Home ព័ត៌មានសំខាន់ៗ ​ព្រឹត្តិការណ...

​ព្រឹត្តិការណ៍​ជាតិ​សំខាន់ៗ ប្រចាំ​សប្តាហ៍​

 

ដោយ​៖ ម៉េង​ឆៃ / ភ្នំពេញ​៖ នៅក្នុង​សប្តាហ៍​នេះ មាន​ហេតុការណ៍​ជាច្រើន បានកើត​ឡើង​។ ក្នុងនោះ បញ្ហា​ជំងឺ​កូ​វីដ​១៩ នៅតែ​កើតឡើង គួរ​ជា​ក្តីបារម្ភ តែមាន​អ្នក​ឆ្លង​ថ្មី និង​ក៏មាន​អ្នកជា​សះស្បើយ ជា​បន្តបន្ទាប់​។ នៅក្នុង​សប្តាហ៍​នេះ សម្តេច​តេ​ជោ ហ៊ុន សែន ក៏បាន​ប្រកាស​ពី​ការទទួលបាន​វ៉ាក់សាំង​របស់​ចិន ក្នុង​ជំហាន​ដំបូង នៅ​ខែកុម្ភៈ ហើយ​កម្ពុជា ក៏​ស្វែងរក និង​ស្នើសុំ​វ៉ាក់សាំង​កូ​វីដ​ពី​ឥណ្ឌា រួមទាំង​ទិញ​បន្ថែម​វ៉ាក់សាំង​កូ​វីដ​ពី​ចិន កូរ៉េ និង​ពី​អង់គ្លេស ជាដើម​។​

​កាលពី​ថ្ងៃទី​១៨ ខែមករា សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​បន្ត​ស្នើសុំ​ជំនួយ​វ៉ាក់សាំង​កូ​វីត​១៩ ពី​ប្រទេស​ឥណ្ឌា ក្រោយ​រដ្ឋាភិបាល​ចិន បានប្រកាស​ផ្តល់ជូន​វ៉ាក់សាំង​កូ​វីត​១៩ ដល់​កម្ពុជា ១​លាន​ដូ​ស​។ សម្តេច​តេ​ជោ បានលើកឡើង​ដូច្នេះ នៅក្នុង​ជំនួប​ពិភាក្សា​ជាមួយ​លោក​លោកស្រី ដាវី យា​នី អ៊ុត​តាម​ខុ​ប្រា​ហ្គេ​ដ ( Devyani Uttamkhobragade ) ឯកអគ្គរដ្ឋទូត​ថ្មី នៃ​សាធារណរដ្ឋ​ឥណ្ឌា ប្រចាំ​កម្ពុជា កាលពី​ព្រឹក​ថ្ងៃទី​១៨ ខែមករា​។​

​កាលពី​ថ្ងៃ​ចន្ទ ទី​១៨ ខែមករា ក្រសួងការបរទេស និង​សហប្រតិបត្តិការ​អន្តរជាតិ បានប្រកាស​ដាក់ឱ្យអនុវត្ត​យុទ្ធសាស្ត្រ​ការទូត​សេដ្ឋកិច្ច ឆ្នាំ​២០២១ ដល់​ឆ្នាំ​២០២៣​។ ពិធី​ប្រកាស​យុទ្ធសាស្ត្រ​នេះ បានធ្វើ​ឡើង​ក្រោម​អធិបតីភាព​លោក ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​។

​រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល លោកស្រី ឱ វណ្ណឌី​ន បានឱ្យដឹង កាលពី​ថ្ងៃទី​១៩ ខែមករា​ថា វ៉ាក់សាំង​ប្រឆាំង​ជំងឺ​កូ​វីដ​១៩ ដែលជា​ជំនួយ​របស់​ចិន នឹងត្រូវ​ដឹកជញ្ជូន​មកដល់​ប្រទេស​កម្ពុជា ក្នុងអំឡុង​មុន​ចូលឆ្នាំ​ចិន នា​ខែកុម្ភៈ ឆ្នាំ​២០២១ ខាងមុខនេះ​។ បើតាម​អ្នកនាំពាក្យ ជំហាន​ដំបូង​វ៉ាក់សាំង​ប្រមាណ ៣០​ម៉ឺន​ដូ​ស នឹងត្រូវ​ដឹកជញ្ជូន​មក​មុខ​ន គ្រា​ដែល​វ៉ាក់សាំង ដែល​នៅ​សេសសល់​ផ្សេងទៀត គម្រប់ ១​លាន​ដូ​ស ចិន​សន្យា​នឹង​ប្រគល់ជូន​កម្ពុជា​បន្តបន្ទាប់​នាពេល​ក្រោយ​ទៀត​។ នៅពេល​វ៉ាក់សាំង​កូ​វីត​១៩​របស់​ចិន ត្រូវបាន​ប្រគល់​មកអោយ​កម្ពុជា​ជា​ផ្លូវការ​ហើយ សម្តេច​តេ​ជោ ហ៊ុន សែន នឹង​ចាក់​វ៉ាក់សាំង​នេះ មុនគេ​។ ដោយឡែក ប្រជាពលរដ្ឋ​ទូទៅ នឹង​ទទួលបាន​ការចាក់​វ៉ាក់សាំង​កូ​វីត​១៩​នេះ ដូចគ្នា​ដែរ ដោយ​ឥតគិតថ្លៃ និង​ឈរលើ​គោលការណ៍​ស្ម័គ្រចិត្ត​។​

