Home ព័ត៌មានអន្តរជាតិ វិមាន​ក្រឹម​ឡ...

វិមាន​ក្រឹម​ឡាំង​ស្វាគមន៍​សំណើ​របស់​វ៉ាស៊ីនតោន​ដើម្បី​បន្ត​សន្ធិសញ្ញា​នុយក្លេអ៊ែ​រ

​ប្រែ​សម្រួល : កញ្ញា​ដា​លី​ស ៖ កាលពី​ថ្ងៃ​សុក្រ រុស្ស៊ី​និង​សហរដ្ឋ​អាម៉េរិក​បាន​ខិត​ជិត​ដល់​ការ​បន្ត​កិច្ចព្រមព្រៀង​នុយក្លេអ៊ែរ​នៅ​មុន​កាលបរិច្ឆេទ​នៃ​កិច្ចព្រមព្រៀង​ត្រួតពិនិត្យ​អាវុធ​ចុង​ក្រោយ​រវាង​អតីត​​គូប្រជែង​សង្គ្រាមត្រជាក់​ទាំងពីរ​នឹង​ផុតកំណត់​ក្នុងពេល​ឆាប់ៗ​នេះ​។​

​សន្ធិសញ្ញា New START ដែល​ត្រូវ​ផុតកំណត់​នៅ​ថ្ងៃទី ៥ ខែ​កុម្ភៈ​ត្រូវគេ​មើលឃើញថា​ជា​ឱកាស​ដ៏​កម្រ​មួយ​សម្រាប់​ការសម្របសម្រួល​រវាង​ទីក្រុង​មូ​ស្គូ​និង​ទីក្រុង​វ៉ាស៊ីនតោន​ដែល​ទំនាក់ទំនង​របស់​ពួកគេ​​កាន់តែ​យ៉ាប់យ៉ឺន​ថែម​ទៀត​ជុំវិញ​ការ​លួច​តាម​អន​ឡាញ​និង​ការចោទប្រកាន់​អំពី​ការជ្រៀតជ្រែក​ការបោះឆ្នោត​នា​ពេល​ថ្មីៗ​នេះ​។​

​កិច្ចព្រមព្រៀង​នេះ​កំហិត​ទីក្រុង​វ៉ាស៊ីនតោន​និង​ទីក្រុង​មូស្គ​ក្នុង​ការដាក់ពង្រាយ​ក្បាល​គ្រាប់​នុយក្លេអ៊ែរ​ជា​អតិបរមា​ត្រឹម ១.៥៥០ គ្រាប់​ដែល​ជា​ការកាត់បន្ថយ​ប្រហែល ៣០​ភាគរយ​ពី​ដែន​កំណត់​​ដែល​បាន​កំណត់​ក្នុង​ឆ្នាំ ២០០២ និង ជើង​ទម្រ​និង​យន្តហោះ​ទម្លាក់​គ្រាប់បែក​មក​នៅត្រឹម ៨០០ គ្រឿង ដែល​ល្មម​អាច​បំផ្ទុះ​ពិភពលោក​ជា​ច្រើន​ដង​។​

​វិមាន​ក្រឹម​ឡាំង​កាលពី​ថ្ងៃ​សុក្រ​បាន​ស្វាគមន៍​សំណើ​របស់​សហរដ្ឋ​អាម៉េរិក​ដើម្បី​ពន្យារ​កិច្ចព្រមព្រៀង​នេះ​៥ ឆ្នាំ​ទៀត ប៉ុន្តែ​បាន​ដាស់តឿន​ថា​ការពន្យារពេល​ណា​មួយ​នឹង​អាស្រ័យ​លើ​ភាព​ជាក់លាក់​នៃ​​សំណើ​នោះ​។​

​អ្នកនាំពាក្យ​វិមាន​ក្រឹម​ឡាំង​លោក​ឌី​មេ​ទី ប៉េ​ស្កូវ បាន​ប្រាប់​អ្នកសារព័ត៌មាន​ថា “​យើង​អាច​ស្វាគមន៍​តែ​ឆន្ទៈ​នយោបាយ​ដើម្បី​បន្ត​ឯកសារ​នេះ​ប៉ុណ្ណោះ​។​” ប៉ុន្តែ​បាន​ព្រមាន​ថា​”​អ្វីៗ​គ្រប់​យ៉ាង​គឺ​អាស្រ័យ​លើ​​ព័ត៌មាន​លម្អិត​នៃ​សំណើ​នេះ​”​។​

​ការលើកឡើង​របស់​អ្នកនាំពាក្យ​របស់​ប្រធានាធិបតីវ្ល៉ា​ឌី​មៀរ ពូ​ទីន​ធ្វើ​ឡើង​មួយ​ថ្ងៃ​បន្ទាប់​ពី​សេត​វិមាន​បាន​និយាយថា ទីក្រុង​វ៉ាស៊ីនតោន​នឹង​ធ្វើការ​ឆ្ពោះទៅរក​ការបន្ត​កិច្ចព្រមព្រៀង​រយៈពេល ៥ ឆ្នាំ​។​

​រដ្ឋមន្ត្រី​សារព័ត៌មាន​របស់​សេត​វិមាន​លោកស្រី ជេ​ន ភី​សា​គី និយាយថា កិច្ចប្រឹងប្រែង​ដើម្បី​ស្វែងរក​កិច្ចព្រមព្រៀង​គឺ​មាន​លក្ខណៈ​សំខាន់​កាន់តែខ្លាំង នៅពេលដែល​”​ទំនាក់ទំនង​ជាមួយ​រុស្ស៊ី​មាន​​ភាព​មិន​អំណោយផល​ដូច​ឃើញជាក់ស្តែង​បច្ចុប្បន្ន​”៕

​សន្ធិសញ្ញា New START ដែល​កំហិត​ការ​ដាក់​ពង្រាយ​ក្បាល​គ្រាប់​នុយក្លេអ៊ែរ​នឹង​ត្រូវ​ផុតកំណត់​នៅ​ថ្ងៃទី ៥ ខែ​កុម្ភៈ ឆ្នាំ​២០២១

ទីតាំងផ្សាយពាណិជ្ជកម្ម

- Advertisment -

Most Popular