Home ព័ត៌មានសំខាន់ៗ ​គម្រោង​វ៉ៃ​គ...

​គម្រោង​វ៉ៃ​គោ មាន​សក្តានុពល ទឹក​ស្រោចស្រព លើដី​ស្រែ ២៥ ម៉ឺន​ហិកតា​

-​ស្រូវប្រាំង​កើនឡើង​ច្រើន​ម៉ឺន​ហិកតា នៅ​ខេត្តស្វាយរៀង បន្ទាប់ពី​គម្រោង​វ៉ៃ​គោ បានបញ្ចប់​នៅ​ឆ្នាំនេះ​
​ដោយៈ ប​.​ខុន / ភ្នំពេញៈ ផ្ទៃដី​ស្រូវប្រាំង នៅក្នុង​ខេត្តស្វាយរៀង នឹង​កើនឡើង​ច្រើន​ម៉ឺន​ហិកតា​ថែមទៀត បន្ទាប់ពី​គម្រោង​វ៉ៃ​គោ ជំហាន​ទី​ពីរ បានបញ្ចប់ នៅក្នុង​ឆ្នាំ​២០២១ និង​ការធ្វើ​អនុត្តរភាព ប្រព័ន្ធ​ធា​សាស្ត្រ បន្ត​ពី​គម្រោង​នេះ បាន​រួច​បន្តបន្ទាប់ នៅក្នុង​ឆ្នាំ​ខាងមុខ​។ គម្រោង​វ៉ៃ​គោ​ជំហាន​ទី​១ និង​ជំហាន​ទី​២ ក្រោយពេល​សាងសង់​រួច មាន​សក្តានុពល ទឹក​ស្រោចស្រព បាន​លើ​ផ្ទៃដី​ស្រូវប្រាំង និង​ស្រូវវស្សា ប្រមាណ ២៥ ម៉ឺន​ហិកតា នៅក្នុង​ខេត្តព្រៃវែង និង​ខេត្តស្វាយរៀង ដោយ​ពឹង​ផ្អែកលើ​ការបញ្ជូន​ទឹក មកពី​ទន្លេមេគង្គ តាម​ប្រព័ន្ធ​នេះ​។​

​លោក គឹម សាវុធ ប្រធាន​មន្ទីរ​ធនធានទឹក និង​ឧតុនិយម ខេត្តស្វាយរៀង បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២២ ខែមករា ឆ្នាំ​២០២១​ថាៈ គម្រោង​វ៉ៃ​គោ ជំហាន​ពីរ ដែលជា​គម្រោង​មេ​ធំ បានបញ្ចប់ ហើយ​ត​ភ្ជាប់​ពី​ខេត្តព្រៃវែង សម្រាប់​ត​ភ្ជាប់​ទៅនឹង​គម្រោង មាន​ស្រាប់​នៅក្នុង​ខេត្ត ដែល​កន្លែង​ខ្លះ ក្រសួង​បានធ្វើ​រួច និង​កន្លែង​ខ្លះ កំពុង​អនុវត្ត​បន្ត​។ គម្រោង​វ៉ៃ​គោ បាន​ប្រើប្រាស់​ខ្លះ នៅ​ស្រុក​ស្វាយជ្រុំ បន្ត​មកពី​ខេត្ត ព្រៃវែង និង​នៅក្នុង​ឆ្នាំនេះ រៀបចំ​ត​ភ្ជាប់​ទៅនឹង​ប្រព័ន្ធ មាន​ស្រាប់ ក្នុង​ខេត្តស្វាយរៀង និង​ការធ្វើ​អនុត្តរភាព ប្រព័ន្ធ​បន្ថែម​។​

