Home ព័ត៌មានសំខាន់ៗ បំបែក​ករណី​សម...

បំបែក​ករណី​សម្លាប់​ជនជាតិ​ចិន ! ប៉ូលិស​ចាប់ខ្លួន​មនុស្ស​បីនាក់ និង​រកឃើញ​ថ្នាំញៀន​មួយចំនួន​

ដោយៈ​មុនី​រ័ត្ន​/​ភ្នំពេញៈករណី​ឃាតកម្ម​បាញ់សម្លាប់​ជនជាតិ​ចិន​កក្រើក​ខេត្ត​ព្រះសីហនុ​កាលពី​ម្សិលមិញ​កម្លាំង​សមត្ថកិច្ច​បានធ្វើការ​ស្រាវជ្រាវ​ឈានទៅដល់​ការចាប់​ឃាត់ខ្លួន​មនុស្ស​មួយចំនួន​ជា​បន្តបន្ទាប់​និង​បក្ខ​តាម​ចាប់ខ្លួន​បក្ខពួក​ដែល​នៅ​សេសសល់​មួយចំនួនទៀត​។ ក្រៅពី​ការឃាត់ខ្លួន​មនុស្ស​បីនាក់​សមត្ថកិច្ច​បានរ​ក​ឃើញ​រថយន្ត​ដែល​ជិះ​ធ្វើ​សកម្មភាព​ចំនួន​ពីរ​គ្រឿង​និង​ថ្នាំញៀន​មួយចំនួន​ថែមទៀត​។​

លោក​ឧ​ត្ត​ម​សេនីយ៍​ទោ ជួន ណា​រិន្ទ ស្នងការ​នគរបាល​ខេត្ត​ព្រះសីហនុ​បានបញ្ជាក់​ប្រាប់​រស្មី​កម្ពុជា​នៅ​រសៀល​ថ្ងៃទី​២២ ខែមករា​នេះ​ថា ពិតជា​មានការ​ឃាត់ខ្លួន​មនុស្ស​មួយចំនួន​ប្រាកដ​មែន​ប៉ុន្តែ​លោក​មិនទាន់​អាច​បញ្ជាក់​លម្អិត​បាន​នៅឡើយ​ទេ​។​លោក​បញ្ជាក់ថា “​មកដល់​ថ្ងៃនេះ យើង​ឃាត់ខ្លួន​បាន​ប៉ុន្មាន​នាក់​”​។​

​យោងតាម​ប្រភព​ច្បាស់​ការណ៍​បាន​ប្រាប់​រស្មី​កម្ពុជា​នៅ​រសៀល​ថ្ងៃទី​២២ ខែមករា នេះ​ថា រហូតមកដល់​ពេលនេះ សមត្ថកិច្ច​បាន​ចាប់ខ្លួន​ជនសង្ស័យ​បាន​ចំនួន​បីនាក់​និង​បន្ត​តាម​ចាប់ខ្លួន​បក្ខពួក​មួយចំនួន​ដែល​ពាក់ព័ន្ធ​ក្នុង​អំពើ​បាញ់សម្លាប់​ជនជាតិ​ចិន​នៅក្នុង​រថយន្ត​កាលពី​ព្រឹក​ថ្ងៃទី​២១ ខែមករា​។ ក្រៅពីនេះ​សមត្ថកិច្ច​បាន​រកឃើញ​រថយន្ត​ចំនួន​ពីរ​ដែល​ធ្វើ​សកម្មភាព​ជិះ​ដេញ​បាញ់​ជនរងគ្រោះ និង​ជិះ​បិទគូថ​ពីក្រោយ រួមទាំង​គ្រឿងញៀន​មួយចំនួន​ផងដែរ​។​
​ជនរងគ្រោះ​ឈ្មោះ​ផេង​ស៊ូ​ភេទ​ប្រុស​ជនជាតិ​ចិន​អាយុ​២៨​ឆ្នាំ​ត្រូវបាន​ខ្មាន់កាំភ្លើង​បាញ់​ត្រូវ​មួយ​គ្រាប់​ចំ​លើ​ដោះ​ខាងឆ្វេង​បណ្តាល​ឲ្យ​ស្លាប់​ភ្លាមៗ​នៅក្នុង​រថយន្ត​។​

​គួររំលឹកថា​កាលពី​ព្រឹក​ថ្ងៃទី ២១ ខែមករា មាន​ករណី​ឃាតកម្ម​បាញ់សម្លាប់​ជនជាតិ​ចិន នៅ​ចំណុច​តាម​បណ្តោយ​ផ្លូវ​ស​ណ្ឋា​រ​គារ​ឯករាជ្យ ស្ថិតនៅ​ភូមិ​១​សង្កាត់​៣​ក្រុង​-​ខេត្ត​ព្រះសីហនុ​។​ឃាតកម្ម​នេះ​បង្កឡើង​ដោយ​ជនល្មើស​មិន​ស្គាល់​អត្តសញ្ញាណ​ជិះ​រថយន្ត​ពីរ​គ្រឿង​។​ក្នុងនោះ ជនល្មើស​ជិះ​រថយន្ត​ម៉ាក Ford Raptors ពណ៌​ខ្មៅ ពាក់​ផ្លាក​លេ​ខៈ ភ្នំពេញ 2BI-1413 បានធ្វើ​សកម្មភាព​បើក​ដេញតាម​រថយន្ត​ម៉ាក RANGE ROVER ពណ៌​ខ្មៅ ផ្លាកលេខ 2AL-9459 (​រថយន្ត​ជនរងគ្រោះ​)​។ លុះដល់​ចំណុចកើតហេតុ​ជនល្មើស​បាន​បើករថយន្ត​ទៅ​អែប​នឹង​រថយន្ត​របស់​ជនរ​ង​គ្រោះ​រួច​បាន​បាញ់​ទៅលើ​ជនរងគ្រោះ​បណ្តាល​ឲ្យ​ត្រូវ​ជនរងគ្រោះ​ស្លាប់​ភ្លាមៗ​នៅក្នុង​រថយន្ត​តែម្តង​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular