅ​កម្ពុជា​គ្រប់​កាលទេសៈ ក្នុងនោះ​រួមមាន​ទាំង​ការផ្តល់​ជំនួយឥតសំណង​ដ៏​ថ្លៃថ្លា សម្រាប់​វិស័យ​សកម្មភាព​មីន​មនុស្សធម៌ ទាំង​សម្ភារ​បច្ចេកទេស ហិរញ្ញវត្ថុ និង​បណ្តុះបណ្តាល​ធនធានមនុស្ស ក្រោម​ការខិតខំ​ប្រឹងប្រែង​របស់ លោក Wang Wentian ឯកអគ្គរដ្ឋទូត​នៃ​សាធារណៈរដ្ឋ​ប្រជាមានិត​ចិន​ប្រចាំ​នៅ​កម្ពុជា ក្នុងការ​ចូលរួម​និង​សម្របសម្រួល​ក្នុង​វិស័យ​សកម្មភាព​មីន​នៅ​កម្ពុជា​។

​លោក​ទេសរដ្ឋមន្ត្រី​បាន​បន្តថា កម្ពុជា​នៅតែ​ត្រូវការ​ជា​ចាំបាច់​នូវ​ជំនួយ​ដ៏​សប្បុរស​របស់​មហាមិត្ត​ចិន សម្រាប់​ការងារ​បោសសម្អាត​មីន​នៅ​កម្ពុជា​។ ជាមួយនឹង​ការរួមចំណែក​ជា​ជំនួយ​មនុស្សធម៌​វិស័យ​សកម្មភាព​មីន​ពី​មិត្ត​ចិន​ជា​បន្តបន្ទាប់ រាជរដ្ឋាភិបាល​កម្ពុជា ក្រោម​ការដឹកនាំ​របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា មាន​ជំនឿ​យ៉ាង​មុតមាំ​ថា កម្ពុជា នឹង​ទទួលបាន​ជោគជ័យ ក្នុងការ​អនុវត្ត​នូវ​ផែនការ​យុទ្ធសាស្ត្រ​ជាតិ​សកម្មភាព​មីន ២០១៨-២០២៥ គឺ​ឆ្ពោះទៅរក​កម្ពុ​ជាមួយ​ដែល​គ្មាន​មីន​ឆ្នាំ​២០២៥ ជាពិសេស​ចូលរួម​ដល់​ការជួយ​សង្គ្រោះ​ជីវិត​មនុស្ស ការចូលរួម​កាត់បន្ថយ​ភាពក្រីក្រ និង​ការកសាង​ជីវភាព​រស់នៅ​របស់​ប្រជាពលរដ្ឋ​ឲ្យ​កាន់តែ​ប្រសើរឡើង​។​

​លោក Wang Wentian បាន​មានប្រសាសន៍ថា ប្រទេស​ចិន មាន​សេចក្តី​សប្បាយរីករាយ និង​ពេញចិត្ត​ក្នុងការ​ចូលរួម​ជាមួយ​រាជរដ្ឋាភិបាល​កម្ពុជា តាមរយៈ​អាជ្ញាធរ​មីន សំដៅ​គាំទ្រ​ដល់​វិស័យ​បោសសម្អាត​មីន​មនុស្សធម៌​នៅ​កម្ពុជា ហើយ​ប្រទេស​ចិន នឹង​បន្ត​គាំទ្រ​ទាំង​សម្ភារៈ ថវិកា និង​ការបណ្តុះបណ្តាល​ធនធាន​មនុស្ស​ដល់​អាជ្ញាធរ​មីន ដើម្បី​ឲ្យ​កម្ពុជា​អាច​សម្រេច​នូវ​គោលដៅ​របស់ខ្លួន​គ្មាន​មីន​ឆ្នាំ​២០២៥​។​

​ឯកអគ្គរដ្ឋទូត​ចិន​បានចាត់ទុក​ការងារ​បោសសម្អាត​មីន ពិត​ជាមាន​សារៈសំខាន់​ណាស់​សម្រាប់​គាំទ្រ​ដល់​ការអភិវឌ្ឍ និង​ជួយសង្គ្រោះ​ជីវិត​មនុស្ស ហើយ​ឯកអគ្គរដ្ឋទូត នឹង​ជួយ​ជម្រុញ​ដល់​រដ្ឋាភិបាល​ប្រទេស​ចិន ឲ្យ​បន្ត​ការគាំទ្រ និង​ពិចារណា​រាល់​ការស្នើសុំ​របស់​អាជ្ញាធរ​មីន​។ លោក​ឯកអគ្គរដ្ឋទូត បាន​បន្តទៀតថាៈ​ទោះបី​ពិភពលោក​មានការ​រីក​រាលដាល​នៃ​ជម្ងឺឆ្លង​កូ​វីដ​-១៩ ប៉ុន្តែ​ការងារ​បោសសម្អាត​មីន​មនុស្សធម៌​នៅតែ​បន្ត និង​មិនមាន​ផលប៉ះពាល់​ឡើយ​។​

​ឆ្លៀត​ក្នុងឱកាស​នោះ ក្នុងនាម​រាជរដ្ឋាភិបាល​កម្ពុជា​អនុប្រធាន​ទី​១​អាជ្ញាធរ​មីន​ក៏បាន​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ​រដ្ឋាភិបាល​នៃ​សាធារណរដ្ឋ​ប្រជាមានិត​ចិន ដែល​បាន​ផ្តល់នូវ​ជំនួយ​វ៉ាក់សាំង​ជម្ងឺឆ្លង​កូ​វីដ​-១៩​លើកដំបូង​ចំនួន​មួយ​លាន​ដុស ជូន​ដល់​រាជរដ្ឋាភិបាល និង​ប្រជាជន​កម្ពុជា និង​សូម​កោតសរសើរ​មហាមិត្ត​ចិន​ចំពោះ​ការរីកចម្រើន​សេដ្ឋកិច្ច និង​ការអភិវឌ្ឍ​លើ​គ្រប់​វិស័យ​ក្នុងកំឡុងពេល​ការរីក​រាល​នៃ​ជម្ងឺ​កូ​វីដ​-១៩​នេះ​។​

​លោក​ទេសរដ្ឋមន្ត្រី​បានបញ្ជាក់​បន្តថាៈ​ជំនួយឥតសំណង​នេះ គិត​ជា​ប្រាក់​ប្រមាណ មួយ​លាន​ដុល្លារ​អាមេរិក រួមមានៈ ១/.​រថយន្ត Pick Up ចំនួន ០៨ គ្រឿង ២/.​ឧបករណ៍​រាវ​មីន ចំនួន ១៣០ គ្រឿង ៣/.​ប្រអប់​សម្ភារៈ​ចំនួន ១០០ ឈុត ៤/.​ប្រអប់​សម្ភារៈ​បំផ្ទុះ​គ្រាប់ (EOD) ចំនួន ២០ ឈុត ៥/.​សម្លៀកបំពាក់​ការពារ​ចំនួន ១០ កំ​ផ្លេ ៦/.​មួក​ការពារ​ចំនួន ១០ ៧/.​ដ្រូ​ន (UAV) ចំនួន ០៤ គ្រឿង ៨/.​ឯកសណ្ឋាន ស្បែកជើង និង​មួក ចំនួន ៥០០ កំ​ផ្លេ និង​៩/.​តង់​ចំនួន ៥០០​តង់​។​

​សូមបញ្ជាក់​បន្ថែមថា ក្រៅពី​ប្រទេស​ចិន បច្ចុប្បន្ននេះ កម្ពុជា មានការ​គាំទ្រ​ពី​ប្រទេស​ម្ចាស់ជំនួយ​ដទៃទៀត រួមមានៈ សហរដ្ឋអាមេរិក អូស្ត្រាលី អង់គ្លេស ជប៉ុន ន័​រ​វែ​ស កាណាដា អាល្លឺម៉ង់ ស្វី​ស ណូ​វែ​ល​ហ្សឺ​ឡង់ សាធារណរដ្ឋ​កូរ៉េ អៀរ​ឡង់ UNDP និង UNICEF ព្រមទាំង​មូលនិធិ អង្គការ​សង្គម​ស៊ីវិល និង​សប្បុរសជន ដល់​វិស័យ​សកម្មភាព​មីន​នៅ​កម្ពុជា ផងដែរ​។​

​សូមបញ្ជាក់​ផងដែរ គិត​ត្រឹម​ឆ្នាំ​២០២០ កម្ពុជា​បាន​បោសសម្អាត​ផ្ទៃដី​ចំនួន ២,១៣៨​គីឡូម៉ែត្រ​ក្រឡា បាន​បំផ្លាញចោល​គ្រាប់មីន​ប្រឆាំង​មនុស្ស ១,០៩៥,៧៥០​គ្រាប់ មីន​ប្រឆាំង​រថក្រោះ ២៥,៤៨៨​គ្រាប់ និង​សំណល់​ជាតិ​ផ្ទុះ​ពី​សង្គ្រាម​រាប់បញ្ចូល​ទាំង​គ្រាប់បែក​ចង្កោម ២,៨៨៥,២៩៤ គ្រាប់ ដោយមាន​អ្នកទទួលផល​៦,៣៥៧,៨៥៣​នាក់​។ ទោះបីជា​មានការ​ខិតខំ​ប្រឹងប្រែង​យ៉ាងណាក៏ដោយ ប្រទេស​កម្ពុជា នៅតែមាន​បញ្ហា​ប្រឈម​ដ៏​ធំធេង​លើ​ផ្ទៃដី​២,១៥២ គីឡូម៉ែត្រ​ក្រឡា ដែល​ក្នុងនោះ ៨៣៥ គីឡូម៉ែត្រ​ក្រឡា រង​ផលប៉ះពាល់​ដោយ​គ្រាប់មីន​៕​

ទីតាំងផ្សាយពាណិជ្ជកម្ម

- Advertisment -

Most Popular