Home ព័ត៌មានអន្តរជាតិ សំរាប់​ជនជាតិ...

សំរាប់​ជនជាតិ​ចិន​៣០០​លាន​នាក់ ការធ្វើដំណើរ​ទៅ​ជួបជុំ​គ្រួសារ​នា​ឱកាស​បុណ្យចូលឆ្នាំ​ចិន​មិនជា​ជំរើស​ល្អ​ទេ​

​ប្រែ​សម្រួល : កញ្ញា​ដា​លី​ស ៖ ជា​លើកដំបូង​ចាប់តាំងពី​គាត់​បាន​ចាប់ផ្តើម​ធ្វើការ​នៅ​ទីក្រុង​ប៉េកាំង​កាលពី ៣ ឆ្នាំមុន លោក លូ អ៊ី អាយុ ២១​ឆ្នាំ​នឹង​មិន​ត្រឡប់​ទៅ​ស្រុកកំណើត​នៅ​ខេត្ត​ហ៊ូ​ណាន​នាឱកាស​​បុណ្យ​ចូល​ឆ្នាំ​ចិន​ទេ​។​

​ដូច​មនុស្ស​ប្រមាណ​៣០០​លាន​នាក់​ទៀត​ដែរ​នៅ​ទូទាំង​ប្រទេស​ចិន ផែនការ​ធ្វើ​ដំណើរ​របស់​ជំនួយ​ការហាង​សាឡន​រូប​នេះ​ត្រូវ​លុបចោល​ដោយសារ​ការ​កើត​មាន​ឡើង​វិញ​នៃ​វីរុស​កូរ៉ូ​ណាក្នុង​ប្រទេស​នៅ​​រដូវរងា​នេះ ដោយ​នាំ​ឱ្យ​មាន​ការ​រឹតត្បិត​ការធ្វើដំណើរ​ក្នុងស្រុក​យ៉ាង​តឹងរ៉ឹង​និង​សូម្បី​តែ​ក្រុមហ៊ុន​នានា​ក៏​ផ្តល់​រង្វាន់​លើកទឹកចិត្ត​ដល់​និយោជិត​ឱ្យ​ធ្វើការ​នៅ​ថ្ងៃ​ឈប់សម្រាក​នា​អំឡុងពេល​ចូល​ឆ្នាំ​ចិន​​នេះដែរ​។​

​ករណី​ផ្ទុះ​កូវី​ដ​ថ្មីៗ​ភាគច្រើន​ត្រូវបាន​រកឃើញ​នៅ​ខេត្ត​ភាគ​ខាងជើង​មួយចំនួន​។ តែ​ទោះ​យ៉ាងណា អាជ្ញាធរ​សុខាភិបាល​ព្រួយបារម្ភ​ថា​ការធ្វើដំណើរ​ក្នុង​ឱកាស​បុណ្យ​និទាឃ​រដូវ​នេះ​អាច​នាំឱ្យ​មាន​ការ​​រីក​រាលដាល​វីរុស​កូរ៉ូណា​ដែល​មិន​ត្រួតត្រា​បានពា​ស​ពេញ​ប្រទេស​ខណៈ​មនុស្ស​រាប់រយ​លាន​នាក់​វិលត្រឡប់​ទៅ​ស្រុកកំណើត​វិញ​សម្រាប់​អ្វី​ដែល​គេ​ចាត់ទុកថា​ជា​ថ្ងៃ​ឈប់សម្រាក​សំខាន់​បំផុត​នៅក្នុង​ប្រក្រ​​តិ​ទិន​ចិន ដែល​ការផ្តោត​សំខាន់​ខ្លាំង​បំផុត​គឺ​ទៅលើ​ការជួបជុំ​គ្រួសារ​។​

​គណៈកម្មការ​សុខភាព​ជាតិ​កាលពី​ថ្ងៃអាទិត្យ​ទី​២៤ មករា​បាន​រាយការណ៍​ករណី​ឆ្លងកូវី​ដ​ថ្មី​ចំនួន​៨០ ករណី​ដែល​នាំឱ្យ​ករណី​កូវី​ដ​១៩​សកម្ម​សរុប​មាន​ចំនួន ១.៨០០ នាក់​។​ចិន​ក៏​រាយការណ៍​ករណី​ឆ្លងកូវី​ដ​១៩​គ្មាន​រោគសញ្ញា​សរុប​ចំនួន ៩២ ករណី​ដាច់ដោយឡែក​ផងដែរ​។​

​រដូវ​ធ្វើដំណើរ​ខ្ពស់បំផុត ដែល​គេ​ស្គាល់​ថា “​ជុន​យុន​” នឹង​ចាប់ផ្តើម​ពី​ថ្ងៃទី ២៨ ខែ​មករា​រហូតដល់​ថ្ងៃទី ៨ ខែ​មីនា​។​នៅក្នុង​អ្វីដែល​គេ​ហៅថា​ការធ្វើ​ចំណាកស្រុក​របស់​មនុស្ស​ប្រចាំឆ្នាំ​ធំ​បំផុត​នៅលើ​ពិភព​​លោក ប្រជាជន​ចិន​រាប់រយ​លាន​នាក់​ធ្វើ​ដំណើរ​ទៅ​ស្រុកកំណើត​ក្នុងអំឡុង​បុណ្យចូលឆ្នាំ​ឬ​មិនចឹង​ធ្វើ​ដំណើរ​វិស្សមកាល​នៅប​រទេស​និង​បន្ទាប់​មក​វិល​ចូល​មក​កន្លែង​ដើម​វិញ​ក្នុង​ចំនួន​ដដែល​។​

​ក្រុមមន្ត្រី​ដឹកជញ្ជូន​បាន​ព្យាករណ៍​រួច​ហើយ​អំពី​ការថយចុះ​ចំនួន​អ្នកដំណើរ ៤០ ភាគរយ​ក្នុង​រយៈពេល​ដូចគ្នា​ធៀប​ពី​ឆ្នាំ​២០១៩ ដែល​ស្មើនឹង​អ្នកដំណើរ​ប្រហែល ៤០៧ លាន​នាក់​៕

​ប្រជាជន​ចិន ៣០០ លាន​នាក់​នឹង​មិន​ធ្វើ​ដំណើរ​ទៅ​ស្រុក​ដើម្បី​ជួបជុំ​គ្រួសារ​អំឡុង​ចូល​ឆ្នាំ​ថ្មី​ទេ ដោយសារ​ការ​រឹតបន្តឹង​ការធ្វើដំណើរ​ទប់ស្កាត់​កូវី​ដ

ទីតាំងផ្សាយពាណិជ្ជកម្ម

- Advertisment -

Most Popular