រដ្ឋមន្ត្រីក្រសួង​កិច្ចការនារី : អំពើហិង្សា​លើ​ស្ត្រី​គឺជា​ការរំលោភបំពាន​សិទ្ធិមនុស្ស​យ៉ាងធ្ងន់ធ្ងរ​

​ដោយៈ​មុនី​រ័ត្ន​/​ភ្នំពេញៈ​រដ្ឋមន្ត្រីក្រសួង​កិច្ចការនារី​លោកស្រី​អ៊ឹង​កន្ថាផាវី​បានបញ្ជាក់​ថា​អំពើហិង្សា​លើ​ស្ត្រី​គឺជា​ការរំលោភបំពាន​សិទ្ធិមនុស្ស​យ៉ាងធ្ងន់ធ្ងរ​ដែល​រិត​ត្បិត​សិទ្ធិ និង​សេរី​ភាពជា​មូលដ្ឋាន​របស់​ស្ត្រី​។

​លោកស្រី​បានអោយដឹងថា​សកម្មភាព​ទាំងនោះ​រួមមាន​ការប្រើប្រាស់​ហិង្សា​ការគំរាមកំហែង​ការបង្ខិតបង្ខំ​ឬ​ការដកហូត​សិទ្ធិសេរីភាព​ដែល​អាច​កើត​មាននៅ​ទីសាធារណៈ ឬ​ក្នុង​ជីវិត​ឯកជន ហើយ​បុព្វហេតុ​ចម្បង​នៃ​អំពើហិង្សា​លើ​ស្ត្រី ត្រូវបាន​ទទួលស្គាល់​ជាទូទៅ​ថា បណ្តាលមកពី “​វិសមភាព​យេនឌ័រ​និង​ការរើសអើង​”​ក្នុងនោះ​ក្រុម​ស្ត្រី​ងាយ​រងគ្រោះ​មាន​ហានិភ័យ​ខ្ពស់​ក្នុងការ​ទទួលរង​នូវ​អំពើហិង្សា​ដូចជា​អំពើហិង្សា​ផ្លូវកាយ​ការ​បំពារបំពាន​ផ្លូវភេទ​និង​ការកេងប្រវ័ញ្ច​ជាដើម​។​ម្យ៉ាងវិញទៀត​ការ​មាក់ងាយ​និង​ការរើសអើង​ក្នុង​សហគមន៍​ដែល​អាច​បង្កើន​ហានិភ័យ​នៃ​អំពើហិង្សា ឬ​បញ្ហា​ប្រឈម​ក្នុងការ​ទទួលបាន​កិច្ចការពារ និង​សេវា​សំខាន់​ផ្សេងៗ​។

ការបញ្ជាក់​របស់​រដ្ឋ​មន្ត្រី​ក្រសួង​កិច្ចការនារី បាន​ធ្វើឡើង​នៅក្នុង​កម្មវិធី​ប្រកាស​ផ្សព្វផ្សាយ​ដាក់​ឲ្យ​ប្រើប្រាស់​ជា​ផ្លូវការ ផែនការ​សកម្ម​ភាពជា​តិ ស្ដីពី​ការទប់ស្កាត់​អំពើហិង្សា​លើ​ស្ដ្រី ២០១៩-២០២៣ នៅ​ព្រឹក​ថ្ងៃទី​១៩ ខែមករា ឆ្នាំ​២០២០ នៅ​សណ្ឋាគារ សូ​ហ្វី​តែ​ល ភ្នំពេញ ភូ​គី​ត្រា​។​

​លោកស្រី​អ៊ឹង​កន្ថាផាវី​បាន​បន្តថា​យោងតាម​ការស្រាវជ្រាវ​អំពី​បទពិសោធន៍​នៃ​បណ្តា​ប្រទេស​អភិវឌ្ឍន៍​មួយចំនួន​បានឱ្យដឹងថា​អំពើហិង្សា​លើ​ស្ត្រី​គឺជា​ឧបសគ្គ​រារាំង​ដល់​ការចូលរួម​របស់​ស្ត្រី​ក្នុង​កិច្ច​អភិវឌ្ឍ​ជាតិ​ហើយ​ជាការ​ដាក់បន្ទុក​ផ្នែក​សេដ្ឋកិច្ច​និង​សង្គម​យ៉ាងធ្ងន់ធ្ងរ​ដល់​រដ្ឋាភិបាល​នៃ​ប្រទេស​នីមួយៗ​ដែលនាំឱ្យ​មានការ​ខាតបង់​ថវិកា​គិត​ជា​ទឹកប្រាក់​រាប់សិប​លាន​ដុល្លារ​ដោយ​ថវិកា​ទាំងនេះ​ត្រូវបាន​ចំណាយ​លើ​សេវា​សុខភាព ការបាត់បង់​ផលិតភាព ជម្រក​សុវត្ថិភាព​សម្រាប់​ស្ត្រី​រងគ្រោះ​និង​កូនៗ សេវា​សង្គមកិច្ច​ដើម្បី​ស្តារនីតិសម្បទា​ស្ត្រី​រងគ្រោះ សេវា​ច្បាប់ និង​សេវា​ចាំបាច់​ផ្សេងៗ​ទៀត ដើម្បី​គាំទ្រ​ជនរងគ្រោះ​។​

