Home ព័ត៌មានជាតិ សេដ្ឋកិច្ច រដ្ឋមន្ត្រីក្...

រដ្ឋមន្ត្រីក្រសួង​កសិក​ម្មៈ ដី​នៅ​ខេត្តព្រៃវែង​ត្រូវបាន​អ្នកជំនាញ​ចុះទៅ​ធ្វើ​បច្ចុប្បន្នភាព ចំណាក់​ថ្នាក់​ដី និង​កំណត់​ផែនទីដី​ដាំ​ដុះ​ដំណាំ​ស្រូវ

ដោយៈ ជា សីហៈ​/​ភ្នំពេញៈ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង នេសាទ បានបង្ហាញ​តាម​បណ្តាញ​សង្គម​របស់លោក​ថា​ខេត្ត​ដែល​ត្រូវបាន​នាយកដ្ឋាន គ្រប់គ្រង​ធនធាន​ដី​កសិកម្ម​ចុះទៅ​ធ្វើ​បច្ចុប្បន្នភាព​ចំណាត់ថ្នាក់​ដី និង​ផែនទីដី​ដាំ​ដុះ​ដំណាំ ស្រូវ​គឺ​ខេត្តព្រៃវែង​។

​លោក​បាន​បន្តថា​ទៀតថា ការកំណត់​នេះ​គឺ​ធ្វើ​កាលពី​ក្នុង​ឆ្នាំ​២០២០ ដោយ​ប្រើប្រាស់​ប្រព័ន្ធ ធ្វើ​ចំណាត់ថ្នាក់​ដី​តាមបែប​ក្សេត្រ​វិ​ទ្យ​របស់​កម្ពុជា ហើយ លទ្ធផល​នៃ​ការសិក្សា​ស្រាវជ្រាវ លម្អិត​បាន​បង្ហាញថា ខេត្ត​ព្រៃ វែង​មាន​ដី​ចំនួន ០៧​ក្រុម ដែលមាន​លក្ខណៈសម្បត្តិ ដូចខាងក្រោម​៖

១. ក្រុម​ដីព្រៃ​ខ្មែរ​៖ គឺជា​ដី​កកើតឡើង​នៅលើ​ល្បាប់​ចាស់​មាន​លក្ខណៈ​ជា​ប្រភេទ​ដីខ្សាច់ ដែលមាន​ជម្រៅ​ជ្រៅ​ជាង​៥០​ស​.​ម ពិបាក​គ្រប់គ្រង​ដោយសារ​មាន​សារធាតុសរីរាង្គ​ទាប និង​ខ្សាច់​ច្រើន​។ ក្រុម​ដី​ប្រភេទ​នេះ​មាន​កម្រិត​ជីជាតិ​ទាប និង​ជាទូទៅ ខ្វះ​សារធាតុ​អាសូត ផូស្វ័រ (P) ប៉ូ​តា ស្យូ​ម (K) ស្ពាន់ធ័រ (S) និង​ម៉ាញ៉េ​ស្យូ​ម (Mg) ហើយ​មាន​ការពុល​ជាតិ​ដែក សមត្ថភាព​រក្សា​ទឹក​ទុក​ទាប និង​កម្រិត​ហូរ​ច្រោះ​ខ្ពស់​។ ក្រុម​នេះ​មាន​ផ្ទៃដី​ចំនួន ៧៩៦​ហ​.​ត តិចជាង​១% នៃ​ផ្ទៃដី​សរុប​ទូទាំង​ខេត្ត​។ ដី​ប្រភេទ​នេះ​មាន​លក្ខណៈ​សមស្រប​កម្រិត​ទាប សម្រាប់​ដំណាំ​ស្រូវ និង​ស្វាយ ចន្ទី និង​អាច​ដាំ​ដុះ​ដំណាំ​ដូចជា​សណ្តែកបាយ ឆៃថាវ ឪឡឹក និង​អំពៅ​។ ដោយសារ​គុណវិបត្តិ​របស់​វា ចាំបាច់​ត្រូវ​ប្រើ​សារធាតុសរីរាង្គ​ឱ្យបាន​ញឹកញាប់ ដូចជា​ជី​ស្រស់ (​ស្នោរ​) ជី​កំ​ប៉ុស្តិ៍​លាមក​សត្វ ភ្ជួរ​លុប​ចំបើង ឬ​គល់​ជញ្ជ្រាំង​ទៅក្នុង​ដី ចំពោះ​ជី​អាសូត ត្រូវ​បាច​ដោយ​កប់​លុប​ទៅក្នុង​ដី​។

២. ក្រុម​ដី​ប្រទះ​ឡាង​៖ គឺជា​ដី​កកើតឡើង​នៅលើ​ល្បាប់​ចាស់​ដែលមាន​ដីខ្សាច់​នៅ​ស្រទាប់ លើ​មាន​កម្រាស់​តិចជាង ៤០​ស​.​ម ហើយ​ដី​ស្រទាប់​ក្រោម​មាន​លក្ខណៈ​ជា​ល្បាយ ឬ​ឥដ្ឋ​។ ប្រភេទ​ដី​នេះ​មាន​កម្រិត​ជីជាតិ​ទាប និង​ជាទូទៅ ខ្វះ​សារធាតុ​អាសូត ផូ​ស្វ​រ័ (P) ប៉ូ​តា​ស្យូ​ម (K) ស្ពាន់ធ័រ (S) ម៉ាញ៉េ​ស្យូ​ម (Mg) និង​ប័​រ (B) ហើយ​ងាយ​ក្តាំង​ស្រទាប់​លើ ដី​រាក់​មាន​គ្រួស​រវៀន មានការ​ពុល​ជាតិ​ដែក សមត្ថភាព​រក្សា​ទឹក​ទុក​ទាប និង​កម្រិត​ហូរ​ច្រោះ​ខ្ពស់​។ ដី​ប្រភេទ​នេះ មាន​ចំនួន ១៥៥ ៤៥៣ ហ​.​ត ស្មើនឹង ៣១% នៃ​ផ្ទៃដី​សរុប​ទូទាំង​ខេត្ត និង​មាន​លក្ខណៈ​សម ស្រប​សម្រាប់​ដំណាំ​ស្រូវ​។ ដី​នេះ​ក៏​អាច​ដាំ​ដុះ​ដំណាំ​សណ្តែកបាយ ឆៃថាវ ឪឡឹក អំពៅ និង​ស្វាយចន្ទី​។ ដើម្បី​លើកកម្ពស់​គុណភាព​ដី ចាំបាច់​ត្រូវ​ប្រើ​សារធាតុសរីរាង្គ​ឱ្យបាន ញឹកញាប់​ដូចជា ជី​ស្រស់ (​ស្នោរ​) ជី​កំ​ប៉ុស្តិ៍​លាមក​សត្វ ភ្ជួរ​លុប​ចំបើង ឬ​គល់​ជញ្ជ្រាំង​ទៅក្នុង​ដី ចំពោះ​ជី​អាសូត ត្រូវ​បាច​ដោយ​កប់​លុប​ទៅក្នុង​ដី​។

៣. ក្រុម​ដី​ក្រគរ​៖ គឺជា​ដី​កកើត​ឡើងលើ​វាលទំនាប​ល្បាប់​ថ្មី​លិច​ទឹកស​កម្ម​ដែលមាន​លក្ខណៈ ជា​ដី​ល្បាយ​ឥដ្ឋ ឬ​ឥដ្ឋ មាន​ពណ៌​ប្រផេះ​ទៅ​ត្នោត និង​បែក​ក្រហែង​ពី​តូច​ទៅ​មធ្យម​តែ​មិន​ជ្រៅ ជាង ៥ ស​.​ម នៅពេល​ដី​ស្ងួត​។ ដីស្រទាប់លើ​ជា​ប្រភេទ​ដី​ល្បាយ ឬ​ដីឥដ្ឋ ហើយ​កន្លែង​ខ្លះ ឆ្លើយតប​តែ​នឹង​ការដាក់​ជី​អាសូត និង​ផូ​ស្វ​រ័ (P)​។ នៅ​កន្លែង​ខ្លះ​ដី​នេះ​អាចមាន​បញ្ហា​អាស៊ីត ស៊ុ​ល​ផាត និង​មាន​ភាព​ហើម​នៅពេល​សើម​។ ដី​ប្រភេទ​នេះ​មាន​ចំនួន ៦៣ ១៦៦ ហ​.​ត ស្មើនឹង ១៣% នៃ​ផ្ទៃដី​សរុប និង​មាន​ភាពសមស្រប​សម្រាប់​ដំណាំ​ស្រូវ​ហើយ​បើ​មាន​ប្រភព ទឹក​អាច​ដាំ​ដុះ​ដំណាំ​រួមផ្សំ​ក្នុង​រដូវប្រាំង​បាន​។​

