អាជ្ញាធរ​រាជធានី​គ្រោង​ទិញ​រថយន្ត​បូម​លូ​១៨​គ្រឿង​បន្ថែមទៀត​ដើម្បី​ស្ដារលូ​កាត់បន្ថយ​ការលិចលង់​លំនៅដ្ឋាន​ប្រជាពលរដ្ឋ​

​ដោយ​:​រ៉ា​ម៉ន​/​ភ្នំពេញ​: លោក​ឃួ​ង ស្រេង អភិបាល​រាជធានី​ភ្នំពេញ បានបញ្ជាក់​នា​ព្រឹក​ថ្ងៃទី​២០ ខែមករា ឆ្នាំ​២០២១​នេះ នៅក្នុង​កិច្ចប្រជុំ​មួយ ជាមួយនឹង​អាជ្ញាធរ​នៅ​ខណ្ឌ​ទាំង​១៤​នៅ​សាលា​រាជធានី​ភ្នំពេញ​ថា រដ្ឋបាល​រាជធានី​ភ្នំពេញ​គ្រោង​នឹង​ទិញ​រថយន្ត​សម្រាប់​បូម​លូ​ចំនួន​១៨​គ្រឿង​បន្ថែមទៀត​ដើម្បី​ជំរុញ​ឲ្យ​ការ​ស្តារលូ​នៅក្នុង​រាជធានី​ភ្នំពេញ​ដំណើរការ​ទៅបាន​រលូន និង​លឿន​ទៅតាម​ការគ្រោងទុក ដើម្បី​ឲ្យ​ប្រពន្ធ​លូ​ទាំងនោះ​អាច​រំដោះ​ទឹកបាន​នា​រដូវវស្សា​ខាងមុខនេះ​។​

​ក្នុង​កិច្ចប្រជុំ​នោះ លោក​ឃួ​ង ស្រេង បាន​មានប្រសាសន៍ថា ការស្ដារ​លូ​ដោយ​ដៃ​មកដល់​សម័យនេះ គឺ​វា​ហួសពេល​ហើយ​។ ដូច្នេះ រដ្ឋបាល​រាជធានី​ភ្នំពេញ​នឹង​ទិញ​រថយន្ត​សម្រាប់​បូម​លូ​ចំនួន​១៨​គ្រឿង​បន្ថែមទៀត ដើម្បី​ទ្រ​សភាពការណ៍​នៃ​ការស្តារ​លូ​នេះ​ឱ្យបាន​ល្អ លឿន ពិសេស​យើង​ត្រូវធ្វើ​ឲ្យ​បាន​ទាន់ពេល​នៅក្នុង​រដូវប្រាំង​នេះ​។ មានន័យថា ពេល​ភ្លៀង​ធ្លាក់​មកដល់​ប្រព័ន្ធ​លូ​យើង​អាច​ហូរ​បាន​ស្រួល​រំដោះ​ការលិចលង់​បានតែ​ម្តង​។​

ពាក់ព័ន្ធ​ការងារ​ជួសជុល​ផ្លូវ​ដែល​ទទួលរង​ការខូចខាត​ដោយ​ជំនន់​ទឹកភ្លៀង​កាលពី​ឆ្នាំ​២០២០​កន្លង​ទៅនោះ លោក​ឃួ​ង ស្រេង អភិបាល​រាជធានី​ភ្នំពេញ​បាន​បញ្ជាក់ថា រដ្ឋបាល​រាជធានី​ភ្នំពេញ​បាន​នឹង​កំពុង​ជួសជុល​ផ្លូវ​ចំនួន​៣៨​ខ្សែ​នៅក្នុង​រាជធានី​ភ្នំពេញ ហើយ​ការងារ​នេះ ពិតជា​បានទទួល​នូវ​ការរីករាយ​និង​សាទរ​យ៉ាង​ពេញទំហឹង​ពី​សំណាក់​បងប្អូន​ប្រជាពលរដ្ឋនៅក្នុង​រាជធានី​ភ្នំពេញ ដោយ​លោក​បាន​ជំរុញ និង​ណែនាំ​ដល់​អាជ្ញាធរ​ខណ្ឌ​ទាំង​១៤ បើ​មាន​ការដ្ឋាន​នៅក្នុង​មូលដ្ឋាន​របស់ខ្លួន អាជ្ញាធរ​ខណ្ឌ​នោះ ត្រូវ​បញ្ចេញ​កម្លាំង​ចុះ​ដល់ទី​តាំង​ការដ្ឋាន​ការពារ​ការដ្ឋាន​ទាំងនោះ ដើម្បី​បង្កលក្ខណៈ​ងាយស្រួល​ទៅដល់​ក្រុមហ៊ុន ដែល​កំពុង​ស្ថាបនា ជៀសវាង​មាន​បញ្ហា​ប្រឈម​កើតឡើង​សំដៅ​ធ្វើយ៉ាងណា​ឱ្យ​ការដ្ឋាន​អនុវត្ត​ការងារ​នេះ​បានល្អ និង​ទាន់ពេលវេលា​ទៅតាម​គម្រោង​ដែល​បានគ្រោង​ទុក​៕​

ទីតាំងផ្សាយពាណិជ្ជកម្ម

- Advertisment -

Most Popular