​រដ្ឋមន្ត្រីក្រសួង​កិច្ចការនារី បាន​បន្តថា អ្វីដែល​គួរឱ្យកត់សម្គាល់​ជាង​នេះ​នៅក្នុង​បរិការណ៍​នៃ​ការរីក​រាលដាល​ជំងឺ​កូ​វីដ​១៩​នៅក្នុង​ពិភពលោក បាន​បង្ក​ឱ្យ​ករណី​អំពើហិង្សា​លើ​ស្ត្រី​មានការ​កើនឡើង​គួរឱ្យកត់សម្គាល់​ដោយ​ផ្អែក​តាម​របាយការណ៍​រប​ស់​អង្គការ​មូលនិធិ​សហប្រជាជាតិ​សម្រាប់​ប្រជាជន​(UNFPA)​ចេញផ្សាយ​កាលពី​ចុងខែ​មេសា​ឆ្នាំ​២០២០​បានឱ្យដឹងថា​ប្រសិនបើ​វិធានការ​បង្ខាំង​បន្ត​ក្នុង​រយៈពេល​៣​ខែ​ករណី​អំពើហិង្សា​ទាក់ទង​នឹង​យេនឌ័រ​នឹង​អាច​កើតមាន​បន្ថែម​រហូតដល់​ជាង​១៥​លាន​ករណី​ហើយនឹង​អាច​កើតមាន​រហូតដល់​ជាង​៣១​លាន​ករណី​បន្ថែមទៀត​សម្រាប់ រយៈពេល​៦​ខែ ក្នុងនោះ​មូលហេតុ​សំខាន់​២​យ៉ាង​ដែល​បណ្តាលឱ្យ​ករណី​អំពើហិង្សា​ទាក់ទង​នឹង​យេនឌ័រ​នេះ​កើនឡើង​គឺ ទី​១)

​ការធ្លាក់ចុះ​នៃ​ការអនុវត្ត​វិធាន​ការបង្ការ​ទប់ស្កាត់​និង​ការផ្តល់​កិច្ចការពារ​ការផ្តល់សេវា​ថែទាំ​និង​សេវា​សង្គម​ផ្សេងៗ​ដល់​ជនរងគ្រោះ​ដោយ​អំពើហិង្សា​និង​ទី​២)​ការកើនឡើង​នូវ​ហានិភ័យ​នៃ​អំពើហិង្សា​ក្នុង​គ្រួសារ​ដោយសារតែ​ភាព​នៅ​ដាច់ដោយឡែក​(Isolation)​ការចំណាយ​ពេល​នៅ​ជាមួយគ្នា​យូរ​ខណៈពេលដែល​បញ្ហា​ផ្លូវចិត្ត​និង​ភាព​តានតឹង​ក្នុង​អារម្មណ៍​(Stress)​បាន​កើនឡើង​ដោយសារតែ​ការបាត់បង់​ប្រាក់ចំណូល​គ្រួសារ ការបិទ​សាលារៀន​ធ្វើឱ្យ​បន្ទុក​ការងារ​ក្នុង​គ្រួសារ​និង​ការថែទាំ​កើនឡើង​ជាដើម​។ ការកើនឡើង​ករណី​ថ្មី​នៃ​អំពើហិង្សា​ក្នុង​គ្រួសារ​នេះ នឹងធ្វើ​ឱ្យ​ទំហំ​នៃ​ការខាតបង់​ផ្នែក​សេដ្ឋកិច្ច​-​សង្គម កាន់​តែមាន​ទំហំធំធេង​ជាង​នេះ​៕​.mara

ទីតាំងផ្សាយពាណិជ្ជកម្ម

- Advertisment -

Most Popular