ដោយៈ តាកែវ / តាកែវៈ មន្ត្រីសាខា ក.ប.ប ខេត្តតាកែវ បានបញ្ជាក់ថាៈ ការលក់ផលិតផល មុខម្ហូបអាហារ របស់អាជីវករ ក្នុងស្តង់ពិព័រណ៍ខ្មែរ ក្នុងក្រុងដូនកែវ មិនមានសាធាតុគីមី ឬផលិតផល ហួសកាបរិច្ឆេទទេ ដូច្នេះប្រជាពលរដ្ឋ ដែលមកទស្សនាកំសាន្តអាចទិញ ពិសាបាន ទៅតាមតម្រូវការរបស់ខ្លួន ។
ការបញ្ជាក់យ៉ាងដូច្នេះ គឺក្រោយពេលដែលលោក លី សេរីសម្បត្តិ ប្រធានសាខា ក.ប.ប ខេត្តតាកែវ សហការជាមួយនឹងមន្ទីរពាណិជ្ជកម្មខេត្ត នៅរសៀលថ្ងៃទី ២២ ខែមករា ឆ្នាំ២០២១ នេះ បានចុះត្រួតពិនិត្យទំនិញ និងមុខម្ហូបមួយចំនួន ដែលដាក់តាំងលក់ នៅក្នុងស្តង់ពិព័រណ៍ខ្មែរ ដើម្បីរកសាធាតុគីមី ទៅលើមុខម្ហូប បង្គារ មឹក ស្លាបមាន់ ប្រហិត គុយទាវ មី និងផលិតផលក្លែងក្លាយ ហួសកាលបរិច្ឆេទ ដើម្បីជាការធានាពីសុវត្ថិភាព របស់ប្រជាពលរដ្ឋ ដែលចូលទស្សនា និងហូបអាហារ ក្នុងការដាក់តាំងពិព័រណ៍ ផលិតផលខ្មែរ នៅក្នុងក្រុងដូនកែវ ខេត្តតាកែវ ដែលមានរយៈពេល ចាប់ពីថ្ងៃទី២០ ដល់ថ្ងៃទី២៦ ខែមករា ឆ្នាំ២០២១ ។
សូមបញ្ជាក់ថាៈ ជុំវិញការដាក់ឱ្យមាន ការតាំងពិរព័រណ៍នេះ គឺអាជ្ញាធរខេត្ត លោកបាន យកចិត្តទុកដាក់ខ្ពស់ ដោយណែនាំឱ្យអ្នករៀបចំ ការតាំងពិព័រណ៍នោះ ត្រូវគោរពឱ្យបាន នូវគោលការណែនាំ របស់ក្រសួងសុខាភិបាល ក្នុងការរួមគ្នាទប់ស្កាត់ ការឆ្លងរីករាលដាល នៃជំងឺកូវីដ ១៩ ដោយតម្រូវមុនចូលស្តង់ពិព័រណ៍ ត្រូវវាស់ស្ទង់កម្តៅ បាញ់អាល់កុល និងចែកម៉ាស ដោយមិនគិតថ្លៃ ដល់អ្នកដែលចូលទស្សនា ទិញផលិតផល ៕/V-PC