៤. ក្រុម​ដី​បាកាន​៖ ដី​នេះ​កកើតឡើង​នៅលើ​វាលទំនាប​ល្បាប់​ចាស់​ដែលមាន​ដី​ស្រទាប់ លើ​ជា​ល្បាយ ឬ​ជា​ដីឥដ្ឋ ហើយ​មិន​បែក​ក្រហែង​ទេ​។ វា​មាន​ពណ៌​ប្រផេះ ឬ​ត្នោត​។ ដី​នេះ​មាន កម្រិត​ជីជាតិ​ពី​ទាប​ទៅ​មធ្យម ហើយ​ជាទូទៅ​វា​ខ្វះ​សារធាតុ​អាសូត ផូ​ស្វ​រ័ (P) និង​ប៉ូ​តា​ស្យូ​ម (K) ហើយ​មាន​ការពុល​ជាតិ​ដែក និង​ស្ពាន់ធ័រ (S)​។ ក្រុម​ដី​បាកាន​មាន រចនាសម្ព័ន្ធ​ខ្សោយ មាន​លក្ខណៈ​ស​សុះ និង​ផ្ទៃ​ខាងលើ​ងាយ​ហាប់​ណែន​។ ក្រុម​នេះ​មាន​ចំនួន​ប្រមាណ ២៣០ ១៩១​ហ​.​ត ស្មើនឹង ៤៧% នៃ​ផ្ទៃដី​សរុប វា​អំណោយផល​សម្រាប់​ដំណាំ​ស្រូវ បន្លែ និង​ដំណាំ ឈើ​ហូប​ផ្លែ​។

៥. ក្រុម​ដីគោក​ត្រប់​៖ គឺជា​ដី​ដែលមាន​វាយនភាព​ដី​ល្បាយ ឬ​ឥដ្ឋ មាន​ពណ៌​ប្រផេះ​ក្រ​ម៉ៅ ឬ​ត្នោត​ក្រ​ម៉ៅ​ទៅ​ខ្មៅ និង​បែក​ក្រហែង​ពី​តូច​ទៅ​មធ្យម រាក់​ឬ​ជ្រៅ​ជាង ៤ ស​.​ម នៅពេល ដី​ស្ងួត​។ ក្រុម​នេះ​បានកកើតឡើង​នៅលើ​វាល​ល្បាប់​ជំនន់​ចាស់​ដែលមាន​ទំនាក់​ទ​នង នឹង​ជំនោរ​ទឹកសមុទ្រ មាន​សក្តានុពល​ពី​មធ្យម​ទៅ​ខ្ពស់ និង​ងាយស្រួល​ក្នុងការ​គ្រប់គ្រង​។ ជាទូទៅ ក្រុម​នេ មាន​កម្រិត​ផូស្វ័រ (P) ទាប​ខ្លាំង ខ្វះ​សារធាតុ​អាសូត និង​ប៉ូ​តា​ស្យូ​ម (K) មាន​ភាពអាស៊ីត​ខ្លាំង ព្រមទាំង​មានការ​ពុល​ជាតិ​ដែក​។ ដី​ប្រភេទ​នេះ​មាន​ចំនួន ៤០៥ ហ​.​ត គឺ​តិចជាង ១% នៃ​ផ្ទៃដី​សរុប និង​មាន​ភាពសមស្រប​សម្រាប់​ដំណាំ​ស្រូវ និង​អំពៅ​។

៦. ក្រុម​ដី​កៀនស្វាយ​៖ គឺជា​ដី​មាន​ជម្រៅ​ជ្រៅ​ក្នុង​តំបន់​លិច​ទឹក​ក្បែរ​ទន្លេ មាន​លក្ខណៈ​ជា ដី​ល្បាយ ឬ​ជា​ដីឥដ្ឋ មាន​ពណ៌​ត្នោត​ភ្លឺ​ទៅ​ត្នោត​ដិត ហើយ​ប្រេះ​ក្រហែង​ធំៗ​នៅពេល​ស្ងួត​។ ដី​ប្រភេទ​នេះ​កកើត​នៅលើ​ច្រាំងទន្លេ និង​លើ​ទំនាប​ជម្រាល​ពី​ច្រាំងទន្លេ​។ ជាទូទៅ វា​ខ្វះ​សារធាតុ​អាសូត និង​ផូ​ស្វ​រ័ (P)​។ ដី​ប្រភេទ​នេះ​មាន​ចំនួន​ប្រមាណ​ជា ៣៧ ៥១០​ហ​.​ត ស្មើនឹង ៨% នៃ​ផ្ទៃដី​សរុប និង​មាន​ភាពសមស្រប​សម្រាប់​ដំណាំ​ស្រូវ និង​សាកវប្បកម្ម និង​មាន​សក្តានុពល​ខ្ពស់​សម្រាប់​ដំណាំ​រួមផ្សំ​ក្នុង​រដូវប្រាំង​។​

៧. ក្រុម​ដី​កំពង់សៀម​៖ ដី​មានកំណើត​ពី​កំណក​នៃ​ការ​ពុកផុយ​របស់​ថ្ម​បា​សាល់ ឬ​ថ្មកំបោរ ហើយ​គេ​តែងតែ​សង្កេតឃើញ​មាន​វត្តមាន​ដុំ​គ្រួស ថ្ម​បា​សាល់​ឬ​ថ្មកំបោរ​នៅ​ទាំង​ក្នុង​ស្រទាប់ លើ និង​ស្រទាប់​ក្រោម​នៃ​ដី​ប្រភេទ​នេះ​។ ដី​នេះ​មាន​វាយនភាព​ជា​ដីឥដ្ឋ​ដែលមាន​ពណ៌​ខ្មៅ ឬ​ប្រផេះ​ក្រ​ម៉ៅ ហើយ​នៅពេល​ស្ងួត​វា​មាន​សភា​ពរឹង​ខ្លាំង និង​បង្កើតបានជា​ក្រហែង​ធំៗ ជ្រៅៗ​នៅ​ពីលើ​ដីឥដ្ឋ​ស្រទាប់​ក្រោម​។ ដី​ប្រភេទ​នេះ​មាន​ជីជាតិ​ល្អ ក៏ប៉ុន្តែ​ជាទូទៅ​វា​ខ្វះ សារធាតុ​អាសូត ផូស្វ័រ (P) និង​ស័​ង្គ​សី (Zn) មានការ​ពុល​ជាតិ​ដែក និង​ភាព​ស្អិត​ខ្លាំង នៅពេល​សើម​។ ដី​ប្រភេទ​នេះ​មាន​ចំនួន​ប្រមាណ​ជា ១ ១០៤ ហ​.​ត គឺ​តិចជាង ១% នៃ​ផ្ទៃដី​សរុប និង​មាន​ភាពសមស្រប​សម្រាប់​ដំណាំ​ស្រូវ ហើយ​ប្រសិនបើ​មាន​ប្រភពទឹក អាច​ដាំ​ដំណាំ​រួមផ្សំ​ក្នុង​រដូវប្រាំង​បាន​។​

​សូម​ជម្រាបជូន​ថា ខេត្តព្រៃវែង​គ្របដណ្តប់​ដោយ​វាលស្រែ​ដ៏​ធំ​ល្វឹងល្វើយ​ដែលជា​តំបន់ ទំនាប​ដំណាំ​ស្រូវ​រដូវវស្សា និង​ស្រូវ​រដូវប្រាំង ព្រមទាំង​មាន​ដី​ដាំ​ដំណាំ​រួមផ្សំ សាកវប្បកម្ម និង​ដំណាំ​ក​សិ​-​ឧស្សាហកម្ម​ផងដែរ​។ ក្នុង​ឆ្នាំ​២០២០ តាមរយៈ​របាយការណ៍​របស់​មន្ទីរ កសិកម្ម រុក្ខាប្រមាញ់ និង​នេសាទ​ខេត្ត​បានឱ្យដឹងថា​ខេត្តព្រៃវែង​មាន​ផ្ទៃដី​ដាំ​ដុះ​ស្រូវ​សរុប ចំនួន ៣៣៧ .០០០​ហ​.​ត ព្រមទាំង​មាន​ផ្ទៃដី​ដាំ​ដំណាំ​រួមផ្សំ​សរុប​ចំនួន ១២ .០០០​ហ​.​ត​៕​/PC

ទីតាំងផ្សាយពាណិជ្ជកម្ម

- Advertisment -

Most Popular