Home ព័ត៌មានសំខាន់ៗ គួរតែ​ចាប់ផ្ត...

គួរតែ​ចាប់ផ្តើម​ត្រូវ​ចេះ​ខ្មាស់ និង​កែ​ទម្លាប់​មិនល្អ​!

ដោយៈ​ម៉េង​ឆៃ / ភ្នំពេញៈ ក្រុម​ម៉ូតូឌុប និង​ម៉ូតូ​កង់​បី ចំនួន ១៣​នាក់ ដែល​បាន​ឈប់​យាន្ត​ជំនិះ ទៅ​បន្ទោ​របង់ នៅតាម​ដើមឈើ តាម​សួនច្បារ តាម​ទីសាធារណៈ ត្រូវបាន​អភិបាលខណ្ឌ​ដូនពេញ ចាត់​ឲ្យ​កម្លាំង​ប្រជា​ការពារ​ខណ្ឌដូនពេញ អញ្ជើញ​ពួកគាត់ មក​ធ្វើ​ការអប់រំ​ណែនាំ​នៅ​សាលាខណ្ឌ​ដូន​ពេ​និង​ឲ្យ​បាញ់​លាង​សំអាត​កន្លែង​ដែល​ពួកគាត់​បន្ទោរ​បង់​រួច​ទើប​អនុញ្ញាត​ឲ្យ​ត្រឡប់​ទៅវិញ​។​

​ចំណាត់ការ​នេះ​បានធ្វើ​ឡើង កាលពី​ថ្ងៃទី​១៩ ខែមករា​ម្សិលមិញ​។ ការ​បន្ទោ​របង់ ឈរ​បាញ់នោម​ដូច្នេះ​ត្រូវបាន​អាជ្ញាធរ លើកឡើងថា នាំ​ឲ្យ​បាត់បង់​សណ្តាប់ធ្នាប់ របៀបរៀបរយ និង បង្កអោយមាន​ក្លិនឆ្អេះ​ឆ្អាប ដល់​អ្នកធ្វើដំណើរ​ទៀត​ផង​។​

(រូបថតហ្វេស៊ុក)

​អាជ្ញាធរ​ខណ្ឌដូនពេញ ក៏បាន​លើក​ជា​សំណូមពរ​ដល់​បងប្អូន​ប្រជាពលរដ្ឋ​ទាំងអស់ សូមកុំ​យក​គំរូ​តាម​បុរសៗ​ទាំង ១៣​នាក់​នេះ និង​សូម​រក​កន្លែង​បន្ទោ​របង់ ឲ្យ​បាន​ត្រឹមត្រូវ នៅ​បន្ទប់ទឹក​សាធារណៈ ឬ​ឯកជន ដែល​នៅ​ជិត​ព្រោះ​ទង្វើ​បែបនេះ បង្ក​ភាពអនាធិបតេយ្យ បាត់​សណ្តាប់ធ្នាប់ អនាម័យ និង​ប៉ះពាល់​ដល់​សុខភាព​សាធារណៈជន​យ៉ាងខ្លាំង​។​

​នេះ​អាច​ចាត់ទុកថា​ជា​ចំណាត់ការ​ជាក់ស្តែង​និង​ដំបូង​មួយ​។​ជា​ការពិតហើយ ការ​បន្ទោរ​បង់​តាមផ្លូវ តាម​របង​សាលារៀន របង​វត្ត គល់ឈើ​និង​គុម្ព​ផ្កា​ជាដើម​គឺ​ពិតជា​មិន​សមគួរ​ទាល់តែ​សោះឡើយ​។​តែបើ​រាន់​ខ្លាំង​ហើយក៏​គេ​មិនអាច​ទប់​នោម​បានដែរ​។​ប៉ុន្តែ​អ្នករាន់​នោម​ទាំងនោះ គួរតែ​រក​កន្លែង​សមគួ​តាម​បន្ទប់ទឹក​សាធារណៈ ពិសេស​បន្ទប់ទឹក នៅតាម​កា​រ៉ា​ស់​សាំង ហើយ​បើ​ថា គ្មាន​បន្ទប់ទឹក​ទេ ក៏​គួរតែ​រក​កន្លែង​សមគួរ​ឲ្យ​ឆ្ងាយ​ពី​ភ្នែក​អ្នកដំណើរ​ផង​។​

​ទន្ទឹមនឹង​ការប្រកាន់​ឥរិយាបថ​ឲ្យ​សមគួរ​របស់​ក្រុម​អ្នក​និយម​បន្ទោរ​បង់​តាម​ទីសាធារណៈ​នេះ អាជ្ញាធរ​ក៏​គួរតែរៀបចំ​បន្ទប់ទឹក​សាធារណៈ ឲ្យ​បាន​ច្រើន ដាក់ពង្រាយ​តាម​ទីសាធារណៈ និង​នៅតាម​ផ្លូវ ពិសេស​នៅក្នុង​ខណ្ឌដូនពេញ នៅ​ជួរ​មាត់ទន្លេ​។​

(រូបថតហ្វេស៊ុក)

​នៅ​មាត់ទន្លេ​មុខ​ព្រះបរមរាជវាំង យូរ​ខែ​ឆ្នាំ បន្ត​ដល់ពេលនេះ ក្លិនឆ្អេះ​ទឹកនោម ក្លិន​លាមក បក់​ភាយៗ បើសិនជា​យើង​ដើរ​លំហែកាយ​នៅ​មាត់ទន្លេ ដើម្បី​ស្រូប​ខ្យល់អាកាស​។ អាជ្ញាធរ​សមត្ថកិច្ច​យើង ខំប្រឹង​ហើយ ក្នុង​ការបាញ់ទឹក​លាង​សម្អាត តែ​នៅតែមាន​កន្លែង​ខ្លះ ជះក្លិន​ឆ្អេះ​ទឹកនោម និង​លាមក ដោយសារតែ​ការ​បន្ទោ​របង់​ពាសវាល​ពាសកាល​។​

​ករណី​បន្ទោ​របង់​តាម​ទីសាធារណៈ​នេះ ក៏​មិន​ខុសពី​ការបោះ​ចោល​សំរាម​ដែរ​។ បើសិនជា​តាមផ្លូវ និង​តាម​សួនច្បារ​នានា មាន​ធុងសំរាម នោះ​ប្រជាជន​ខ្មែរ​យើង ក៏​មិន​ថ្នាក់​ដល់ មិន​យក​សំរាម​ទៅ​បោះចោល​នៅក្នុង​ធុងសំរាម​នោះទេ​។ តែ​កន្លងមក​ដោយសារតែ​មិនមាន​ធុង សំរាម ហើយ​បើ​មាន​ធុងសំរាម​នៅ​សួនច្បារ​មាត់ទន្លេ​ម្តុំ​មុខ​វាំង​ទៀត ក៏​ធុងសំរាម​ទាំងនោះ ពេញ​ដោយ​សំរាម ហៀរហូរ​ដែរ ទើប​មនុស្ស​មួយចំនួន​ទទួលទាន​កន្លែង​ណា ចោល​សំរាម​កន្លែង​នោះ​។​

​ជា​សរុប ក្នុង​រឿង​បន្ទោរ​បង់​តាម​ទីសាធារណៈ តាមផ្លូវ បាញ់​ដាក់​កង់ឡាន​កង់​ម៉ូតូ ជញ្ជាំង គល់ឈើ លើ​សួនច្បារ ជាដើម​នេះ មិនមែនជា​រឿង​ថ្មី​នៅ​ភ្នំពេញ​យើង​ទេ​។​សព្វថ្ងៃ​រាជធានី​ភ្នំពេញ មាន​បន្ទប់ទឹក​សាធារណៈ​ជាច្រើន​ដូចជា នៅ​សួនច្បារ​មុខ​វត្ត​បទុម​វ​ត្ដី និង​នៅ​សួនច្បារ​ជ្រោយចង្វា ត្រើយម្ខាង​ជាដើម​។ តែ​បន្ទប់ទឹក​ចល័ត​តូចៗ ដែលមាន​ពិធី​បុណ្យទាន ទើប​បញ្ចេញ​មក​ប្រើ​នោះ គួរតែ​ត្រូវបាន​ដាក់ពង្រាយ តាមផ្លូវ និង​តាម​សួនច្បារ​ជាច្រើន​ទៀត រួមទាំង​នៅ​មាត់ទន្លេ​។​

​ជា​ពលរដ្ឋ​នៃ​ប្រទេស​ដែល​ពោរពេញ​ទៅដោយ​មោទនភាព មាន​កិត្តិយស សេចក្តីថ្លៃថ្នូរ យើង​គួរតែ​ចាប់ផ្តើម​កែប្រែ​ទម្លាប់​មិនល្អ​ដែល​មិន​យកចិត្តទុកដាក់​ចំពោះ​អនាម័យ ចំពោះ​វិន័យ …​មកជា​ពលរដ្ឋ​ដែល​រួមគ្នា​លើកតម្កើង​មុខមាត់​ប្រទេសជាតិ​តាមរយៈ​សកម្មភាព​ចាប់ពី​បន្តិចបន្តួច​របស់ខ្លួន​ម្នាក់ៗ​ឡើងទៅ​៕​សរន​

(រូបថតហ្វេស៊ុក)

(រូបថតហ្វេស៊ុក)

ទីតាំងផ្សាយពាណិជ្ជកម្ម

- Advertisment -

Most Popular