Home ព័ត៌មានសំខាន់ៗ ប្រទេស​រុស្ស៊...

ប្រទេស​រុស្ស៊ី គ្រោង​នឹង​បញ្ជូន​វ៉ាក់សាំង Sputnik V ការពារ​ជំងឺ​កូ​វីដ​-១៩ មកឱ្យ​កម្ពុជា នៅពេល​ខាងមុខ​

ដោយៈ រ៉ា​ម៉ន / ភ្នំពេញៈ ប្រទេស​រុស្ស៊ី គ្រោង​នឹង​បញ្ជូន​វ៉ាក់សាំង Sputnik V ការពារ​ជំងឺ កូ​វីដ​-១៩ មកឱ្យ​កម្ពុជា នៅពេល​ខាងមុខ ។ ភាគី​រុស្ស៊ី នឹង​ពិភាក្សា​ជាមួយ ក្រសួង​សុខា ភិ​បាល​កម្ពុជា ដើម្បី​បញ្ជូន​វ៉ាក់សាំង​នេះ មកឱ្យ​កម្ពុជា​។ លោក អាណា​តូ​លី បូ​រ៉ូ​វី​គ (H.E. Anatoly BOROVIK) ឯកអគ្គរដ្ឋទូត​វិសាមញ្ញ និង​ពេញ​សមត្ថភាព​ថ្មី របស់​សហព័ន្ធរុស្ស៊ី ប្រចាំ​ព្រះរាជាណាចក្រ​កម្ពុជា បាន​អះអាង​ដូច្នេះ នៅពេល​លោក បាន​ត្រូវ​អនុញ្ញាត ឱ្យចូល​ជួប សំដែង​ការគួរសម ជាមួយនឹង​លោក ឃួ​ង ស្រេង អភិបាល​រាជធានី​ភ្នំពេញ នា​រសៀល​ថ្ងៃទី​២០ ខែមករា ឆ្នាំ​២០២១ នេះ នៅ​សាលា​រាជធានី​ភ្នំពេញ​។​

​នៅក្នុង​ជំនួប​នោះ លោក អាណា​តូ​លី បូ​រ៉ូ​វី​គ បានលើកឡើង​ថាៈ ប្រទេស​រុស្ស៊ី​បាន​មាន ទំនាក់ទំនង​ការទូត ជាមួយនឹង​ព្រះរាជាណាចក្រ​កម្ពុជា មាន​រយៈពេល ៦៥ ឆ្នាំកន្លងមក ហើយ​។ ទំនាក់ទំនង​នេះ បានធ្វើ​ឲ្យ​ប្រទេស​ទាំងពីរ មាន​ទំនាក់ទំនង កាន់តែ​ល្អប្រសើរ រហូតមកដល់ ពេលបច្ចុប្បន្ន​នេះ​។​

​លោក អាណា​តូ​លី បូ​រ៉ូ​វី​គ បាន​បន្តទៀតថាៈ ស្ថានភាព​ជំងឺ​កូ​វីដ​-១៩ បានធ្វើឱ្យ​ប៉ះពាល់ ដល់​បណ្ដា​ប្រទេស​ជាច្រើន នៅលើ​ពិភពលោក ។ ក្នុងនោះ ព្រះរាជា​ណា ចក្រ​កម្ពុជា ក៏​ជា​ប្រទេសមួយ ដែល​ប្រឈម​នឹង​ជំងឺ​កូ​វីដ​-១៩ នេះ​ផងដែរ ។ ប៉ុន្តែ​ដោយ​ការខិតខំ ប្រឹងប្រែង ទប់ស្កាត់​ពី​សំណាក់ រាជរដ្ឋាភិបាល​កម្ពុជា និង​រដ្ឋបាល រាជធានី​ភ្នំពេញ បានធ្វើ​ឲ្យ​ស្ថានភាព​ជំងឺ​នេះ នៅ​កម្ពុជា មាន​លក្ខណៈ​ល្អប្រសើរ ពិសេស​គឺ​ការគ្រប់គ្រង នូវ​ព្រឹត្តិការណ៍ ២៨ វិច្ឆិកា បាន​យ៉ាង​ល្អប្រសើរ​។​

​លោក​បាន​បន្តទៀតថាៈ ពាក់ព័ន្ធ​នឹង​ជំងឺ​កូ​វីដ​-១៩​នេះ ប្រទេស​រុស្ស៊ី បង្កើតបាន​វ៉ាក់សាំង Sputnik V ដើម្បី​ចាក់​ការពារ​ជំងឺ​នេះ ហើយ​វ៉ាក់សាំង​នេះ ប្រទេស​រុស្ស៊ី គ្រោង​នឹង​បញ្ជូន មក​ឲ្យ​ប្រទេស​កម្ពុជា នាពេល​ដ៏​ខ្លី​ខាងមុខនេះ ។ យើង​នឹង​ពិភាក្សា​ជាមួយ ក្រសួង​សុខា ភិ​បាល​កម្ពុជា ដើម្បី​បញ្ជូន​វ៉ាក់សាំង​នេះ មកឱ្យ​កម្ពុជា​។​

​ក្នុងឱកាស​នោះ លោក ឃួ​ង ស្រេង អភិបាល​រាជធានី​ភ្នំពេញ បាន​ថ្លែង​ការ​អរគុណ យ៉ាង​ជ្រាលជ្រៅ​បំផុត ចំពោះ​ប្រទេស​រុស្ស៊ី ដែល​បាន​ជួយឧបត្ថម្ភ គាំទ្រ​ជាច្រើន​មក ប្រទេស​កម្ពុជា ក្រោយ​ឆ្នាំ ១៩៧៩ ។ មិន​ត្រឹមតែ​ប៉ុណ្ណោះ​ទេ រុស្សី​នៅបាន​បណ្ដុះបណ្ដាល ធនធានមនុស្ស របស់​កម្ពុជា​ថែមទៀត​។ ជាក់ស្តែង អ្វីដែល​យើង​បានឃើញ ជាក់ស្តែង​នោះ ប្រទេស​រុស្សី បាន​កសាង​មន្ទីរពេទ្យ​មួយ នៅក្នុង​រាជធានី​ភ្នំពេញ នោះ​គឺ មន្ទីរពេទ្យ​រុស្ស៊ី ដែល​បាន​បន្សល់​ទុកអោយ កូនចៅ​ជំនាន់​ក្រោយ បានឃើញ​។ លោក ឃួ​ង ស្រេង បាន​បន្តទៀតថាៈ មន្ទីរពេទ្យ​រុស្ស៊ី នៅ​រាជធានី​ភ្នំពេញ ខណៈ​កូ​វីដ​-១៩ មន្ទីរពេទ្យ​នេះ បាន​តួនាទី​យ៉ាង សំខាន់ ក្នុងការ​ព្យាបាល​ជំងឺ​កូ​វីដ​-១៩​។​

​ជាមួយគ្នានេះ លោក ឃួ​ង ស្រេង បាន​ថ្លែង​ការ​អរគុណ នូវ​សន្ដាន​ចិត្ត​ដ៏​ល្អ របស់​ប្រទេស រុស្ស៊ី ដែល​គ្រោង​នឹង​បញ្ជូន​វ៉ាក់សាំង​កូ​វីដ​-១៩ Sputnik V មក​ព្រះរាជាណាចក្រ​កម្ពុជា​។ នេះ​គឺជា​សន្ដាន​ចិត្ត​ដ៏​ប្រសើរ​បំផុត របស់​ប្រទេស​រុស្ស៊ី ដែល​បាន​គិតគូរ និង​យកចិត្តទុកដាក់ ចំពោះ​ព្រះរាជាណាចក្រ​កម្ពុជា​។​

​ជាការ​ឆ្លើយតប​ទៅនឹង​អ្វីដែល​ជាការ​ពង្រីក​នូវ​ទំនាក់ទំនង មិត្តភាព និង​សហប្រតិបត្តិការ រវាង​កម្ពុជា និង​រុស្ស៊ី​នោះ លោក​ឯកអគ្គរដ្ឋទូត​ថ្មី នៃ​សហព័ន្ធរុស្ស៊ី ប្រចាំ​កម្ពុជា ក៏បាន លើកឡើង ពី​ទំនាក់ទំនង នៃ​ការ​ចងសម្ព័ន្ធភាព រវាង​ទីក្រុង​ពីរ របស់​ប្រទេស​រុស្ស៊ី ជាមួយនឹង​រាជធានី​ភ្នំពេញ គឺ​ទីក្រុង​ម៉ូស្គូ និង​ទីក្រុង ណូ​វ៉ូ​ស៊ី​ប៊ី​ស ។​

​លោក​បាន​បញ្ជាក់ថាៈ ដោយ​ស្ថានភាព​ជំងឺ​កូ​វីដ​-១៩ ការចុះហត្ថលេខា ទៅលើ​ការចង សម្ព័ន្ធមេត្រីភាព​នេះ ត្រូវបាន​អូសបន្លាយ​ពេល​។ ទោះបីជា​យ៉ាងណាក្តី ការចុះហត្ថលេខា លើ​អនុស្សរណៈ​យោគយល់​គ្នា ទៅវិញទៅមក ស្ដីពី​ការបង្កើត ចំណងមិត្តភាព​រវាង​រាជធានី ភ្នំពេញ និង​ទីក្រុង​ទាំងពីរ របស់​ប្រទេស​រុស្ស៊ី​នេះ គ្រោង​នឹងធ្វើ​ឡើង នៅពេល​ដ៏​ខ្លី​ខាងមុខ ពោលគឺ​ក្រោយពី ស្ថានភាព​កូ​វីដ​-១៩ បាន​ធូរស្រាល​។ លោក​ក៏បាន​អះអាង ពី​ការជំរុញឱ្យ អ្នកវិនិយោគទុន របស់​ប្រទេស​រុស្ស៊ី មក​បណ្ដាក់ទុន​រកស៊ី នៅ​កម្ពុជា ផងដែរ​។​

​ពាក់ព័ន្ធ​នឹង​វិនិយោគិន​រុស្ស៊ី គ្រោង​នឹង​មក​បណ្ដាក់ទុន​រកស៊ី នៅ​កម្ពុជា​នោះ លោក ឃួ​ង ស្រេង បានបញ្ជាក់​ថាៈ រដ្ឋបាល​រាជធានី​ភ្នំពេញ នឹង​បង្កលក្ខណៈ ងាយស្រួល គ្រប់យ៉ាង សម្រាប់​អ្នកវិនិយោគទុន របស់​ប្រទេស​រុស្ស៊ី ដែល​ចង់​មក​បណ្ដាក់ទុន​រកស៊ី នៅ​ប្រទេស កម្ពុជា ជាពិសេស​នៅក្នុង រាជធានី​ភ្នំពេញ​។​

​គួរបញ្ជាក់​ថាៈ វ៉ាក់សាំង រុស្ស៊ី Sputnik V បាន​បើក​ឱ្យ​ចាក់ ជូន​ពលរដ្ឋ នៅ​ប្រទេស​រុស្ស៊ី រួចហើយ ក្នុងនោះ ប្រធានាធិបតី​រុស្សី លោក ពូ​ទីន ក៏បាន​ចាក់​វ៉ាក់សាំង នេះ​រួចហើយ​ដែរ​។ វ៉ាក់សាំង រុស្ស៊ី Sputnik V ត្រូវ​ចាក់​ពីរ​ដូ​ស មាន​ប្រសិទ្ធភាព ៩២ ភាគរយ រក្សាទុក ក្នុង​សីតុណ្ហភាព ទូទឹកកក ធម្មតា​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular