សាកលវិទ្យាល័យ​ជាតិ​មានជ័យ​កំពុង​បន្ត​កែទម្រង់​

​ដោយ ៖ ភ្នំ​ស្វាយ​/បន្ទាយមានជ័យ​: បន្ទាប់ពី​ប្តូរ​ឈ្មោះ​ពី​សាកលវិទ្យាល័យ​មានជ័យ មកជា​សាកលវិទ្យាល័យ​ជាតិ​មានជ័យ សាកលវិទ្យាល័យ​នៅ​ទិសពាយ័ព្យ​នៃ​ប្រទេស មួយ​នេះ​បាន​នឹង​កំពុង​បន្ត​កែទម្រង់​ផ្ទៃក្នុង ដើម្បី​ពង្រឹងសមត្ថភាព​ដល់​និស្សិត ។

​លោក ជ័យ សារិន ប្រធាន​គណៈកម្មការ​គ្រប់គ្រង​សាកលវិទ្យាល័យ​ជាតិ​មានជ័យ បាន​មានប្រសាសន៍ថា សាកលវិទ្យាល័យ​នេះ ផ្តួចផ្តើម​កសាងឡើង​ដោយ​លោក ឧបនាយករដ្ឋមន្ត្រី កែ គឹមយ៉ាន និង​លោកស្រី ក្នុង​ឆ្នាំ​២០០៧ ដែល​បាន​ដើរតួនាទី​ជា គ្រឹះស្ថាន​អប់រំ​បណ្តុះបណ្តាល​ស្រាវជ្រាវ​និង​ផលិត​ធនធានមនុស្ស ។ ហើយ​នៅក្នុង​រយៈ ពេល ១៣​ឆ្នាំ មកនេះ គ្រឹះស្ថាន​ឧ​ត្ត​ម​សិក្សា​រដ្ឋ​មួយ​នេះ​បាន​ផលិត​ធន​ធន​មនុស្ស​កម្រិត បរិញ្ញាប័ត្រ​ជាន់ខ្ពស់ បរិ​ញ្ញ​ប័ត្រ និង​បរិ​ញ្ញា​រង លើ​១៤​ជំនាញ នៅតាម​មហាវិទ្យាល័យ​៥ ។

​ដើម្បី​ធានាបាន​នូវ​គុណភាព​នៃ​ការបណ្តុះបណ្តាល​និង​ការសិក្សា​របស់​និស្សិត​ដែល​ឆ្លើយតប​នឹង​តម្រូវការ​ទីផ្សារ​នាបច្ចុប្បន្ន​និង​ទៅ​អនាគត ១​ឆ្នាំ​ចុង​ក្រោយនេះ សាកលវិទ្យាល័យ​នេះ បានដាក់​ចេញ​នូវ​កម្មវិធី​កែទម្រង់​៦​ចំនុច ដែល​រួមមាន ការពង្រឹង​អភិបាលកិច្ច​, ការគ្រប់គ្រង ថវិកា​និង​ហិរញ្ញវត្ថុ​, ការគ្រប់គ្រង​បុគ្គលិក​និង ទ្រព្យសម្បត្តិ​រដ្ឋ​, ការកែលម្អ​បរិស្ថាន ការកែ លម្អ​សេវា​និស្សិត​, និង​ការកែលម្អ​កម្មវិធីសិក្សា​និង​ការស្រាវជ្រាវ ។​

​លោក អ៊ុ រាត្រី អភិបាលខេត្ត​បន្ទាយមានជ័យ​បាន​រំលឹក​ក្នុង​ប្រធានបទ​នៃ​បទ​បង្ហាញថា គន្លឹះ​នៃ​ភាពជោគជ័យ​ក្នុង​ជីវិត​ការសិក្សា​សំខាន់បំផុត គឺ​ការតស៊ូ និង​ព្យាយាម​សិក្សា ស្រាវជ្រាវ​បន្ថែម​” ។​

​លោក ស សុខា រដ្ឋលេខាធិការ​ក្រសួង​អប់រំ យុវជន និង​កីឡា ជា​ប្រធាន​ក្រុមប្រឹក្សាភិបាល សាកលវិទ្យាល័យ​ជាតិ​មានជ័យ​បាន​ថ្លែងថា វគ្គ​បណ្តុះបណ្តាល​នានា បើទោះជា​មានការ សិក្សា​មាន​រយៈ​ខ្លី ឫ​វែង​តែ​វា​បានផ្តល់​គុណប្រយោជន៍​ច្រើន​ដល់​និស្សិត​ទាំងឡាយ​យកទៅ ឆ្លុះបញ្ចាំង និង​ស្រង់​យកទៅ​ពង្រីក​បន្ថែម​លើ​ការខិតខំ​រៀនសូត្រ ឬ​តម្រង់ទិស​បណ្តើៗ​មុន នឹង​បញ្ចប់​ការសិក្សា ហើយ​ស្វែងរក​ការងារ​ធ្វើ ។​

​លោក ស សុខា បាន​បន្តថា នៅក្នុង​នៅ​សាកលវិទ្យាល័យ​ជាតិ​មានជ័យ​នេះ​បាន និង​កំពុង ធ្វើការ​បណ្តុះបណ្តាល​ធន​ធាន​មនុស្ស​ដោយ​ឈរលើ​គោលការណ៍​គុណភាព​ជា​ចម្បង​ហើយ​និង​បាន​ខិតខំ​អប់រំ​និស្សិត​ដោយ​យកចិត្តទុកដាក់​ខ្ពស់បំផុត​ដើម្បី​ឆ្លើយតប​ទៅ​និង​ការអភិវឌ្ឍន៍​ដើម្បី​ប្រកួតប្រជែង​នៅក្នុង​តំបន់​អាស៊ាន​និង​ពិភពលោក​ផងដែរ​។​

​លោក​បាន​ខិតខំ​ប្រឹងប្រែង​រៀនសូត្រ​យក​អស់កម្លាំង​កាយ​ចិត្ត​ដើម្បី​ប្រែក្លាយជា​ធនធានមនុស្ស​ដោយ​ឈរលើ​គោលការណ៍​គុណភាព​ជា​ចម្បង​ដែល​ប្រទេសជាតិ​ត្រូវការ​ចាំ​ចាច់​៕​/PC

ទីតាំងផ្សាយពាណិជ្ជកម្ម

- Advertisment -

Most Popular