Home ព័ត៌មានជាតិ សេដ្ឋកិច្ច ធនាគារ​អភិវឌ្...

ធនាគារ​អភិវឌ្ឍន៍​ជនបទនិង​កសិកម្ម​ថា រយៈពេល​មួយឆ្នាំ​ពេញ​២០២០​ធនាគារ​នេះ ផ្តល់​ឥណទាន​លើ​ការប្រមូល​ទិញស្រូវ​អង្ករ​៧៥​លាន​ដុល្លារ​

ដោយ​: ពៅ​និមល​/​ភ្នំពេញ​: អគ្គនាយក នៃ​ធនាគារ​អភិវឌ្ឍន៍ជនបទ និង​កសិកម្ម (ARDB) បានឱ្យដឹងថា គិត​ត្រឹម​បំណាច់​ឆ្នាំ​២០២០ ធនាគារ​បានផ្តល់​ឥណ​ទាន​ដល់​វិស័យ​ស្រូវ​អង្ករ ចំនួន​១៥១​លាន​ដុល្លារ ក្នុងនោះ​ឥណទាន​ប្រមាណ ៧៥​លាន​ដុល្លារ​សម្រាប់​គាំទ្រ​ដល់​ការ ប្រមូល​ទិញស្រូវ​ពី​ប្រជាកសិករ​។​

​លោក កៅ ថាច អគ្គនាយក​ធនាគារ​នេះ បាន​ប្រាប់​រស្មី​កម្ពុជា​នៅ​រសៀល​ថ្ងៃទី​២០ ខែមករា ឆ្នាំ​២០២១​ថា ឥណទាន​ប្រមាណ​៧៥​លាន​សម្រាប់​គាំទ្រ​ដល់​ការប្រមូល​ទិញស្រូវ ពី​ប្រជាកសិករ​នេះ បានផ្តល់​ដល់​រោង​ម៉ាស៊ីនកិនស្រូវ និង​ក្រុមហ៊ុន​កែច្នៃ​អង្ករ​នាំចេញ ចំនួន​៥០ ស្ថិតក្នុង​ខេត្ត​-​ក្រុង​ចំនួន​១១​។​

​លោក​បាន​បន្តថា ចំពោះ​ការសង​ត្រឡប់មកវិញ​របស់​អតិថិជន លោក​បានឱ្យដឹងថា មាន​ភាពទៀងទាត់ ដោយហេតុថា គោលបំណង​នៃ​ឥណទាន​នេះ ផ្តល់​ហិរញ្ញប្បទាន​ដល់ បណ្តា​រោង​ម៉ាស៊ីន ដើម្បីឱ្យ​ពួកគាត់​មានលទ្ធភាព​ប្រមូល​ទិញស្រូវ​ស្តុក​ទុក​បម្រើឱ្យ​ការនាំ ចេញ​អង្ករ និង​ជួយ​រក្សា​ស្ថេរភាព​ថ្លៃ​ស្រូវ ជូន​ប្រជាកសិករ​នា​រដូវ​ប្រមូល​ផល​ធំៗ ហេតុនេះ នៅពេល​ចប់​រដូវ​ប្រមូល​ផល រោង​ម៉ាស៊ីន​នឹង​បន្ត​កិនស្រូវ​មាន​ក្នុង​ស្តុក និង​កែច្នៃ​អង្ករ ផ្គត់ផ្គង់​ឱ្យ​ក្រុមហ៊ុននាំចេញ ដើម្បី​ប្រមូលប្រាក់​សង​មក​ធនាគារ​អភិវឌ្ឍន៍ជនបទ និង​កសិកម្ម វិញ​។

​លោក​បន្តទៀតថា ក្នុង​ឆ្នាំ​កន្លងទៅ រដ្ឋាភិបាល​កម្ពុជា​បានផ្តល់​មូលនិធិ​បន្ថែមចំនួន​៣០​លាន ដុល្លារ សម្រាប់​គាំទ្រ​ដល់​វិស័យ​ស្រូវ​អង្ករ ដែលជា​កិច្ច​អន្តរាគមន៍ ដ៏​សំខាន់​ក្នុងការ​រក្សា ថ្លៃ​ស្រូវ ក្រោយ​ពេលដែល​កសិករ​ដាំ​ដុះ​ស្រូវ​ឡើងវិញ​បន្ទាប់ពី​រង​ផលប៉ះពាល់​ដោយសារ គ្រោះទឹកជំនន់​ជាក់ស្តែង​ថ្លៃ​ស្រូវ ដែល​ប្រជាកសិករ​ប្រមូល​ផល​ចាប់តាំងពី​ខែវិច្ឆិកា ឆ្នាំ​២០២០ រហូតមកដល់​បច្ចុប្បន្ន​នេះ មានតម្លៃ​ស្ថេរភាព​ល្អ និង​ប្រភេទ​ស្រូវ​ខ្លះ​មានតម្លៃ ខ្ពស់ជាង​ឆ្នាំមុន​។ លើសពីនេះ ក៏បាន​ជួយ​បង្កើន​ដល់​ការនាំចេញ​អង្ករ​ផងដែរ​។​

​យោងតាម​របាយការណ៍​របស់​ក្រសួងកសិកម្ម រុក្ខាប្រមាញ់ និង​នេសាទ បាន​បញ្ជាក់ថា ការប្រមូល​ផល​ស្រូវ​ក្នុង​ឆ្នាំ​២០២០ បាន​បរិមាណ​ផល​សរុប​ចំនួន ១០.៩៣៥.៦១៨​តោន​។ ក្នុងនោះ ការនាំ​អង្ករ​ចេញទៅ​កាន់​ទីផ្សារ​អន្តរជាតិ​មាន​ចំនួន​ជិត ៦៩០.៨២៩​តោន កើន​ចំនួន ១១,៤០​ភាគរយ ធៀប​នឹង​ឆ្នាំ​២០១៩៕​/PC

ទីតាំងផ្សាយពាណិជ្ជកម្ម

- Advertisment -

Most Popular