​ផែនការ​សកម្ម​ភាពជា​តិ ស្តីពី ការទប់ស្កាត់​អំពី​ហិង្សា​លើ​ស្ត្រី ត្រូវបាន​ប្រកាស​អនុវត្ត នៅ​ថ្ងៃទី​១៩ ខែមករា ក្រោម​អធិបតីភាព​សម្តេច​ក្រឡា​ហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ​។ សម្ដេច​ក្រ​ឡោម បាន​សង្កត់ធ្ងន់ថា រដ្ឋបាល​ថ្នាក់ក្រោម​ជាតិ ដើរតួនាទី​សំខាន់​ណាស់ ក្នុងការ​បង្ការ និង​ទប់ស្កាត់​ហិង្សា​លើ​ស្ត្រី​។ ផែនការ​សកម្ម​ភាពជា​តិ​នេះ គឺជា​ផែនទី​តម្រង់ទិស​សម្រាប់​ក្រសួង ស្ថាប័ន ប្រតិបត្តិ​ករ​នៅ​ថ្នាក់ជាតិ និង​ថ្នាក់ក្រោម​ជាតិ អង្គការ​សង្គម​ស៊ីវិល វិស័យ​ឯកជន ប្រព័ន្ធ​ផ្សព្វផ្សាយ និង​អ្នកពាក់ព័ន្ធ​ទាំងអស់ ក្នុងការ​អនុវត្ត​ការងារ​បង្ការ​ទប់ស្កាត់ ឆ្លើយតប និង​ដោះស្រាយ​អំពើហិង្សា​លើ​ស្ត្រី និង​ក្មេងស្រី ឱ្យ​កាន់​តែមាន​ប្រសិទ្ធភាព និង​ប្រសិទ្ធ​ផល​ខ្ពស់​។​

​កាលពី​ថ្ងៃទី​២០ ខែមករា សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ បាន​ប្រាប់​ប្រព័ន្ធ​ផ្សព្វផ្សាយ​ថា កម្ពុជា​នឹង​ស្នើសុំ​ជំនួយ​វ៉ាក់សាំង​កូ​វីត​១៩​បន្ថែម ពី​ប្រទេស​រុស្ស៊ី បន្ទាប់ពី​កម្ពុជា បានស្នើ​រួចរាល់​ហើយ ទៅកាន់​រដ្ឋាភិបាល​ឥណ្ឌា តាមរយៈ​ឯកអគ្គរដ្ឋទូត ប្រចាំ​កម្ពុជា​។ គិត​មក​ត្រឹម​ថ្ងៃទី​២០ ខែមករា កម្ពុជា​ទទួលបាន​ការ​សន្យា​ផ្តល់ជំនួយ​វ៉ាក់សាំង​កូ​វីត​១៩ ពី​ប្រទេស​ចិន​ចំនួន ១​លាន​ដូ​ស និង​ថវិកា​សប្បុរជន ចូល​តាមរយៈ​សម្តេច​តេ​ជោ នាយករដ្ឋមន្ត្រី ជាង ៥៧ លាន​ដុល្លារ​សហរដ្ឋអាមេរិក បូក​បន្ថែមនឹង​ថវិកា​រាជរដ្ឋាភិបាល បាន​ត្រៀម​បម្រុង​ពី ១០០ ទៅ ២០០​លាន​ដុល្លារ​ទៀត រួមទាំង​ជំនួយ​ពី​ប្រទេស​ជា​មិត្ត​របស់​កម្ពុជា សម្រាប់​បញ្ជា​ទិញ​វ៉ាក់សាំង​កូ​វីត​១៩ ដើម្បី​ចាក់​ជូន​ប្រជាពលរដ្ឋ​កម្ពុជា ដោយ​ឥតគិតថ្លៃ និង​តាម​គោលការណ៍​ស្ម័គ្រចិត្ត​។​

