Home ព័ត៌មានសំខាន់ៗ រដ្ឋមន្ត្រីកា...

រដ្ឋមន្ត្រីការបរទេស​កម្ពុជា​នឹងចូលរួម​កិច្ចប្រជុំ​ចង្អៀត​រដ្ឋមន្ត្រីការបរទេស​អាស៊ាន​នៅ​ថ្ងៃស្អែក​

ដោយៈ មុនី​រ័ត្ន​/​ភ្នំពេញៈ លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ អន្តរជាតិ នៃ​ព្រះរាជាណាចក្រ​កម្ពុជា នឹង​អញ្ជើញ​ចូលរួម​កិច្ចប្រជុំ​ចង្អៀត​រដ្ឋមន្ត្រីការបរទេស​អាស៊ាន ដែល​នឹង​រៀបចំឡើង​នៅ​ព្រឹក​ថ្ងៃទី​២១ ខែមករា ឆ្នាំ​២០២១ តាម​ប្រព័ន្ធ​វីដេអូ ។ ការអញ្ជើញ​ចូលរួម​នេះ គឺ​តប​តាម​ការ​អញ្ជើញលោក ដា​តូ អ៊ី​រី​វ៉ាន់ ពើ​ហ៊ី​ន យូ​ស៊ូ​ហ៍ រដ្ឋមន្ត្រីការបរទេស​ប្រ៊ុយណេ​ដា​រ៉ូ​សា​ឡឹម​។ នេះ​បើ​យោងតាម​សេចក្តីប្រកាស​ព័ត៌មាន​របស់​ក្រសួងការបរទេស និង​សហប្រតិបត្តិការ អន្តរជាតិ នៅ​ថ្ងៃទី​២០ ខែមករា​នេះ​។​

លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ អន្តរជាតិ នៃ​ព្រះរាជាណាចក្រ​កម្ពុជា(រូបថតឯកសារ)

​ក្រសួងការបរទេស​បាន​បន្តថា​កិច្ចប្រជុំ​ចង្អៀត​រដ្ឋមន្ត្រីការបរទេស​អាស៊ាន​នឹង​ពិនិត្យមើល​ការអនុវត្ត​ផែនការ​ការងារ​នានា​ដែល​សម្រេច​ដោយ​ថ្នាក់ដឹកនាំ​នៅក្នុង​កិច្ចប្រជុំ​កំពូល​អាស៊ាន​លើ​ទី​៣៧ ស្ដីពី​ការ​ពិនិត្យមើល​ឡើងវិញ​នូវ​ផែនការ​លំអិត​របស់​អា​ស៊ាន​វិធី​និង​មធ្យោបាយ នានា​ដើម្បី​សម្រេចបាន​នូវ​ការកសាង​សហគមន៍​អាស៊ាន​ដោយ​ផ្អែកលើ​បរិបទ​សកលលោក​នាពេល​បច្ចុប្បន្ន​និង​ជំងឺ​រាតត្បាត​ជាស​កល​កូ​វីដ​-១៩ និង​កំណត់​ទិសដៅ​ចក្ខុវិស័យ​សហគមន៍​អាស៊ាន​ក្រោយ​ឆ្នាំ​២០២៥​។​
រដ្ឋមន្ត្រីការបរទេស​អាស៊ាន ក៏​នឹង​ពិភាក្សា​ផងដែរ អំពី​ផែនការ​ស្តារ​សេដ្ឋកិច្ច​អាស៊ាន ក្រោយពី​ជំងឺ​កូ​វីដ​-១៩ ព្រមទាំង​ការប្រាស្រ័យ​ទាក់ទង​ជាមួយនឹង​សហគមន៍​ពិភពលោក​។​
ប្រទេស​ប្រ៊ុយណេ​ដា​រ៉ូ​សា​ឡឹម នឹង​ដឹកនាំ​ដំណើរការ​អាស៊ាន​នា​ឆ្នាំនេះ ក្រោម​មូលបទ​«​យើង​យកចិត្តទុកដាក់​, យើង​ត្រៀមលក្ខណៈ​, យើង​រីកចំរើន​» ជាមួយនឹង​ចំណុច​អាទិភាព​គន្លឹះ​ចំនួន​បី ដែល​ផ្តោតជាសំខាន់​ទៅលើ ១) ប្រកាន់ខ្ជាប់​នូវ​វប្បធម៌​យកចិត្តទុកដាក់​របស់​អាស៊ាន ២) ត្រៀមលក្ខណៈ និង​សម្រប​ខ្លួន​សម្រាប់​ពេលអនាគត និង ៣) បង្កើត​ឱកាស​សម្រាប់​កាលានុវត្តភាព​របស់​ប្រជាជន​អាស៊ាន​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular