អញ្ជើញ​ម្ចាស់​សណ្ឋាគារ​និង​ខុន​ដូ មក​ប្រជុំ​ផ្សព្វផ្សាយ ដើម្បី​ចូលរួម​ទប់ស្កាត់​ជំងឺ​កូ​វីដ​-១៩ និង​គ្រប់គ្រង​ភ្ញៀវ​អោយបាន​ល្អ​

ដោយ​: រ៉ា​ម៉ន / ភ្នំពេញ​: ដើម្បីឱ្យ​ម្ចាស់ សណ្ឋាគារ​និង​ខុន​ដូ ដែល​បាននិងកំពុង​ធ្វើ​អាជីវកម្ម​នៅក្នុង​រាជធានី​ភ្នំពេញ បាន​យល់ដឹង​អំពី​យន្តការ​ច្រកចេញចូល​តែមួយ​របស់​រដ្ឋបាល​រាជធានី​ភ្នំពេញ វិធាន​សុវត្ថិភាព​ទេសចរណ៍ ក្នុងការ​ទប់ស្កាត់​នូវ​ជំងឺ​កូ​វីដ​-១៩​និង​ដើម្បីឱ្យ​ម្ចាស់​សណ្ឋាគារ​និង​ខុន​ដូ គ្រប់គ្រង​ភ្ញៀវ​បានល្អ នា​រសៀល​ថ្ងៃទី​២១ មករា​នេះ អាជ្ញាធរ​រាជធានី​ភ្នំពេញ​បាន​កោះហៅ​បងប្អូន ដែលជា​ម្ចាស់​សណ្ឋាគារ​និង​ខុន​ដូ មក​ប្រជុំ​ផ្សព្វផ្សាយ ស្តីពី​ការ​សេវាសាធារណៈ តាម​យន្តការ​ច្រកចេញចូល​តែមួយ​រាជធានី​ភ្នំពេញ និង​វិធាន​សុវត្ថិភាព​ទេសចរណ៍ ដើម្បី​ទប់ស្កាត់​នូវ​ជំងឺ​កូ​វីដ​-១៩ និង​វិធាន​ការពង្រឹង​ការគ្រប់គ្រង​ភ្ញៀវ​ទេសចរណ៍​សេវាកម្ម​ស្នាក់នៅ វិស័យ​ទេសចរណ៍​។​

​ពិធី​នេះ​ធ្វើឡើង​ក្រោម​វត្តមាន​លោក​ហួត ហៃ អភិបាលរង​រដ្ឋបាល​ភ្នំពេញ តំណាងអោយ​លោក​ឃួ​ង ស្រេង អភិបាល​រាជធានី​ភ្នំពេញ លោក ងី មាន​ហេង ប្រធាន​មន្ទីរ​សុខាភិបាល​រាជធានី​ភ្នំពេញ និង​លោក ម៉ម វាសនា ប្រធាន​មន្ទីរ​ទេសចរណ៍​រាជធានី​ភ្នំពេញ​។​

​លោក ហួត ហៃ បាន​មានប្រសាសន៍​លើកឡើងថា គោលបំណង​នៃ​ពិធី​នេះ គឺ​ចង់ឱ្យ​បងប្អូន​ជា​ម្ចាស់​សណ្ឋាគារ ម្ចាស់​សេវាកម្ម​ស្នាក់នៅ​និង​ម្ចាស់​ខុន​ដូ បាន​យល់ដឹង​អំពី​យន្តការ​ច្រកចេញចូល​តែមួយ​នៅ​រដ្ឋបាល​រាជធានី​ភ្នំពេញ​ផង និង​វិធាន​សុវត្ថិភាព​ទេសចរណ៍​ដើម្បី​ទប់ស្កាត់​នូវ​ជំងឺ​កូ​វីដ​-១៩ ការគ្រប់គ្រង​ភ្ញៀវ​អោយបាន​ល្អ ពិសេស​ពេលដែល​ភ្ញៀវ​ចេញ ចូល ស្នាក់នៅ​ដាច់ខាត​ត្រូវតែ​កូ​ពី​អត្តសញ្ញាណប័ណ្ណ​ឬ​ប៉ាស្ព័រ​របស់​ពួកគាត់ ហើយ​បើ​មាន​បទល្មើស​កើតឡើង​យើង​អាច​ស្រាវជ្រាវ​រក​ជនសង្ស័យ​ឃើញ​។ គោលបំណង​មួយទៀត​គឺ​រដ្ឋបាល​រាជធានី​ភ្នំពេញ​ចង់អោយ​បងប្អូន​ដែល​មិនទាន់​បានមក​បំពេញ​ច្បាប់ រួសរាន់​មក​បំពេញ​ច្បាប់​នៅ​ច្រកចេញចូល​តែមួយ​រាជធានី​ភ្នំពេញ​។​

​លោក ហួត ហៃ បាន​បញ្ជាក់ថា រដ្ឋបាល​រាជធានី​ភ្នំពេញ បាន​ចាប់ដំណើរការ​អង្គភាព​ច្រកចេញចូល​តែមួយ ដើម្បី​ផ្តល់​សេវា​ចំនួន​១៤​ប្រភេទ​ធំៗ ស្របតាម​តារាង​ឧបសម្ព័ន្ធ​ទី​២ នៃ​អនុក្រឹត្យ​លេខ​១៨ អនក្រ​.​បក ចុះ​ថ្ងៃទី​០៨ ខែកុម្ភៈ ឆ្នាំ​២០១៧ ក្នុងនោះ​រួមមាន ការងារ​នីត្យានុកូលកម្ម ការបញ្ជាក់​ឯកសារ​ថ​ត​ចម្លង ការងាររដ្ឋបាល វិស័យ​សុខាភិបាល វិស័យ​ទេសចរណ៍ វិស័យ​ព័ត៌មាន វិស័យ​សាធារណការ នឹង​ដឹកជញ្ជូន វិស័យ​វប្បធម៌ និង​វិចិត្រសិល្បៈ វិស័យ​បរិស្ថាន វិស័យ​ឧស្សាហកម្ម និង​សិប្បកម្ម វិស័យ​រ៉ែ និង​ថាមពល វិស័យ​ពាណិជ្ជកម្ម វិស័យ​ការងារ និង​បណ្តុះបណ្តាល​វិជ្ជាជីវៈ វិស័យ​កសិកម្ម រុក្ខាប្រមាញ់ និង​នេសាទ វិស័យ​រៀបចំ​ដែនដី នគរូបនីយកម្ម និង​សំណង់​៕​

ទីតាំងផ្សាយពាណិជ្ជកម្ម

- Advertisment -

Most Popular