Home ព័ត៌មានជាតិ សេដ្ឋកិច្ច បុគ្គលិក​ក្រុ...

បុគ្គលិក​ក្រុមហ៊ុន អាកាសយានដ្ឋាន​កម្ពុជា តវ៉ា​ឱ្យ​មន្ទីរ​ការងារ ជួយ​ដោះស្រាយ ការកាត់បន្ថយ​បុគ្គលិក ១៦១ នាក់​

ដោយៈ អង្គរតូច/សៀមរាបៈ បុគ្គលិក​ក្រុមហ៊ុន អាកាសយានដ្ឋាន​កម្ពុជា VINCI/SCA/CAMS ប្រមាណ ៧៥ នាក់ នៅ​ព្រឹក​ថ្ងៃទី​២២ ខែមករា ឆ្នាំ​២០២១ នេះ បាន​លើកគ្នា មកកាន់​មន្ទីរ​ការងារ ដើម្បីអោយ​ខាង​មន្ទីរ ជួយ​ដោះស្រាយ ការកាត់បន្ថយ បុគ្គលិក ១៦១ នាក់​។ ប៉ុន្តែ​ក្រុម​បុគ្គលិក​ទាំងនោះ ក៍បាន​វិលត្រឡប់ ទៅវិញ​នៅ​ប៉ុន្មាន​ម៉ោង ក្រោយ បន្ទាប់ពី​មន្ទីរ​ការងារ សន្យាថា នឹង​រក​ដំណោះស្រាយ ដល់​ពួកគាត់ នៅ​ថ្ងៃ​បន្ទាប់​។​

​ក្នុងការ​លើកគ្នា មក​តវ៉ា​នេះ ដំបូង​ឡើយ ត្រឹមតែ​មកអោយ​ខាង​មន្ទីរ ជួយ​រក​ដំណោះស្រាយ តែប៉ុណ្ណោះ លុះ​ពេល​ខាង​មន្ទីរ ពន្យល់​អំពី​គោលការណ៍ របស់​ក្រុមហ៊ុន ក៍​ផ្ទុះ​ការតវ៉ា ហើយ​នាំគ្នា​លើក​បដា​ទៅវិញ​។​

​ក្រុមអ្នកតវ៉ា បានលើកឡើង​ថាៈ ពួកគាត់​ទាំងអស់គ្នា បាន​បំរើការ​នៅ​ទីនោះ​ច្រើន​ឆ្នាំ មកហើយ​។ តែ​ពេលនេះ ក្រុម ហ៊ុន​បែ​ជា ប​ញ្ឍ​ប់​បុគ្គលិក​តែ​១៦១​នាក់​ទៅវិញ មាន ន័យ​ថា ក្រុមហ៊ុន​ប្រកាន់​បក្ខពួក​។ ពួកគេ​មិន​ព្រម​ឡើយ ចាំបាច់​ត្រូវ​រក​ដំណោះស្រាយ​អោយ សមរម្យ ដោយ​រក្សា​ពួកគេ​ទាំងអស់ នៅ​បំរើការ​ដដែល​។ ជាមួយ​ការវិលត្រឡប់​របស់​ក្រុម អ្នក​តវ៉ា លោក ច័ន្ទ សុខុម​ចិ​ត្តា ប្រធាន​មន្ទីរ​ការងារ ខេត្តសៀមរាប បាន​ថ្លែងថាៈ ករណីនេះ ខាង​បុគ្គលិក បានដាក់​លិខិត ទៅ​ក្រសួង ដើម្បី​សុំ​អន្តរាគមន៍​ហើយ​តែ​ក្រសួង​សម្រេច អោយ​ខេត្ត ដោះស្រាយ​។ លោក​បាន​បន្តថាៈ នៅ​ថ្ងៃទី​២២ ខែមករា នេះ មន្ទីរ​ហៅ​ពួកគាត់ មក​សម្រួល រក​ដំណោះស្រាយ តាមផ្លូវ​ច្បាប់ តែ​ពួកគាត់​មិន​ស្តាប់ បែរជា​ចោទថា ជា​រឿង​វិវាទ ហើយ​នាំគ្នា​លើក​បដា តវ៉ា​ទៅវិញ​។​

​លោក​ប្រធាន​មន្ទីរ បាន​បន្ថែមថាៈ តាមពិត ការកាត់បន្ថយ​បុគ្គលិក ១៦១ របស់​ក្រុមហ៊ុន អាកាសយានដ្ឋាន​នេះ គឺ​ដោយសារ​វិបត្តិ​កូ​វីដ​១៩​។ បើ​ភ្ញៀវ​បរទេស មិន​ហ៊ាន​មកលេង ហើយ​បុគ្គលិក គ្មាន​ការងារ​ធ្វើ​ផង តើ​បាន​ប្រាក់​ឯណា ផ្តល់ជូន​ពួកគាត់ ចឹ​ង​ហើយ ទើប​ក្រុមហ៊ុន សម្រេច​កាត់បន្ថយ​បែប​នឹង​។ លោក​បាន​បញ្ជាក់ថាៈ តាមពិត បុគ្គលិក​ចំនួន ១៣០ នាក់ បាន​យល់ព្រម​ទទួលយក ប្រាក់​ដំណោះស្រាយ របស់​ក្រុមហ៊ុន​រួចហើយ តែ​ពួកគេ នៅតែ​ប្រមូលគ្នា មក​តវ៉ា​បន្ថែម​។ ប៉ុន្តែ​ទោះជា​បែបនេះ ក៍​ខាង​មន្ទីរ នៅតែ​ព្យាយាម រក​ដំណោះស្រាយ ដល់​ពួកគាត់​ដែរ ប៉ុន្តែ​តាម​គោល​ការ​ច្បាប់​។​

​ទោះជា​បែបនេះ អ្នកយកព័ត៌មាន នៅ​មិនទាន់​ទទួលបាន ការឆ្លើយតប ពី​ក្រុមហ៊ុន​អាកាស យានដ្ឋាន​កម្ពុជា VINCI/SCA/CAMS នៅឡើយ​ទេ ចំពោះ​ការលើកឡើង របស់​ក្រុមអ្នកតវ៉ា ៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular