Home ព័ត៌មានសំខាន់ៗ មន្រ្តីជាន់ខ្...

មន្រ្តីជាន់ខ្ពស់ក្រសួងបរិស្ថានពន្យល់ពីការឆេះព្រៃតែងកើតចេញមកពីកត្តា២យ៉ាងគឺសកម្មភាពមនុស្សនិងកត្តាបាតុភូតិធម្មជាតិ

ដោយ៖ដេប៉ូ/ភ្នំពេញ៖បញ្ហា​ភ្លើង​ឆេះ​ព្រៃ​នៅកម្ពុជាគេឃើញតែងតែ​កើតមានឡើង​នៅក្នុង​តំបន់ការពារធម្មជាតិ  និងរ​បៀង​អភិរក្ស​ជីវៈចម្រុះ​នានា ​ដែលពេលខ្លះមិនត្រឹមតែបំផ្លិចបំផ្លាញព្រៃឈើ សត្វព្រៃទេ ប៉ុន្តែវានៅបង្កឱ្យកើតការបំពុលបរិស្ថានថែមទៀត។

មន្រ្តីជាន់ខ្ពស់នៃក្រសួងបរិស្ថានបានថ្លែងថាកត្តា​ចម្បង​ដែល​បង្ក​ឲ្យ​មាន​ភ្លើង​ឆេះ​ព្រៃ​ញឹកញាប់​បំផុត​ក្នុង​រដូវប្រាំង បណ្តាលមកពី​កត្តាសកម្មភាពមនុស្សភាគច្រើននិងមួយចំនួនទៀតកើតចេញ បណ្តាលមកពី​ការ​ទទួលរង​ឥទ្ធិពល​បាតុភូតកំដៅធម្មជាតិដោយ​ប្រយោលតែម្តង។

លោក នេត្រ ភ​ក្ត្រា រដ្ឋលេខាធិការ​ក្រសួងបរិស្ថាន ដែលបាន​ដឹកនាំ ក្រុម​អ្នកសារព័ត៌មាន​ចុះ​ទស្សនកិច្ច​ស្វែងយល់​ពី​សក្ដានុពល​នៃ​ដែនជម្រកសត្វព្រៃ​ស្រែ​ពក ខេត្តមណ្ឌលគិរី ​កាលពីថ្មីៗមកនេះបានគូសបញ្ជាក់ថា”ភ្លើងឆេះព្រៃកើតមកពីកត្តា២យ៉ាងគឺទី១កើតឡើងពីធម្មជាតិនិងទី២កើតចេញពីសកម្មភាពមនុស្ស ។ក្នុងចំណោមនេះការឆេះព្រៃកើតចេញពីកត្តាមនុស្សច្រើនជាងក្នុងនេះដូចជាគាត់ដុតព្រៃដើម្បីចាប់សត្វ។ដោយគាត់ដុតជិតមាត់ត្រពាំងដើម្បីចាប់សត្វអណ្តើក ទន្សាយ ឬសត្វផ្សេងៗទៀត។ជួនកាលគាត់មិនអាចគ្រប់គ្រងភ្លើងបានទេ និងជួនកាលទៀតគាត់ដុតដោយភាពរពិសដៃតែម្តង”។

លោករដ្ឋលេខាធិការបានបញ្ជាក់បន្ថែមថា កន្លងមកក្រសួងបរិស្ថានបាន​ មាន​វិធានការ​មួយចំនួន ក្នុងការ​ទប់ស្កាត់​ភ្លើង​ឆេះ​ព្រៃ ដោយ​តម្រូវ​ឱ្យ​អង្គភាព​ជំនាញ​រដ្ឋបាល​ថ្នាក់ក្រោម​ជាតិ មន្ទីរ​បរិស្ថាន អាជ្ញា​ធរមាន​សមត្ថកិច្ច ណែនាំ​ប្រជាពលរដ្ឋ  និង​អនុវត្តន៍​វិធានការ​បច្ចេកទេស​សម​ស្រប​ដែល​អាច​ធានា​សុវត្ថិភាព ចំពោះ​ភ្លើងព្រៃ ដែល​ពលរដ្ឋ​ក្នុង​តំបន់​បង្កើតឡើង​ក្នុង​គោលបំណង​ប្រយោជន៍​ផ្ទាល់ខ្លួន ឬ​សាធារណៈជាដើម​។

យ៉ាងណាក្តីលោករដ្ឋលេខាធិការបានមានប្រសាសន៍ដែរថាការឆេះព្រៃពេលខ្លះក៏ផ្តល់ផលប្រយោជន៍មួយចំនួនដល់សត្វដែរព្រោះដោយសារថាសត្វព្រៃប្រភេទខ្លះវាត្រូវការលិឍដីដែលមានសារជាតិអំបិលដើម្បីជីវិតរស់របស់វា។

ពាក់ព័ន្ធក្នុងរៀងនេះដែរ លោក សេង ទៀក នាយកអង្កការWWFបានគូសបញ្ជាក់ថា កន្លងមកអង្គការរបស់លោកបានធ្វើការទប់ស្កាត់ការឆេះព្រៃដោយធ្វើការកាត់ផ្តាច់តំបន់ទីវាលស្មៅងាប់មួយចំនួនចេញពីគ្នាពោលគឺនៅពេលភ្លើងឆេះព្រៃឡើងមិនឱ្យឆាបឆេះទាំងមូលបានទេគឺវានឹងឆេះតែតំបន់ខ្លះប៉ុណ្ណោះ។

ជាមួយគ្នានេះលោកសំណូមពរឱ្យពលរដ្ឋនារដូវក្តៅនេះមិនត្រូវដុតព្រៃឡើយដែលនាំឱ្យខូចខាតធ្ងន់ធ្ងរដល់ព្រៃឈើនិងសត្វព្រៃរបស់យើង។

ទាក់ទិនក្នុងការដុតព្រៃនេះដែរ លោក នេត្រ ភក្រ្តា រដ្ឋលេខាធិការក្រសួងបរិស្ថានបានធ្វើការអំពាវនាវឱ្យពលរដ្ឋប្រុងប្រយ័ត្នក្នុងការដុតព្រៃដោយលោកបញ្ជាក់ថាទង្វើនេះវាមិនត្រឹមបង្កការខូចខាតព្រៃឈើទេប៉ុន្តែវានៅនាំឱ្យសត្វមួយចំនួនត្រូវបាត់បត់ជីវិតនិងពិសេសវានឹងបំផ្លាញបរិស្ថានដោយសារផ្សែងពុលថែមទៀត៕

 

 

 

ទីតាំងផ្សាយពាណិជ្ជកម្ម

- Advertisment -

Most Popular