Home ព័ត៌មានសំខាន់ៗ ចិន​ដាក់ទណ្ឌក...

ចិន​ដាក់ទណ្ឌកម្ម​អតីតរដ្ឋមន្ត្រី​ការបរទេស និង​មន្ត្រី​របស់​ត្រាំ ដោយសារ​រំលោភ​អធិបតេយ្យភាព​

​ប្រែ​សម្រួលៈ​វាសនា​/​ប៉េកាំង​៖​ចិន​កាលពី​ថ្ងៃ​ពុធ បាន​និយាយថា​ខ្លួន​ដាក់ទណ្ឌកម្ម​លើ​អតីតរដ្ឋមន្ត្រី​ការបរទេស​អាម៉េរិក​លោក​ម៉ៃ ផ​ម​ផេវ និង​មន្ត្រី​ដទៃទៀត​ក្នុង​រដ្ឋការ​លោក​ដូណាល់ ត្រាំ ដោយសារ​ពួក​​គេ​បាន​«​ចាត់វិធានការ​ឆ្កួតៗ​»​ដែល​ប៉ះពាល់​ដល់​ទំនាក់ទំនង​ចិន​-​អាម៉េរិក​។​

​ក្នុង​បញ្ជី​ឈ្មោះ​មនុស្ស​២៨​នាក់​ដែល​រង​ទណ្ឌកម្ម​ក៏មាន​អតីត​ទីប្រឹក្សា​សន្តិសុខ​ជាតិ​អាម៉េរិក លោក​រ៉ូ​ប៊ឺត អូ​ប្រាយ​អឹន និង​អនុប្រធាន​របស់​លោក គឺ​លោក ម៉ា​ត ផុត​ធី​ង​ហ្គ័​រ ទីប្រឹក្សា​ពាណិជ្ជកម្ម​លោក​ផេ​ធឺ​​ណា​វ៉ា​រ៉ូ និង​ឯកអគ្គរដ្ឋទូត​អាម៉េរិក​ប្រចាំ​អង្គការសហប្រជាជាតិ​លោកស្រី ខេ​ល្លី ក្រា​ហ្វ នេះ​បើ​យោង​តាម​សេចក្តីថ្លែងការណ៍​មួយ​កាលពី​ថ្ងៃ​ពុធ​ចេញ​ដោយ​ក្រសួងការបរទេស​ចិន ចំ​ថ្ងៃ​ដែល​លោកចូ បៃ​ដិន ​ចូលកាន់​តំណែង​ប្រធានាធិបតី​អាម៉េរិក​ថ្មី​។​

​យោង​តាម​សេចក្តីថ្លែងការណ៍ មន្ត្រី​អាម៉េរិក​ក្នុង​បញ្ជី​នេះ រួមទាំង​សមាជិក​គ្រួសារ​របស់​គេ​នឹង​ត្រូវ​ហាម​មិន​អោយ​ចូល​ចិន ហុងកុង ឬ​ម៉ា​កាវ ថែម​ទាំង​ហាម​ធ្វើ​ការរកស៊ី​ជាមួយ​ចិន​ថែមទៀត​។​

​ពួក​មន្ត្រី​ដែល​រង​ទណ្ឌកម្ម​ទាំងនេះ​ជា​ឧបករណ៍​ជួយ​ពូន​ជ្រំ​បង្កើត​គោលជំហរ​ប្រឈមមុខ​ខ្លាំង​ឡើង​របស់​រដ្ឋការ​ត្រាំ​ចំពោះ​ចិន​ប៉េកាំង ដែល​រួម​មាន​ទណ្ឌកម្ម​មួយ​ជួរ​និង​សេចក្តីប្រកាស​មួយ​នៅ​ថ្ងៃ​ចុងក្រោយ​​ក្នុង​អាណត្តិ​របស់​ខ្លួន​ដែលថា រដ្ឋាភិបាល​ចិន​បាន​ប្រព្រឹត្ត​អំពី​ប្រល័យពូជសាសន៍​នៅ​តំបន់​ស៊ីន​ជាំ​ង​ដែលមាន​អ្នក​កាន់​សាសនា​អ៊ីស្លាម​រស់នៅ​ភាគច្រើន​។​

​អតីត​ទី​ប្រឹក​របស់​ត្រាំ​លោក ស្ទេ​វ បាន​ណុន និង​អតីត​ទីប្រឹក្សា​សន្តិសុខ​ជាតិ​អាម៉េរិក​លោក ច​ន បុល​ថុន ក៏​មានឈ្មោះ​ក្នុង​បញ្ជី​ទណ្ឌកម្ម​នេះដែរ​។​

