Home ព័ត៌មានសំខាន់ៗ លទ្ធផល​នៃ​កិច...

លទ្ធផល​នៃ​កិច្ចប្រជុំ​ចង្អៀត រដ្ឋមន្ត្រីការបរទេស​អាស៊ាន

ដោយៈ មុនី​រ័ត្ន/ភ្នំពេញៈ លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង​សហប្រតិបត្តិការ​អន្តរជាតិ បាន​អញ្ជើញ​ចូលរួម កិច្ចប្រជុំ​ចង្អៀត​រដ្ឋមន្ត្រីការបរទេស អាស៊ាន ដែល​បាន​រៀបចំឡើង តាមរយៈ​ប្រព័ន្ធ​វីដេអូ កាលពី​ថ្ងៃទី​២១ ខែមករា ឆ្នាំ​២០២១ ។​

​ក្រសួងការបរទេស និង​សហប្រតិបត្តិការ​អន្តរជាតិ បាន​ឲ្យ​ដឹងថាៈ កិច្ចប្រជុំ បាន​សម្តែង​ការ គាំទ្រ ចំពោះ​មូលបទ​របស់ ប្រទេស​ប្រ៊ុយណេ «​យើង​យកចិត្តទុកដាក់​, យើង​ត្រៀមលក្ខណៈ​, យើង​រីកចំរើន​» និង​ចំណុច​អាទិភាព​គន្លឹះ​ទាំងបី ដែល​ផ្តោតជាសំខាន់​ទៅលើ ការកសាង សហគមន៍​មួយ ប្រកបដោយ​ភាពសុខដុមរមនា ការត្រៀម​លក្ខណៈ និង​សម្រប​ខ្លួន​សម្រាប់ ពេលអនាគត ដើម្បី​ធានា​សុខុមាលភាព ប្រជាជន​អាស៊ាន និង​អនាគត​ដែល​ប្រកបដោយ សន្តិភាព ចីរភាព និង​វិបុលភាព ក៏ដូចជា ជំរុញ​ការ​ស្តារឡើងវិញ របស់​អាស៊ាន ពី​ជំងឺ​រា​ត ត្បា​ត​សកល​កូ​វីដ​-១៩​។​

​ដើម្បី​អនុវត្ត​បន្ត​នូវ​សន្ទុះ នៃ​កិច្ចខិតខំ​ប្រឹងប្រែង ក្នុង​ការកសាង​សហគមន៍​អាស៊ាន ព្រុយ​ណេ បានដាក់​ចេញ​នូវ គំនិត​ផ្តួចផ្តើម​មួយចំនួន ដើម្បី​បង្កើត​នូវ​និន្នាការ ដែលមាន​លក្ខណៈ យុទ្ធសាស្ត្រ ដើម្បី​ផ្សាភ្ជាប់​ការឆ្លើយតប របស់​អាស៊ាន ទៅនឹង​គ្រោះអាសន្ន និង​គ្រោះ មហន្តរាយ​នានា ក្នុង​គោលបំណង ដើម្បី​ធានាថា សហគមន៍​អាស៊ាន​ទាំងមូល​កាន់តែ​រឹងមាំ ឡើង និង​ត្រៀមលក្ខណៈ​ជាស្រេច សម្រាប់​អនាគត​។ គំនិត​ផ្តួចផ្តើម​ទាំងនោះ រួមមាន ការបង្កើត​វេទិកា ដែល​អាចឱ្យ ប្រជាជន​អាស៊ាន ចូលរួមចំណែក ដល់​កិច្ចប្រឹងប្រែង បន្ធូរបន្ថយ​គ្រោះមហន្តរាយ លើកកម្ពស់​ការប្រកាន់​ភ្ជាប់ នូវ​ពហុភាគី​និយម ជំរុញ​ការ​ស្គាល់ អត្តសញ្ញាណ អាស៊ាន កាន់តែខ្លាំង​ក្លា​ឡើង តាមរយៈ​កម្មវិធី​បណ្តុះ​បណ្តាល​មន្ត្រី​វ័យក្មេង របស់​អាស៊ាន ក៏ដូចជា លើកកម្ពស់​សកម្មភាព របស់​យុវជន នៅក្នុង​របៀបវារៈ​សន្តិ​ភាព និង​សន្តិសុខ​។​

​អំពី​ការកសាង​សហគមន៍​អាស៊ាន រដ្ឋមន្ត្រីការបរទេស​អាស៊ាន បាន​ពិភាក្សា​ពី​ការបន្ដ​តាម ដាន លើ​បញ្ហា​មួយចំនួន បន្ទាប់ពី​កិច្ចប្រជុំ​កំពូល​អាស៊ាន លើក​ទី​៣៧ នៅពេល​វៀតណាម ជា​ប្រធាន​អាស៊ាន ដើម្បី​រក្សា​សន្ទុះ នៃ​កិច្ចខិតខំ​ប្រឹងប្រែង ក្នុង​ការកសាង​សហគមន៍​អាស៊ាន ដូចជា​លទ្ធផល នៃ​ការត្រួតពិនិត្យ ពាក់កណ្តាល​អាណត្តិ នៃ​ការអនុម័ត​ផែនការ​លំអិត សហគមន៍​អាស៊ាន ទាំងបី ព្រមទាំង​ដំណើរការ​រៀបចំ ចក្ខុវិស័យ​សហគមន៍​អាស៊ាន ក្រោយ​ឆ្នាំ ២០២៥ ។

​កិច្ចប្រជុំ ក៏បាន​ពិភាក្សា អំពី​កា​រព​ន្លឿ​ន ការធ្វើសមាហរណកម្ម​អាស៊ាន តាមរយៈ​ការអនុវត្ត ផែនការ​ការងារ នៃ​គំនិត​ផ្តួចផ្តើម សម្រាប់ សមាហរណកម្ម​អាស៊ាន លើក​ទី​៤ (២០២១-២០២៥) ការអនុវត្ត​នូវ​ផែនការមេ ស្តីពី​ការតភ្ជាប់​អាស៊ាន ឆ្នាំ​២០២៥ ឲ្យ​បាន​ពេញលេញ និង​គាំទ្រ​ការស្ដារ​ឡើងវិញ ក្នុង​តំបន់ ក្រោយពី​ជំងឺ​រាតត្បាត​សកល​។​

​ចំពោះ​ការឆ្លើយតប ជា​លក្ខណៈ​តំបន់ ទៅនឹង​ជំងឺ​រាតត្បាត​សកល​កូ​វីដ​-១៩ កិច្ចប្រជុំ បានបង្ហាញ​ការប្តេជ្ញាចិត្ត ដើម្បី​អនុវត្ត​ក្របខណ្ឌ ស្តារឡើងវិញ គ្រប់​ជ្រុងជ្រោយ​របស់ អាស៊ាន ឱ្យបាន​ឆាប់រហ័ស ប្រើប្រាស់​មូលនិធិ សម្រាប់​ការឆ្លើយតប ទៅនឹង​ជំងឺ​កូ​វីដ​-១៩ របស់​អាស៊ាន និង​ធ្វើ​ការងារ​ឆ្ពោះ ទៅរក​ការបង្កើត​ក្របខណ្ឌ ក្នុងការ​រៀបចំ​ច្រក​ធ្វើដំណើរ ក្នុង​អាស៊ាន​។​

​ចំពោះ​ទំនាក់ទំនង ជាមួយ​ភាគី​ខាងក្រៅ កិច្ចប្រជុំ បាន​សង្កត់ធ្ងន់​ម្តងទៀត ពី​សារៈសំខាន់ នៃ​ការពង្រឹង​ម​ជ្ឈ​ភាព និង​ឯកភាព​អាស៊ាន ក្នុង​ទំនាក់ទំនង ជាមួយ​ដៃគូ​ខាងក្រៅ​របស់ អាស៊ាន តាមរយៈ​យន្តការ​ដឹកនាំ ដោយ​អាស៊ាន​។ រដ្ឋមន្ត្រីការបរទេស​អាស៊ាន​បាន​អបអរ សារ​ទរ ការចូល​កាន់តំណែង របស់​រដ្ឋបាល សហរដ្ឋអាមេរិក​ថ្មី និង​រំពឹង ពង្រឹង​ភាពជា​ដៃគូ យុទ្ធសាស្ត្រ​អាស៊ាន – សហរដ្ឋអាមេរិក និង ជំរុញ​កិច្ចសហប្រតិបត្តិការ​កំរិត​ខ្ពស់ ដើម្បី​លើក កម្ពស់​សន្តិភាព សន្តិសុខ ស្ថិរភាព និង​វិបុលភាព នៅក្នុង​តំបន់​។​

​កិច្ចប្រជុំ ក៏បាន​គូសបញ្ជាក់ ពី​សារៈសំខាន់ នៃ​ខួប​លើក​ទី​៣០ នៃ​ទំនាក់ទំនង​ដៃគូ​សន្ទនា អាស៊ាន​-​ចិន ដោយ​ភាគី​ទាំងពីរ ធ្វើការ​រួមគ្នា លើ​គំនិត​ផ្តួចផ្តើម ដើម្បី​ជំរុញ​បន្ថែម​នូវ ទំនាក់ទំនង​គ្រប់​កំរិត ដើម្បី​សុខុមាលភាព និង​ការអភិវឌ្ឍ ប្រកបដោយ​សន្តិភាព នៅក្នុង​តំបន់ ។​

​សម្រាប់​បញ្ហា​ក្នុង​តំបន់ និង​អន្តរជាតិ រដ្ឋមន្ត្រី បាន​ចែករំលែក​ទស្សនៈ និង​ការយល់ឃើញ លើ​បញ្ហា​មួយចំនួន រួមមាន ទិដ្ឋភាព​ភូមិសាស្ត្រ នយោបាយ ការវិវឌ្ឍ​នៅ​តំបន់​ឧបទ្វីប​កូរ៉េ សេដ្ឋកិច្ច ពណ៌​ខៀវ បញ្ហា​រដ្ឋ​រ៉ា​ខា​ញ និង​បញ្ហា​សមុទ្រ​ចិន​ខាងត្បូង​។​

​ក្នុង​កិច្ចប្រជុំ លោក​ឧបនាយករដ្ឋមន្ត្រី បានលើកឡើង​នូវ​ចំណុច​មួយចំនួន ដូចខាងក្រោម​៖
– ចំពោះ​គំនិត​ផ្តួចផ្តើម​សំខាន់ៗ​របស់​អាស៊ាន​ក្នុងការ​ឆ្លើយតប​ជំងឺ​កូ​វីដ​-១៩ ឯកឧត្តម ឧបនាយករដ្ឋមន្ត្រី បាន​ស្នើថា អាស៊ាន គួរតែ​បង្កើន​ចំនួន​ទឹកប្រាក់ មូលនិធិ​អាស៊ាន ក្នុងការ​ឆ្លើយតប ទៅនឹង​ជំងឺ​កូ​វីដ​-១៩ តាមរយៈ​ការធ្វើទំនាក់ទំនង ជាមួយ​វិស័យ​ឯកជន ដើម្បី​ចូលរួម​ការបរិច្ចាគ​។​

– សម្រាប់​ម​ជ្ឈ​ភាព​អាស៊ាន លោក​ឧបនាយករដ្ឋមន្ត្រី បាន​សង្កត់ធ្ងន់ថា «​មាគ៌ា​អាស៊ាន​» ដែល​ឈរលើ​គោលការណ៍ ពិគ្រោះ​យោបល់ និង​កុងសង់ស៊ីស ការមិន​ជ្រៀតជ្រែក កិច្ចការ​ផ្ទៃក្នុង និង​សិទ្ធិ​អធិបតេយ្យភាព ស្មើភាព​គ្នា គឺ​រឹតតែ​សមស្រប សម្រាប់​អាស៊ាន នៅពេល​ជួប​ជាមួយ​ភាពបត់បែន នៅ​ក្នុងការ​តំរង់ទិស ប្រឈម​នឹង​ការប្រកួតប្រជែង របស់​ប្រទេស​មហាអំណាច​។​

– ចំពោះ​ទំនាក់ទំនង ជាមួយ​ភាគី​ខាងក្រៅ លោក​ឧបនាយករដ្ឋមន្ត្រី បានបញ្ជាក់​សាជាថ្មី អំពី​ការស្វាគមន៍​របស់​កម្ពុ​ជា ចំពោះ​ការទទួលយក ចក្រភព​អង់គ្លេស ជា​ដៃគូ​សន្ទនា របស់​អាស៊ាន និង​លើកទឹកចិត្ត​អាស៊ាន ឱ្យ​ដោះស្រាយ​នូវ រាល់​បញ្ហា​នីតិវិធី​នានា ។​