​នៅក្រោយពេល គម្រោង​វ៉ៃ​គោ​បញ្ចប់ លោក គឹម សាវុធ បានបញ្ជាក់​ថាៈ ផ្ទៃដី​ស្រូវប្រាំង នៅក្នុង​ខេត្តស្វាយរៀង អាច​នឹង​កើន​ដល់ បី​ម៉ឺន​ហិកតា នៅក្នុង​ឆ្នាំ​២០២២ តែ​នៅក្នុង​ឆ្នាំ​២០២០-២០២១​នេះ មាន​ផែន​ការធ្វើ​តែ ២០.៥០០ ហិកតា​ទេ ដោយ​មកដល់ពេលនេះ អនុវត្តបាន ៩៩ ភាគរយ នៃ​ផែនការ​ហើយ តែ​ជាក់ស្តែង ប្រជាកសិករ ធ្វើបាន​ច្រើនជាង​នេះ​។ នៅ​ឆ្នាំ​ខាងមុខ ដីស្រែ​ក្នុង​ខេត្តស្វាយរៀង នឹងមាន​ពណ៌​បៃតង​ស្រងាត់ មិន​ចាញ់​ប្រទេសជិតខាង​ទេ ក្រោយពី​ប្រព័ន្ធ​វ៉ៃ​គោ បានធ្វើ​រួច​។​

​លោក គឹម សាវុធ បាន​និយាយ​ឱ្យដឹងទៀតថាៈ ស្រូវប្រាំង ដែល​បានធ្វើ​មុនពេល​នេះ បានចាប់ផ្តើម​ច្រូតកាត់ និង​កន្លែង​ខ្លះ ភ្ជួរ​រាស់​សាបព្រោះ បន្ត​ជាថ្មី​។ ឯ​ផ្ទៃដី​ស្រូវ​ស្រូវវស្សា ដែល​ទុកចោល នៅ​រដូវប្រាំង កាលពីមុន​នោះ នៅ​ឆ្នាំនេះ កសិករ ចាប់ផ្តើម​ធ្វើ​ស្រូវប្រាំង បន្ទាប់ពី​មាន​ប្រភពទឹក ដែល​ក្រសួង ទើបបាន​ធ្វើ​រួច​។ ការធ្វើ​ស្រែ ដោយ​ប្រើ​ទឹក​អណ្តូង នៅពេលនេះ ស្ទើរតែ​លែងមាន​ទៅហើយ ឯ​ការទិញ​ទឹក​គេ ដាក់​ស្រែ ក៏​នៅមាន​មិន​ច្រើន​ដែរ និង​អាច​ថា នៅ​ឆ្នាំក្រោយ លែងមាន​ការទិញ​ទឹក​គេ មក​ធ្វើស្រែ​ទៀតហើយ បន្ទាប់ពី​ប្រព័ន្ធ​នាំ ទឹក​របស់​យើង បាន​ទៅដល់​គ្រប់កន្លែង ក្រោយពី​គម្រោង​វ៉ៃ​គោ បានបញ្ចប់​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២២ មករា នេះ​ថាៈ គម្រោង​ជំហាន​ពីរ នៅ​ខេត្តស្វាយរៀង បាន​រួចរាល់ តែ​ស្ថិតនៅក្នុង​ក្រោម​ការ ទទួលខុសត្រូវ ថែទាំ​ដោយ ក្រុមហ៊ុន​សាងសង់ មួយរយៈ​ទៀត ទើប​ប្រគល់​ឱ្យមក​ក្រសួង​ធនធានទឹក និង​ឧតុនិយម គ្រប់គ្រង​បន្ត ។ គម្រោង​វ៉ៃ​គោ ដែល​ទើបនឹង​បញ្ចប់​នេះ នឹង​ធ្វើឱ្យ​ផ្ទៃដី ស្រូវប្រាំង នៅក្នុង​ខេត្តស្វាយរៀង កើនឡើង​ថែម​ចំនួន ៦.០០០ ហិកតា​ទៀត នៅក្នុង​ឆ្នាំ​ខាងមុខ​។​

 

​អ្នកនាំពាក្យ​ក្រសួង​ជំនាញ ខាងលើ បានបញ្ជាក់​ថាៈ គម្រោង​វ៉ៃ​គោ ជំហាន​ពីរ បានបញ្ចប់​ហើយ តែ​ទឹក​នៅ​មិនទាន់បាន ទៅដល់​ស្រែ​នៅឡើយ​ទេ ដោយសារ​យើង មិនទាន់មាន​ប្រឡាយ​រង និង​ប្រឡាយ​ស្រោចស្រព ដែល​ពេលនេះ ក្រសួង បាន​នឹង​កំពុង​ខិតខំ​រៀបចំ ធ្វើ​អនុត្តរភាព លើ​ប្រព័ន្ធធារាសាស្ត្រ​នេះ ដើម្បី​ធ្វើយ៉ាងណា ឱ្យ​ទឹកបាន​ទៅដល់​ដីស្រែ របស់​ប្រជាកសិករ​។​