​ក្រសួង​ការបរទេស​បាន​និយាយ​នៅក្នុង​សេចក្តីថ្លែងការណ៍​មួយ​ថា « ពួក​មន្ត្រី​ដែល​បាន​រៀបចំ​ផែនការ ជំរុញ​និង​អនុវត្ត​ទង្វើ​ឆ្កួតៗ​មួយ​ជួរ ដែល​ជ្រៀតជ្រែក​ចូល​កិច្ចការ​ផ្ទៃក្នុង​ចិន បាន​ធ្វើអោយ​ខូច​​ផលប្រយោជន៍​ចិន រំលោភ​ប្រជាជន​ចិន​និង​ប៉ះពាល់​ធ្ងន់ធ្ងរ​ដល់​ទំនាក់ទំនង​ចិន​-​អាម៉េរិក​»​។​

​ទោះ​ជា​លោកបៃ​ដិ​ន​និង​មន្ត្រី​របស់​លោក​ទំនងជា​មិន​ប្រកាន់​តឹង​ដូច​មន្ត្រី​នៃ​រដ្ឋ​ការ​របស់​ត្រាំ​ក្នុងការ​ដោះស្រាយ​ជាមួយ​ចិន ក៏​ពួកគេ​បានបង្ហាញ​រួចមកហើយ​ថា​ពួកគេ​នៅ​មិន​ទាន់​ត្រៀម​ខ្លួន​បន្ធូរបន្ថយ​​ភាព​តានតឹង​តាម​អ្វី​ដែល​ក្រុម​មេដឹកនាំ​ចិន​ចង់បាន​នោះទេ​។​

​ឧត្តមសេនីយ៍ ឡយ អូ​ស្ទីន ដែល​លោកបៃ​ដិន ជ្រើសតាំង​ជា​រដ្ឋមន្ត្រី​ការពារ​ជាតិ​អាម៉េរិក បាន​និយាយ​ក្នុង​លិខិត​មួយ​ទៅ​កាន់​សភា​ថា រដ្ឋាភិបាល​ថ្មី​«​នឹង​ពិនិត្យមើល​ចិន​ឡើងវិញ​ក្នុងនាម​ជា​គូ​ប្រកួត​​សកល​គីឡូ​ធ្ងន់​បំផុត​របស់​យើង និង​បើ​គិត​អំពី​ទស្សនវិស័យ​យោធា វា​ជា​ការ​គំរាម​នៅក្នុង​ផ្នែក​ច្រើន​បំផុត​»​។​

​ក្នុង​ថ្ងៃ​ដដែល មនុស្ស​ដែលបៃ​ដិន​ជ្រើសតាំង​ជា​រដ្ឋមន្ត្រី​ការបរទេ​ស លោក​អ៊ែន​ថូ​នី ប្លីន​កិន បាន​និយាយ​នៅ​សវនាការ​សភា​ថា​ចិន​គឺជា​«​ការ​ប្រឈម​សំខាន់​បំផុត​ចំពោះ​សហរដ្ឋ​អាម៉េរិក​បើ​និយាយ​អំពី​​ផលប្រយោជន៍​របស់​យើង ផលប្រយោជន៍​របស់​ប្រជាជន​អាម៉េរិក​»​។​តែ​លោក​បាន​បន្ថែមថា​«​មាន​ឳ​កាស​ខ្លះ​នៃ​កិច្ចសហប្រតិបត្តិការ​នៅពេល​វា​ផ្តល់​ផលប្រយោជន៍​ទៅវិញទៅមក​»​។​

​ក្រុម​អន្តរកាល​របស់​បៃ​ដិ​នក៏បាន​និយាយថា​ខ្លួន​សង្ឃឹម​បង្កើត​កិច្ចព្រមព្រៀង​ណាមួយ​ជាមួយ​ចិន​អំពី​ការប្រែប្រួល​អាកាសធាតុ​និង​ការគ្រប់គ្រង​សព្វាវុធ​នុយគ្លេអ៊ែរ​៕

​ក្នុងចំណោម​មន្ត្រី​អាម៉េរិក​ដែល​រង​ទណ្ឌកម្ម​របស់​ចិន រួមមាន​អតីតរដ្ឋមន្ត្រី​ការបរទេស ម៉ៃ ផ​ម​ផេវ អតីត​ទីប្រឹក្សា​សន្តិសុខ​ជាតិ រ៉ូ​ប៊ឺត អូ​ប្រា​អឹន និង​លោកស្រី ខេ​ល្លី ក្រា​ហ្វ ឯកអគ្គរដ្ឋទូត​អាម៉េរិក​​ប្រចាំ​អង្គការ​សហប្រជាជាតិ​

ទីតាំងផ្សាយពាណិជ្ជកម្ម

- Advertisment -

Most Popular