Home ព័ត៌មានជាតិ សន្តិសុខ តុលាការ​ឃុំខ្...

តុលាការ​ឃុំខ្លួន​ជនបរទេស​៣​នាក់​ករណី​ឆបោក និង​សម្អាត​ប្រាក់

ដោយៈ​ស​រិ​ទ្ធ​/​ភ្នំពេញ​: ជនបរទេស​៣​នាក់ ដែល​ជាប់​ពាក់ព័ន្ធ​ករណី​ឆបោក​ដោយមាន​ក្រុម​ចាត់តាំង និង​សម្អាត​ប្រាក់ តាម​រូបភាព​លួច​ដក​ប្រាក់​របស់​អតិថិជន ពី​ក្នុង​គណនី​ធនាគារ​កាណាឌីយ៉ា​បាន​ត្រូវ​លោក​សេង រិទ្ធី ចៅក្រម​ស៊ើបសួរ​សាលាដំបូង​រាជធានី​ភ្នំពេញ​សម្រេច​ឃុំខ្លួន​ដាក់ពន្ធនាគារ​កាលពី​ព្រលប់​ថ្ងៃទី​២០ ខែមករា ឆ្នាំ​២០២១ ។​

​បុរស​ជា​ជនបរទេស​ទាំង​៣​នាក់​នោះ​មាន ៖ ទី​១-​ឈ្មោះ Goyal sandeep Kumar អាយុ​៣៨​ឆ្នាំ ជនជាតិ​ឥណ្ឌា ស្នាក់នៅ​អា​ផាត​មិន​បែ​ល​វីឡា ជាន់​ទី​៤ ផ្លូវ​លេខ​៥៧ សង្កាត់​បឹង​កេងកង​១ ខណ្ឌ​បឹង​កេងកង រាជធានី​ភ្នំពេញ​។ ទី​២-​ឈ្មោះ Mohibeen Lebe Mohammas Maharof អាយុ​៤៥​ឆ្នាំ ជនជាតិ​ស្រីលង្កា ស្នាក់​នៅផ្ទះ​លេខ​១៨​សេ ផ្លូវ​លេខ​៥៩ សង្កាត់​ចតុមុខ ខណ្ឌដូនពេញ​។ ទី​៣-​ឈ្មោះ Tai kokpoh អាយុ​៥១​ឆ្នាំ ជនជាតិ​សឹង្ហ​បុរី ស្នាក់​នៅផ្ទះ​លេខ​១៧ ផ្លូវ​លេខ​១៧៤ សង្កាត់​បឹងរាំង ខណ្ឌដូនពេញ​។

​សមត្ថកិច្ច​បានបញ្ជាក់​ថាៈ ជនសង្ស័យ​ទាំង​៣​ត្រូវបាន​សមត្ថកិច្ច​នគ​របាល ឃាត់ខ្លួន​ជា​បន្តបន្ទាប់​កាលពី​ថ្ងៃទី​១៦ ខែមករា ឆ្នាំ​២០២១ ដែល​ពួកគេ​បាន​ប្រព្រឹត្ត​បទល្មើស​នៅក្នុង​រាជធានី​ភ្នំពេញ ពាក់ព័ន្ធ​ករណី​លួច​ដក​ប្រាក់​ពី​គណនី​ធនាគារ​របស់​អតិថិជន​នោះ​។

​សមត្ថកិច្ច​អះអាងថាៈ​កាលពី​ថ្ងៃទី​១៥ ខែមករា ឆ្នាំ​២០២១​កន្លងទៅ មាន​អតិថិជន​របស់​ធនាគា​រ​កាណាឌីយ៉ា​ចំនួន​៥​នាក់ បានមក​ប្ដឹង​ពី​ការបាត់​ប្រាក់​ក្នុង​គណនី​ធនាគារ​។ ក្នុងនោះ​អតិថិជន​ទី​១.​ឈ្មោះ ពេ​ជ សូរិយា ភេទ​ស្រី អាយុ​៤១ ឆ្នាំ បាន​បាត់ប្រាក់​ចំនួន​៦ ម៉ឺន​ដុល្លារ​អាមេរិក ដោយ​ត្រូវគេ​លួច​ផ្ទេរប្រាក់​ពី​គណនី​របស់គាត់​ទៅ​គណនី​លេខ​០០១០០០ ៤៨៦៦២៥៣ ដែលមាន​ឈ្មោះ shop 24 on និង​ម្ចាស់​គណនី​ឈ្មោះ Goyal sandeep Kumar ចំនួន​៣​លើក​បាត់ប្រាក់​សរុប ៦​ម៉ឺន​ដុល្លារ​អាមេរិក​។ អតិថិជន​ទី​២.​ឈ្មោះ ឈួន ស្រីណូ ភេទ​ស្រី អាយុ​២៧​ឆ្នាំ បាន​បាត់ប្រាក់​ចំនួន​៤៣៥ ដុល្លារ​អាមេរិក ដោយ​ត្រូវគេ​លួច​ផ្ទេរ​ពី​គណនី​របស់គាត់ ទៅ​គណនី​របស់​ឈ្មោះ Goyal sandeep Kumar​។ អតិថិជន​ទី​៣.​ឈ្មោះ ច័ន្ទ សុ​ផា ភេទ​ស្រី អាយុ​៣៣​ឆ្នាំ បាន​បាត់ប្រាក់​ចំនួន​១​ម៉ឺន​ដុល្លារ​អាមេរិក​។ អតិថិជន​ទី​៤.​ឈ្មោះ ម៉ិច កញ្ញា អាយុ​២៨​ឆ្នាំ បាន​បាត់ប្រាក់​ចំនួន ៤៩០០ ដុល្លារ​អាមេរិក​។ និង​ទី​៥.​នៅវេលា​ម៉ោង​១១​ព្រឹក​ថ្ងៃទី​១៥ ខែមករា ឆ្នាំ​២០២១ ក្រុម​ជនសង្ស័យ​បាន​ទៅ​ដក​ប្រាក់​ពី​ធនាគារ​កាណាឌីយ៉ា​ក្បែរ​វិមានឯករាជ្យ ក៏ត្រូវ​សមត្ថកិច្ច​ឃាត់ខ្លួន​តែម្ដង​។
​មន្ត្រីនគរបាល​បាន​បន្តថា ល្បិច​ឆបោក​របស់​ជនបរទេស​៣​នាក់​លួច​ដក​ប្រាក់​ពី​គណៈនី​របស់​អតិថិជន ដែល​ផ្ញើ​នៅ​ធនាគារ​កាណាឌីយ៉ា​នេះ ដំបូង​អតិថិជន​បានទទួល​សារ​ដែល​ពួកគេ​បាន​បង្ហោះ​ចូលក្នុង​ទូរស័ព្ទដៃ​របស់​ពួកគាត់ តាមរយៈ​(​តេ​ឡេ​ក្រាម​) ដោយ​ប្រាប់ថា ៖
​គណនី​ធនាគារ​របស់​ពួកគាត់​(​ជនរងគ្រោះ​)​ត្រូវបាន​គេ​លួច​ចូល និង​បាន​ភ្ជាប់​គេហទំព័រ​ឈ្មោះ www.canadias.com ជា​គេហទំព័រ​ក្លែងបន្លំ​របស់​ធនាគារ​កា​ណា​ឌី​យ៉ា​។ ដូច្នោះ​ជនសង្ស័យ​ក៏បាន​ណែនាំ​ឲ្យ​អតិថិជន​ធ្វើតាម​គេ និង​បាន​តម្រូវ​ឲ្យ​បញ្ចូល​ព័ត៌មាន​សម្ងាត់​តាម​អ្វីដែល​គេ​ប្រាប់ បន្ទាប់មក​ដោយមាន​កា​រ​សង្ស័យ​អតិថិជន​បាន​ឆែក​មើល​ទឹកប្រាក់​នៅក្នុង​គណនី​រប​ស់​ខ្លួន ស្រាប់តែ​បាត់ប្រាក់​ដូច​បាន​ចំនួន​រៀបរាប់​ខាងលើ ទើបបាន​នាំគ្នា​ទៅ​ផ្តល់ព័ត៌មាន​ដល់​ធនាគារ​កាណាឌីយ៉ា ដើម្បី​ឲ្យ​ចាត់ការ​ចំពោះ​ជនបរទេស ដែលមាន​គំនិត​ទុច្ចរិត​នេះ​៕

ទីតាំងផ្សាយពាណិជ្ជកម្ម

- Advertisment -

Most Popular