​លោក ចាន់ យុ​ត្ថា បាន​និយាយ​ឱ្យដឹងទៀតថាៈ ការធ្វើ​ស្រូវប្រាំង នៅក្នុង​ខេត្តស្វាយរៀង​នេះ ពីមុន មាន​ចំនួន​មិន​ច្រើន​ទេ ដោយសារ​ការធ្វើ​ស្រែ ពឹង​ទៅលើ​របប​ទឹកជោរ នាច ទឹក​អណ្តូង និង​នៅ​កន្លែង​ខ្លះ ត្រូវ​ទិញ​ទឹក មកពី​ប្រទេសជិតខាង តែ​ឥឡូវ ការទិញ​ទឹក​មក​ធ្វើស្រែ​នោះ ស្ទើរតែ​លែងមាន​ទៅហើយ ដោយសារ​ក្រសួង បានធ្វើការ​អភិវឌ្ឍន៍ នូវ​ហេដ្ឋារចនាសម្ព័ន្ធ ប្រព័ន្ធ​ធា​សាស្ត្រ​តូចធំ ជា​បន្តបន្ទាប់ និង​នៅពេល​ចុងក្រោយ​នេះ គឺ​ប្រព័ន្ធ​វ៉ៃ​គោ ដែលជា​ប្រព័ន្ធ មាន​សក្តានុពល​បំផុត​។​

​គួរ​និយាយ​ឱ្យដឹងថា គម្រោង​វ៉ែ​កូ​ជំហាន​ទី​១ បានបញ្ចប់​នៅក្នុង​ឆ្នាំ​២០១៧ និង​គម្រោង​ជំហាន​ទី​២ បាន​អនុវត្ត​បន្ត និង​ចាប់​ឆ្នាំ​២០២១​នេះ​។ គម្រោង​ទាំងពីរ​នេះ ចំណាយ​ថវិកា អស់​ប្រមាណ​ជា ២០០ លាន​ដុល្លារ ក្រោយពេល​ធ្វើ​រួច ធានា​ទឹក​ស្រោចស្រព ដល់​ផ្ទៃដី​ដំណាំ​ស្រូវប្រាំង និង​វស្សា​ប្រមាណ ២៥ ម៉ឺន​ហិកតា នៅក្នុង​ខេត្តព្រៃវែង និង​ស្វាយរៀង​។​

​យោងតាម​ឯកសារ របស់​ក្រសួង​ធនធានទឹក និង​ឧតុនិយម បានបង្ហាញ​ឲ្យ​ឃើញថា គម្រោង​ជំហាន​ទី​២ មាន​ការងារ​សំខាន់​ធំៗ ដូចជា ជីក​ព្រែក ២ ខ្សែ សរុប ប្រវែង ១៤,៦ គីឡូម៉ែត្រ ដោយ​ព្រែក​លេខ​១ មាន​ប្រវែង ៦,៣ ជម្រៅ ១០,១០ ម៉ែត្រ និង​ព្រែក​លេខ​២ ប្រវែង ៨,៣ គីឡូម៉ែត្រ ជម្រៅ ១០,៨០ ម៉ែត្រ​។​

​ក្នុង​គម្រោង បានបង្ហាញ​ទៀតថា ជីក​ប្រឡាយ​មេ ចំនួន ៤ ខ្សែ ប្រវែង​សរុប ៥៩,៥ គីឡូម៉ែត្រ ដោយ​រួមមាន​ប្រ​ឡា យ​មេលេខ​១ ប្រវែង ១៩,៦ គីឡូម៉ែត្រ ទទឹង​មាត់​លើ​ពី ៦,៩២ ម៉ែត្រ ដល់ ១០,៥៤ ម៉ែត្រ និង​ទទឹង​បាត​ក្រោម​ពី ២ ដល់ ៤ ម៉ែត្រ ជម្រៅ​ពី ២,៤៦ ម៉ែត្រ ដល់ ៣,២៧ ម៉ែត្រ​។ ប្រឡាយ​លេខ​២ ប្រវែង ១២,៦ គីឡូម៉ែត្រ ទទឹង​មាត់​លើ​ពី ១១,៣៤ ម៉ែត្រ ដល់ ១០,៥៤​ម៉ែត្រ និង ទទឹង​បាត​ក្រោម ៥ ម៉ែត្រ ជម្រៅ ៣,១៧ ម៉ែត្រ ។ ប្រឡាយ​លេខ​៣ ប្រវែង ៧,៤ គីឡូម៉ែត្រ ទទឹង​មាត់​លើ ១១,០៦ ម៉ែត្រ ដល់ ១០,៥៤ ម៉ែត្រ និង​ទទឹង​បាត​ក្រោម ៤ ម៉ែត្រ ជម្រៅ ៣,៥៣ ម៉ែត្រ ។ ប្រឡាយ​លេខ ៤ ប្រវែង ១៩,៨៧ គីឡូម៉ែត្រ ទទឹង​មាត់​លើ ១១,០៦ ម៉ែត្រ​ដល់ ១០,៥៤ ម៉ែត្រ និង​ទទឹង បាត​ក្រោម ៤ ម៉ែត្រ ជម្រៅ ៣,៥៣ ម៉ែត្រ​។ នៅ​គម្រោង​ជំហាន​ទី​២​នេះ ក៏មាន​សាងសង់​ទំនប់​សណ្តរ ប្រវែង ៤១,៥ គីឡូម៉ែត្រ​។ សំណង់​បង្ហៀរទឹក ១ កន្លែង សំណង់​ស្ទាក់​ទឹក ៦ កន្លែង និង​សំណង់​សម្រួល ចរន្តទឹក ៨ កន្លែង​។ ស្ថានីយ​បូមទឹក ៤ កន្លែង និង​សំណង់​លូទឹក ចំនួន ៣២ កន្លែង​។​

​ក្រសួង​ធនធានទឹក និង​ឧតុនិយម បាន​រំពឹងទុក​ថាៈ នៅពេល​បញ្ចប់​ការងារ​សាងសង់ គម្រោង​អភិវឌ្ឍន៍​ប្រព័ន្ធធារាសាស្ត្រ វ៉ៃ​កូ​ជំហាន​២ ធ្វើ​ឲ្យ​រាជ​រដ្ឋា​ភិ បាល សម្រេចបាន​នូវ​ប្រព័ន្ធធារាសាស្ត្រ​វ៉ៃ​កូ ពេញលេញ ដែល​អាច​ធ្វើជា​ម្ចាស់​លើ​ការ ដោះស្រាយ​លើ​បញ្ហា​ទឹក​មួយកម្រិត​នៅក្នុង​ខេត្តព្រៃវែង​និង​ខេត្តស្វាយរៀង ដែ ល ពីមុនមក​ពឹងផ្អែក​ភាគច្រើន​ទៅលើ​ប្រភពទឹក​ពី​ប្រទេស​វៀតណាម​។ ព្រមទាំង​អាចមាន​លទ្ធភាព ផ្គត់ផ្គង់​ទឹក​ស្រោចស្រព សម្រាប់​បង្កើន​ផលិតផល​កសិកម្ម បាន​ទំហំ ៩៣.១០០​ហិកតា​នៅក្នុង​រដូវវស្សា​និង​២៣.៣០០​ហិកតា​នៅ​រដូវប្រាំង​ការ ផ្គត់ ផ្គង់​ទឹកស្អាត​និង កាត់បន្ថយ​ទឹកជំនន់​តាម​តំបន់​ផ្នែក​ខាងក្រោម​ផងដែរ​។​