​របាយការណ៍​ពី​បេឡា​ជាតិ​សន្តិសុខ​សង្គម (​ប​.​ស​.​ស​.) នៃ​ក្រសួង​ការងារ និង​បណ្ដុះបណ្តាល​វិជ្ជាជីវៈ ប្រចាំឆ្នាំ​២០២០ បានបង្ហាញ​នៅក្នុង​សប្តាហ៍​នេះ​ថា បើទោះបី​ស្ថានភាព​កូ​វីដ ធ្វើឱ្យ​ពិភពលោក បានបង្ហាញ​ពី​ឱនភាព​សេដ្ឋកិច្ច យ៉ាងណាក៏ដោយ ក៏​មិនទាន់មាន​ផលប៉ះពាល់​ដល់​ដំណើរការ​ផ្ដល់ប្រាក់​ឧបត្ថម្ភ​ដល់​កម្មករនិយោជិត នៅ​កម្ពុជា​នៅឡើយ​ទេ​។ ក្នុងនោះ នៅ​ឆ្នាំ​២០២០ កន្លងមក មានកម្ម​ការិនី​សម្រាលកូន ជា​សមាជិក​ប​.​ស​.​ស​. កើនឡើង​ជាង​ឆ្នាំ​២០១៩ ខណៈ​ស្ត្រី​កម្មការិនី​សម្រាល​បានកូន​ភ្លោះ ៣ មាន​ចំនួន ១៣​នាក់​។​

​ក្រសួង​ការងារ និង​បណ្ដុះបណ្ដាល​វិជ្ជាជីវៈ បានចេញ​សេចក្ដីជូនដំណឹង ដល់​ម្ចាស់​រោងចក្រ​ក្រុមហ៊ុន សហគ្រាស​ទាំងអស់ ត្រូវ​រៀបចំ​បើកប្រាក់​អតីតភាព​ឡើងវិញ បន្ទាប់ពី​អាក់ខាន ដោយសារ​វិបត្តិ​កូ​វីត​១៩ នាពេល​កន្លងមក​។​

​កាលពី​ព្រឹក​ថ្ងៃទី​២២ ខែមករា សម្តេច​តេ​ជោ នាយករដ្ឋមន្ត្រី ហ៊ុន សែន បាន​អញ្ជើញ​ជា​អធិបតី សម្ពោធ​ដាក់អោយ​ប្រើប្រាស់​ជា​ផ្លូវការ​នូវ​អគារ​ទីស្ដីការក្រសួង​សាធារណការ និង​ដឹកជញ្ជូន ថ្មី និង​វិទ្យាស្ថាន​តេ​ជោ សាធារណការ និង​ដឹកជញ្ជូន ដែលមាន​ទីតាំងនៅ​ផ្លូវ​លេខ​៥៩៨ ហៅ​ផ្លូវ ជា សុផារ៉ា​។ អគារ​ទីស្ដីការក្រសួង​សាធារណការ​ថ្មី​នេះ ត្រូវបាន​ផ្លាស់ប្តូរ មកពី​ទីតាំង​ចាស់ នៅ​សង្កាត់​វត្តភ្នំ ខណ្ឌដូនពេញ​។ អគារ​ថ្មី​នេះ ចំណាយពេល​សាងសង់​ប្រមាណ​ជិត ១​ឆ្នាំ ដោយ​ចាប់ផ្តើម​បុកគ្រឹះ​សាងសង់ កាលពី​អំឡុង​ខែឧសភា ឆ្នាំ​២០១៩ និង​បញ្ចប់​ការសាងសង់ កាលពី​ចុងឆ្នាំ​២០២០ កន្លងទៅ​។​

​សម្ដេច​តេ​ជោ ហ៊ុន សែន បានបញ្ជាក់​ជាថ្មី​ម្ដងទៀត ជុំវិញ​ការវិវត្ត​ថ្មីៗ​នៃ​វ៉ាក់សាំង​ប្រឆាំង​ជំងឺ​កូ​វីដ​១៩ ដែល​អាច​នឹងត្រូវ​ចាក់​ជូន​ប្រជាពលរដ្ឋ​កម្ពុជា នៅមុន​ពិធីបុណ្យ​ចូលឆ្នាំថ្មី ប្រពៃណីជាតិ​។ សម្ដេចនាយក​រដ្ឋមន្ត្រី បាន​បញ្ជាក់ថា កម្ពុជា​នឹង​ពិចារណា​បញ្ជា​ទិញ​វ៉ាក់សាំង​កូ​វីដ​១៩ បន្ថែម​ពី​ចិន ពី​កូរ៉េខាងត្បូង និង​ពី​អង់គ្លេស​។ នៅពេល ដែល​វ៉ាក់សាំង​របស់​ចិន ដែលជា​ជំនួយឥតសំណង មកដល់​កម្ពុជា នៅ​ខែកុម្ភៈ សម្ដេច​តេ​ជោ ហ៊ុន សែន នឹង​ទៅ​ទទួល​នៅ​ព្រលានយន្តហោះ ហើយ​សម្តេច ជា​មនុស្ស​ទីមួយ ដែល​នឹងត្រូវ​ចាក់​វ៉ាក់សាំង​មុនគេ នៅ​មន្ទីរពេទ្យ​កាល់​ម៉ែត្រ​។

​មាន​កុមារ​កម្ពុជា ចំនួន ៨៧ នាក់ បានជា​សះស្បើយ​ពី​ជំងឺ​បេះដូង​ចំហ បន្ទាប់ពី​បានធ្វើ​ការវះកាត់ និង​ព្យាបាល​នៅ​ប្រទេស​ចិន កាលពី​ឆ្នាំ​២០១៨ និង​ឆ្នាំ​២០១៩​។ នេះ​បើ​យោងតាម​របាយការណ៍ ដែល​បានបង្ហាញ​ក្នុង​កម្មវិធី​ផ្សព្វផ្សាយ​ចែករំលែក​បទពិសោធន៍​ការជួយ​កុមារ​កម្ពុជា ដែល​បាន​បញ្ជូនទៅ​វះកាត់ និង​ព្យាបាល​ជំងឺ​បេះដូង​ចំហ នៅ​ប្រទេស​ចិន ដែល​បាន​ធ្វើឡើង កាលពី​ថ្ងៃទី​២២ ខែមករា ឆ្នាំ​២០២១ ក្រោម​អធិបតីភាព​លោក ទេព ង​ន អនុប្រធាន​ទ​ព្រឹទ្ធសភា​។

​និយាយ​ពី​កូ​វីដ​១៩ នៅក្នុង​សប្តាហ៍​នេះ គិត​ចាប់ពី​ថ្ងៃអាទិត្យ ទី​១៧ ខែមករា ឆ្នាំ​២០២១ រហូតដល់​ថ្ងៃទី​២៣ ខែមករា ឆ្នាំ​២០២១ នៅ​ទូទាំងប្រទេស​កម្ពុជា មាន​អ្នក​ឆ្លង​កូ​វីដ​១៩ សរុប​ចំនួន ១៧​នាក់ និង​ជាសះស្បើយ ១៨​នាក់​។ ក្នុងនោះ មាន​ពលករ​ខ្មែរ មកពី​ថៃ រកឃើញ​ឆ្លង​កូ​វីដ​១៩ ក្នុង​សប្តាហ៍​នេះ មាន​ចំនួន ១២​នាក់ និង​បានជា​សះស្បើយ ចំនួន ១៨​នាក់​។​

​គិត​ត្រឹម​ម៉ោង ៧​ព្រឹក​ថ្ងៃទី​២៣ ខែមករា ឆ្នាំ​២០២១ នៅ​ទូទាំងប្រទេស មាន​អ្នក​ឆ្លង​ជំងឺ​កូ​វីដ​១៩ សរុប​ចំនួន ៤៥៦​នាក់​។ រីឯ​អ្នកជា​សះស្បើយ មាន​ចំនួន ៤០៣​នាក់​។ ចំណែក​អ្នក​កំពុង​សម្រាក​ព្យាបាល មាន​ចំនួន ៥៣​នាក់​។

​ក្នុងនោះ ពលករ​មកពី​ថៃ បាន​រកឃើញ​ឆ្លង​កូ​វីដ​១៩ សរុប​ចំនួន ៨១​នាក់ និង​ជាសះស្បើយ ៣៩​នាក់​។ នេះ​បើ​គិត​ត្រឹម​ម៉ោង ៧​ព្រឹក ថ្ងៃ​សៅរ៍ ទី​២៣ ខែមករា ឆ្នាំ​២០២១៕​

ទីតាំងផ្សាយពាណិជ្ជកម្ម

- Advertisment -

Most Popular