វិធានការ​៤​ចំណុច​ដើម្បី​ប្រសិទ្ធភាព​ក្នុងការ​កាត់បន្ថយ​ផលប៉ះពាល់​ដោយ​គ្រឿង​ស្រវឹង​

​ដោយ​: បូកគោ / កំពត​: ក្នុង​មួយឆ្នាំៗ មនុស្ស​ជាង​៣​លាន​នាក់ នៅលើ​ពិភពលោក​បាន​បាត់បង់​ជីវិត ដោយសារ​គ្រឿង​ស្រវឹង​។ ផ្តើមចេញពី​វិបត្តិ​នេះ អង្គការ​សុខភាព​ពិភពលោក​បាន​រកឃើញ​វិធានការ​៤​យ៉ាង ដែល​ត្រូវយក​ម​មកប្រើប្រាស់ ដើម្បី​ប្រសិទ្ធភាព​ក្នុងការ​កាត់បន្ថយ​ផលប៉ះពាល់​ពី​គ្រឿង​ស្រវឹង​នោះ​។​

​ក្រោយ​បញ្ចប់​វគ្គ​បណ្តុះបណ្តាលរ​យៈ​ពេល​២​ថ្ងៃ ដល់​អ្នកសារព័ត៌មាន មកពី​១៦​អង្គភាព ស្តីពី​ផលប៉ះពាល់​ដោយ​គ្រឿង​ស្រវឹង កាលពី​រសៀល​ថ្ងៃទី​២១ ខែមករា ឆ្នាំ​២០២១ លោក​សុង ឌៀ​រ៉ា​ក់ មន្ត្រី​គម្រោង​អង្គការ​ចលនា ដើម្បី​សុខភាព​កម្ពុជា​បាន​អធិប្បាយ​អំពី​ខ្លឹម​សារសំខាន់​មួយចំនួន ជាការ​បញ្ជ្រាប​បន្ថែម​។ លោក​បាន​បញ្ជាក់ថា គ្រឿង​ស្រវឹង​ជា​មូលហេតុ​ទី​៣ ដែល​បណ្ដាលឱ្យមាន​អ្នកស្លាប់​ច្រើន​ជិត​៣​លាន​នាក់ នៅលើ​ពិភពលោក​តាមរយៈ​ជំងឺ​ជាង​២០០​ប្រភេទ​។ ជំងឺ​ធំៗ ដូចជា​មហារីក​បំពង់​អាហារ មហារីក​ថ្លើម លើស​សម្ពាធ​ឈាម ស្ទះ​សរសៃឈាម​បេះដូង ខួរក្បាល ក្រិន​ថ្លើម រលាក​លំពែង វិកល​វិបល្លាស​ជាដើម​។ សម្រាប់​កម្ពុជា គ្រឿង​ស្រវឹង​ជាដើម​ហេតុ​ចម្បង​ទី​២ ដែល​បណ្ដាលឱ្យមាន​គ្រោះថ្នាក់​ចរាចរ​ដោយ​ក្នុង​ឆ្នាំ​២០១៤ ជនរងគ្រោះ​ជាង​២.០០០​នាក់​បាន​ស្លាប់ និង​របួស ព្រមទាំង​ខាតបង់​ទ្រព្យសម្បត្តិ​មានតម្លៃ​ប្រមាណ​៤៤​លាន​ដុល្លារ​។​

​លោក សុង ឌៀ​រ៉ា​ក់ បាន​បន្តថា ជា​កិច្ច​ឆ្លើយតប​ចំពោះ​ហានិភ័យ​ទាំងនេះ អង្គការ​សុខភាព​ពិភពលោក​បាន​រកឃើញ​នូវ​វិធានការ​៤​ចំណុច ដើម្បី​កាត់បន្ថយ​ផលប៉ះពាល់​ដោយ​គ្រឿង​ស្រវឹង​។ ក្នុងនោះ រួមមាន ១. ហាម​ការផ្សាយពាណិជ្ជកម្ម​គ្រឿង​ស្រវឹង​គ្រប់​ទម្រង់​, ២. កំណត់​អាយុ​អ្នកទិញ និង​អ្នកប្រើប្រាស់​គ្រឿង​ស្រវឹង​, ៣. ផ្តល់​អាជ្ញាប័ណ្ណ​ដោយ​កំណត់​ទីតាំង​លក់ និង​ទីតាំង​ប្រើប្រាស់​គ្រឿង​ស្រវឹង​, ៤. ដំឡើង​ពន្ធ​ដែលជា​វិធានការ​ឈ្នះ​ឈ្នះ ដោយ​អ្នកប្រើប្រាស់​កាត់បន្ថយ​បរិមាណ នៃ​ការសេព ហើយ​រដ្ឋ​បាន​ប្រាក់ចំណូល​ច្រើន​។ វិធានការ​ទាំងនេះ​មាន​ប្រសិទ្ធភាព​ទាមទារ​ឱ្យមាន​ច្បាប់​ស្តីពី​ការគ្រប់គ្រង​គ្រឿង​ស្រវឹង​ជា​ចម្បង​៕​

ទីតាំងផ្សាយពាណិជ្ជកម្ម

- Advertisment -

Most Popular