– ចំពោះ​បញ្ហា​ភាពជា​ដៃគូ​សេដ្ឋកិច្ច គ្រប់​ជ្រុងជ្រោយ​ក្នុង​តំបន់ (RCEP)​លោក​ឧបនាយក រដ្ឋមន្ត្រី បាន​សម្ដែង​នូវ​ទំនុកចិត្ត​លើ RCEP ថា​ជា​ចលករ ដ៏​សំខាន់ នៃ​ការស្តារ និង​ធ្វើ សមាហរណកម្ម សេដ្ឋកិច្ច​ក្នុង​តំបន់ ហើយ​បាន​លើកទឹកចិត្ត ដល់​ប្រទេស ដែល​ចូលរួម​ក្នុង RCEP ទាំងអស់ ព​ន្លឿ​ន​ដំណើរ​ការផ្តល់​សច្ចាប័ន​។​

– អំពី​ការវិវត្ត​នៅ​ឧបទ្វីប​កូរ៉េ លោក បាន​លើកទឹកចិត្ត ឲ្យ​មានការ​ចូលរួម​កំរិត​ខ្ពស់​ជាមួយ នឹង​សាធារណរដ្ឋ​ប្រជាមានិត ប្រជាធិបតេយ្យ​កូរ៉េ តាមរយៈ​វេទិកា តំបន់​អាស៊ាន (ARF) ដើម្បី​បង្កើត​ការយោគយល់ កាន់តែ​ប្រសើរឡើង និង​អាចធ្វើឱ្យ​មានការ​អភិវឌ្ឍ ជា​វិជ្ជមាន​។

– ចំពោះ​បញ្ហា​សមុទ្រ​ចិន​ខាងត្បូង កម្ពុជា ចែករំលែក​ក្តី​ប្រាថ្នា រួម​ចង់ឃើញ​សមុទ្រ​ចិន ខាងត្បូង ជា​សមុទ្រ​សន្តិភាព ស្ថិរភាព កិច្ចសហប្រតិបត្តិការ និង​វិបុលភាព​។ កម្ពុជា តែងតែ​លើកទឹកចិត្ត ដល់​ភាគី​ពាក់ព័ន្ធ ដោយផ្ទាល់ ដើម្បី​ដោះស្រាយ​ភាពខុសគ្នា​ប្រកប ដោយ​ការយោគយល់​គ្នា តាមរយៈ​កិច្ចពិភាក្សា ដោយ​សន្តិវិធី ផ្អែកលើ​គោលការណ៍ ច្បាប់​អន្តរជាតិ ដែល​ត្រូវបាន​ទទួលស្គាល់ ជា​សាកល រួមទាំង​អនុសញ្ញា​អង្គការ​សហ​ប្រជា ជាតិ ស្ដីពី​ច្បាប់​សមុទ្រ (UNCLOS) ឆ្នាំ ១៩៨២ ផងដែរ​។ លោក​ក៏បាន​សង្កត់ធ្ងន់​ផងដែរ ឱ្យ​បន្ត​កិច្ចចរចា​លើ​ក្រម​ប្រតិបត្តិ (COC) តាមរយៈ​ប្រព័ន្ធ​វីដេអូ ដើម្បី​បញ្ចប់ COC ឱ្យបាន​ឆាប់ ដែលមាន​ប្រសិទ្ធិភាព ប្រកបដោយ​ខ្លឹមសារ និង​ស្របតាម​ច្បាប់​អន្តរជាតិ ។​

– ចំពោះ​បញ្ហា​រដ្ឋ​រ៉ា​ខា​ញ កម្ពុជា មាន​សេចក្តី​រីករាយ ចំពោះ​វឌ្ឍនភាព ដែល​សម្រេចបាន កន្លងមក លើ​ការអនុវត្ត​អនុសាសន៍ ដែល​ត្រូវបាន​ធ្វើឡើង​តាមរយៈ​ការវាយតម្លៃ​តម្រូវការ បឋម និង​គាំទ្រ​ដល់​ក្រុមការងារ​លេខាធិការដ្ឋាន​អាស៊ាន ឱ្យ​បន្ត​ចាត់វិធានការ និង​តាមដាន យ៉ាង​យកចិត្តទុកដាក់ លើ​បញ្ហា​មនុស្សធម៌ ក្នុង​តំបន់​នេះ​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular