សាម​ម៉ូ ហុង​បង្ហាញខ្លួន​ក្នុង​វីដេអូ​ដើម្បី​ឱ្យ​អ្នកគាំទ្រ​អស់​កង្វល់​អំពី​សុខភាព​របស់​គាត់​

​ប្រែ​សម្រួល : កញ្ញា​ដា​លី​ស ៖ តារា​ជើងចាស់​ហុងកុង​លោក សាម​ម៉ូ ហុង​(​អា​ម៉ាប់​) បាន​បង្ក​ឱ្យ​មាន​ការព្រួយបារម្ភ​អំពី​សុខភាព​ជាមួយនឹង​ការបង្ហាញ​ខ្លួន​ទ្រុឌទ្រោម​ជា​សាធារណៈ​ក្នុង​ប៉ុន្មាន​ឆ្នាំ​ចុងក្រោយ​​នេះ ប៉ុន្តែ​ការ​បង្ហាញខ្លួន​ថ្មីៗ​នេះ​ទំនងជា​ចង់​ធានា​ដល់​អ្នកគាំទ្រ​ឱ្យ​ជឿជាក់ថា​គាត់​មាន​សុខភាព​ល្អ​។​

​កាលពី​ថ្ងៃអាទិត្យ (១៧ មករា​) គាត់​បាន​លេចមុខ​នៅក្នុង​វីដេអូ​មួយ ដែល​បង្ហោះ​លើ​គណនី​បណ្តាញ​សង្គម​របស់​កូនប្រុស​គាត់​ឈ្មោះ ធី​មមី ហុង ដោយ​លើក​ទឹកចិត្ត​ដល់​ប្រជាជន​នៅ​ខេត្ត​ហឺ​ប៉ី​របស់​ចិន ដែល​ថ្មីៗ​នេះ​បាន​រងគ្រោះ​ដោយ​ការ​រើប​ឡើងវិញ​នូវ​ជំងឺ​កូវី​ដ​១៩​។​

​នៅក្នុង​វីដេអូ​នោះ លោក​សាម​ម៉ូ ហុង​និយាយ​ជា​ភាសា​ចិន​កុក​ងឺ​ថា “​សួស្តី​បងប្អូន​ជនរួមជាតិ​ពី​ខេត្ត​ហឺ​ប៉ី ខ្ញុំ​សាម​ម៉ូ ហុង​។ ជំងឺ​រាតត្បាត​បានធ្វើឱ្យ​យើង​ឃ្លាតឆ្ងាយ​ពី​គ្នា​ក៏​ពិតមែន​ប៉ុន្តែ​ចិត្ត​របស់​យើង​​នៅ​រួមគ្នា​តែ​មួយ​ដដែល​។ ចូរ​រួបរួមគ្នា​ប្រយុទ្ធប្រឆាំង​នឹង​ជំងឺ​រាតត្បាត​។ ខ្ញុំ​នៅ​ជាមួយ​អ្នក​ទាំងអស់​គ្នា​ខណៈ​យើង​ប្រឈម​មុខ​នឹង​ជំងឺ​រាតត្បាត​ជាមួយគ្នា​។ ហឺ​ប៉ី​រឹងប៉ឹង​ឡើង ចិន​រ៉ឹង​ប៉ឹង​ឡើង​”​។​

​លោក​ហុង ដែល​ទើប​ឈាន​ចូល​អាយុ ៦៩ ឆ្នាំ​កាលពីដើម​ខែ​មករា មើល​ទៅ​មាន​ស្មារតី​ល្អ​នៅក្នុង​វីដេអូ ហើយ​គាត់​និយាយ​មួយ​ភ្លែត​មែន​ប៉ុន្តែ​និយាយ​ដោយ​សំឡេង​រ៉ឹង​ប៉ឹង​៕

​លោក​សាម​ម៉ូ ហុង ហៅអាម៉ាប់

ទីតាំងផ្សាយពាណិជ្ជកម្ម

- Advertisment -

Most Popular