​ចំណែកឯ​គម្រោង​អភិវឌ្ឍន៍ ប្រព័ន្ធធារាសាស្ត្រ​វ៉ៃ​កូ ជំហាន​ទី​១​វិញ បើ​យោងតាម​ឯកសារ​របស់ ក្រសួង​ធនធានទឹក និង​ឧតុនិយម​បង្ហាញ ឲ្យ​ឃើញថា ចំណាយ ថវិកា​អស់​ប្រមាណ ១០០ លាន​ដុល្លារ សម្រាប់​ជីក​ស្តារ​ព្រែក មួយ​ខ្សែ មាន​ប្រវែង​ជាង ៤០ គីឡូម៉ែត្រ ដោយ​នៅក្នុង​ផ្នែក ទីមួយ មាន​ប្រឡាយ​ប្រវែង ១៣ គីឡូម៉ែត្រ ទទឹង​មាត់​លើ ៥៥ ម៉ែត្រ និង ទទឹង បាត​ក្រោម​២៥ ម៉ែត្រ ចាប់ពី​ឃុំ​មហាលាភ ស្រុក​កោះសូទិន ខេត្តកំពង់ចាម ដល់​ឃុំ​ស្វាយ​ជី​ក្រាយ ស្រុក​ស៊ីធរ​កណ្តាល ខេត្តព្រៃវែង ។ ផ្នែក​ទី​ពីរ​មាន ប្រវែង​២៧​គីឡូម៉ែត្រ​ទទឹង មាត់ លើ​៤៤​ម៉ែត្រ និង ទទឹង​បាត ក្រោ ម​១៨​ម៉ែត្រ ចាប់ពី​ឃុំ​ស្វាយ​ជី​ក្រាយ ស្រុក​ស៊ីធរ​កណ្តាល ដល់​ឃុំ​តា​ដោក ស្រុក​កំចាយមា ខេត្តព្រៃវែង​។​

​ក្រៅពី​គម្រោង​ជីក​ស្តា​ព្រែក​ខាងលើ​នៅមាន​គម្រោង​ជីក​ប្រឡាយ​មេ​ពីរ​ខ្សែ​ប្រវែង​៧៨​គីឡូម៉ែត្រ​។​ប្រឡាយ​ទីមួយ មាន​ប្រវែង​២៨.៥​គីឡូម៉ែត្រ ទទឹង មាត់ លើ ២៥.៥​ម៉ែត្រ ទទឹង​បាត​ក្រោម​៨.៥​ម៉ែត្រ ចាប់ពី​ឃុំ​ស្វាយ​ជី​ក្រាយ ស្រុក​ស៊ីធរ​កណ្តាល ដល់​ឃុំ​ដំរី​ពួន ស្រុក​ព្រៃវែង​។ ប្រឡាយ​ទី​ពីរ​ប្រវែង​៤៣​គីឡូម៉ែត្រ​ទទឹង មាត់​លើ​២៣​ម៉ែត្រ​ទទឹង​បាត​ក្រោម​១១​ម៉ែត្រ ចាប់ពី​ឃុំ​តា​ដោក​ដល់​ឃុំ​កំចាយមារ​ឃុំ​ប្រា​ហួត ស្រុក​មេសាង ខេត្តព្រៃវែង​។​សាងសង់​សំណង់​មេ​យក​ទឹក​ពីរ​កន្លែង សំណង់​បញ្ចាល់ទឹក​១៦​កន្លែង និង សំណង់​បែងចែក​ទឹក​២២​កន្លែង​។​

​គម្រោង​ជំហាន​ទីមួយ​នេះ ធានា​ការស្រោចស្រព​លើដី​ស្រូវវស្សា បាន ចំនួន ១០៨.៣០០​ហិកតា និង ផ្ទៃដី​ស្រូវប្រាំង​២៧.១០០​ហិកតា នៅក្នុង​ស្រុក អូររាំងឪ ស្រុក​កោះសូទិន​ក្នុង​ខេត្ត​ត្បូងឃ្មុំ​(​កំពង់ចាម​) និង ស្រុក​មេសាង ស្រុក​ស៊ីធរ កណ្តា ល​ស្រុក កំចាយមារ ស្រុក​ព្រៃវែង ខេត្តព្រៃវែង ។​/V​

ទីតាំងផ្សាយពាណិជ្ជកម្ម

- Advertisment -

Most Popular