​ក្រសួង​ប្រៃសណីយ៍​៖ ការបោក​បញ្ឆោត តាម​អ៊ីនធឺណិត ទៅលើ​គ្រឹះស្ថាន​ធនាគារ និង​ហិរញ្ញវត្ថុ កំពុង​កើនឡើង

​ដោយៈ ដេប៉ូ / ភ្នំពេញៈ ក្រសួង​ប្រៃសណីយ៍ និង​ទូរគមនាគមន៍ នៅ​ថ្ងៃទី​២១ ខែមករា ឆ្នាំ ២០២១ នេះ បានចេញ​សេចក្តីជូនដំណឹង ស្តីពី​ការកើនឡើង នៃ​ការបោក​បញ្ឆោត តាម​អ៊ីនធឺណិត និង​វិធាន​ការការពារ សម្រាប់​ម្ចាស់​គណនី​ធនាគារ ដើម្បី​ជៀសវាង​ការចាញ់បោក ពួកចោរ​បច្ចេកវិទ្យា (Hackers)​។​

​យោងតាម​សេចក្តីជូនដំណឹង របស់​ក្រសួង​ប្រៃសណីយ៍ និង​ទូរគមនាគមន៍ បានបញ្ជាក់​ថាៈ ចោរ​បច្ចេកវិទ្យា (Hackers) បានធ្វើការ​វាយប្រហារ ដោយ​ផ្ញើ​សារ​ខ្លីៗ (SMS) ឬ​សារ​អ៊ីមែល ទៅ​អ្នកប្រើប្រាស់ ដោយមាន​ខ្លឹមសារ Your bank account has been logged in through another platform, please verify again to protect your rights ហើយ​ភ្ជាប់​ជាមួយនឹង​ឈ្មោះ​ដែន (Domain Name) ស្រដៀង​នឹង​ឈ្មោះ ធនាគារ របស់​អ្នកប្រើប្រាស់​។​

​ក្រសួង បាន​បន្ត​ឱ្យដឹងថាៈ នៅពេល​អ្នកប្រើប្រាស់ ចុច​លើ​ឈ្មោះ​ដែន​នោះ នឹង​ចូលទៅ​គេហទំព័រ ក្លែងក្លាយ​មួយ ដែលមាន​រូបរាង និង​ទម្រង់​ស្ទើរតែ​ដូចគ្នា ទៅនឹង​គេហទំព័រ របស់​គ្រឹះស្ថាន​ធនាគារ និង​ហិរញ្ញវត្ថុ ដោយ​តម្រូវឱ្យ​អ្នកប្រើប្រាស់ បញ្ចូល​ព័ត៌មាន​សំខាន់ៗ ដូចជា​ឈ្មោះ លេខ​គណនី ពាក្យ​សំងាត់ និង​លេខ​កូដ​សំងាត់​ជាដើម​។ ប្រសិនបើ​អ្នកប្រើប្រាស់ បញ្ចូល​ព័ត៌មាន​ទាំងនោះ ចោរ​បច្ចេកវិទ្យា អាចមាន​លទ្ធភាព លួច​ចូលក្នុង​គណនី​ធនាគារ របស់​អ្នកប្រើប្រាស់ ហើយ​អាច​បង្វែរ​សាច់ប្រាក់​ចេញ ទៅ​គណនី​ផ្សេងទៀត ដែល​បានគ្រោង​ទុកជាមុន​។ អ្នកប្រើប្រាស់ មិនគួរ​ចុច​លើ​តំណរ​ភ្ជាប់ ឬ​ចុច​លើ​ឈ្មោះ​ដែន ដែលមាន​ភ្ជាប់​មក តាម​សារ​ខ្លី ឬ​អ៊ីមែល​នោះទេ​។​

​ជាមួយគ្នានេះ ក្រសួង​ប្រៃសណីយ៍ បានធ្វើ​ការណែនាំ​ថាៈ ” សូម​ធ្វើការ​ត្រួតពិនិត្យ ទៅលើ​ឈ្មោះ​គេហទំព័រ ឱ្យបាន​ច្បាស់លាស់ ជៀសវាង​ការបញ្ចូល​ព័ត៌មាន លើ​គេហទំព័រ​ក្លែងក្លាយ​។ អ្នកប្រើប្រាស់ មិនត្រូវ​ធ្វើការ​ឆ្លើយតប​ទូរ​សព្ទ សារី ឬ​អ៊ីមែល ដែល​ព្យាយាម​សាកសួរ​ព័ត៌មាន ផ្ទាល់ខ្លួន​ទេ​។ ជាទូទៅ គ្រឹះស្ថាន​ធនាគារ និង​ហិរញ្ញវត្ថុ មិនដែល​ស្នើសុំ ឱ្យ​អតិថិជន​ផ្តល់​លេខ​គណនី លេខ​សំងាត់ ឬ​លេខ​កូដ OTP ឡើយ​។ សូម​ទាក់ទង​ទង គ្រឹះស្ថាន​ធនាគារ និង​ហិរញ្ញវត្ថុ​របស់​អ្នក ក្នុងករណី​មានការ​សង្ស័យថា ខ្លួន​ធ្លាក់ចូល​អន្ទាក់ ចោរ​បច្ចេកវិទ្យា ដើម្បី​អាចជួយ​ដោះស្រាយ ទាន់ពេលវេលា​”​។​

​ក្រសួង បានឱ្យដឹង​បន្ថែមថាៈ សម្រាប់​ព័ត៌មាន​បច្ចេកទេស​ពាក់ព័ន្ធ​នឹង​បញ្ហា​នេះ អ្នកប្រើប្រាស់ អាច​ស្វែងយល់​បន្ថែម ក្នុង​គេហទំព័រ​របស់ ការិយាល័យ​ឆ្លើយតប បញ្ហា​បន្ទាន់ នៃ​កុំព្យូទ័រ (CamCERT” នាយកដ្ឋាន​សន្តិសុខ បច្ចេកវិទ្យា គមនាគមន៍ និង​ព័ត៌មាន នៃ​ក្រសួង​ប្រៃសណីយ៍ និង​ទូរគមនាគមន៍ ដែលមាន​អាសយដ្ឋាន www.camcert.gov.kh ឬ រាយការណ៍ ឬ​សុំ​ជំនួយ​បច្ចេកទេស បន្ថែម​លើ​ករណីនេះ តាមរយៈ​អ៊ី​ម៉ែ​ល incident@camcert.gov.kh ឬ​ទូរ​សព្ទ​លេខ ០១៦ ៨៥១ ៦៧៨ ៕/V.mara
​