អាជ្ញាធរ​ស្រុក​បូ​ទុម​សាគរ កំពុង​សម្របសម្រួល ការចង់បាន​ផ្លូវ​របស់ ពលរដ្ឋ​ភូមិ​ឃុំ​ថ្ម​ស


​ដោយៈ សុ​ផានី​តា / កោះកុងៈ រដ្ឋបាល​ស្រុក​បូ​ទុម​សាគរ កំពុង​ពិនិត្យ​លើ​ស្ថានភាព​ជាក់ស្តែង លើ​ទីតាំង​ស្នើសុំ​ធ្វើ​ផ្លូវ​មួយ​ខ្សែ របស់​ប្រជាពលរដ្ឋ រស់នៅ​ក្នុងភូមិ​ចម្ការ​លើ ឃុំ​ថ្ម បន្ទាប់ពី​ពួកគេ ស្នើសុំ​កន្លងទៅ ពុំទាន់​មាន​លទ្ធផល​។ លោក សាង ស៊ី​ណេ​ត អភិបាលរង​ស្រុក​បូ​ទុម​សាគរ ដែល​ដឹកនាំ​មេភូមិ សមាជិក​ក្រុមប្រឹក្សាឃុំ​ថ្ម​ស មន្ត្រី​ការិយាល័យ​បរិស្ថាន និង​មន្ត្រី​ការិយាល័យ​រ៉ែ ថាមពល ពិនិត្យមើល​ស្ថានភាព​ជាក់ស្តែង ចំណុច​ព្រែក​គល់ តប​តាម​សេចក្តី​ចង់បាន របស់​ពលរដ្ឋ អំពី​ផ្លូវ​ធ្វើដំណើរ​។​

​លោក ស៊ី​ណេ​ត តំណាង​លោក ហាក់ ឡេង អភិបាលស្រុក បានឱ្យដឹង​កាលពី​ថ្មីៗ​នេះ​ថាៈ លោក​មិន​ជំទាស់​ពីអ្វី ដែលជា​បំណង​ចង់បាន ប្រព័ន្ធ​គមនាគមន៍ ធ្វើដំណើរ​ទៅមក របស់​ពលរដ្ឋ​ទេ ព្រោះ​អាជ្ញាធរ យកចិត្ត ទុកដាក់​ខ្ពស់ ការអភិវឌ្ឍ​មូលដ្ឋាន ក្នុងន័យ​កាត់បន្ថយ​ភាពក្រីក្រ ព្រមទាំង​ជួយ​លើកកម្ពស់​ជីវភាព របស់​ប្រជាពលរដ្ឋ នៅពេល​មាន​តម្រូវការ​ចាំបាច់ ប្រើប្រាស់ ទៅ​ថ្ងៃមុខ​។

​លោក បាន​បន្ថែមថាៈ ប៉ុន្តែ​ទោះ​បែបនេះ​ក្តី ក៏​លោក​នឹង​បន្ត​សុំ​គោលការណ៍​បន្ថែម ពី​រដ្ឋបាលខេត្ត ជាមុនសិន ព្រោះ​ខ្លាច​មាន​ផលប៉ះពាល់ ណាមួយ កើតមាន ដ្បិត​វា​ជា​តម្រូវ​ការចាំបាច់ របស់​ប្រជាពលរដ្ឋ​។

​យោងតាម​សំណើ​របស់លោក អ៊ាង អាង មេភូមិ​ចម្ការលើ និង​លោក អិ​ក គួ​ន មេឃុំ​ថ្ម​ស ដាក់​មក​រដ្ឋបាល​ស្រុក គឺ​សុំ​កសាង​ផ្លូវ​ទទឹង ៨ ម៉ែត្រ បណ្តោយ ៧០០ ម៉ែត្រ សម្រាប់​ការប្រើប្រាស់ ជា​សាធារណៈ​ទូទៅ ដែល​ចង់បាន​នេះ ជា​យូរ​ខែ​ឆ្នាំ​មកហើយ​។​

​អ្នកស្រី សៀម រី និង​លោក ច្រឹង សា​រ៉ែ​ន តំណាង​ពលរដ្ឋ ជិត ៩០ នាក់ រស់នៅ​ភូមិ​ចម្ការលើ ឃុំ​ថ្ម​ស បានលើកឡើង​ថាៈ មូលហេតុ ដែល​ពួកគាត់ មានបំណង​ចង់បាន​ផ្លូវ ១ ខ្សែ ប្រវែង ៧០០ គីឡូម៉ែត្រ​នេះ ព្រោះ​វា​បង្កលក្ខណៈ កាន់តែ​ងាយស្រួល ដឹក​ជ​ញ្ចូ​ន​ផល​កសិកម្ម និង​ចុះ​នេសាទ​សមុទ្រ ស្ទើរ​គ្រប់​រដូវ​កាល​។​

​ពលរដ្ឋ បាន​បន្តថាៈ ជាង ៥ ខែ​មកហើយ ដែល​ពួកគាត់ សុំ​ដល់​អាជ្ញាធរ​ភូមិ ឃុំ និង​ស្រុក ជួយ​កសាង​ផ្លូវលំ ១​ខ្សែ​នេះ តែ​ពុំទាន់​មាន​ដំណោះស្រាយ ពិតប្រាកដ ទើប​ពលរដ្ឋ ស្នើសុំ​ជាថ្មី​ម្តង ដោយ​បច្ចុប្បន្ន អាស្រ័យ​ការធ្វើដំណើរ នៅ​ដី​ដែល​ត្រួសត្រាយ របស់​ឯកជន ទៅ​ថ្ងៃមុខ បើ​បិទ​លែងអោយ​ឆ្លងកាត់​ច្បាស់​ជា​លំបាក​។​

​ដើម្បី​ទទួលបាន​ផ្លូវ ពិតប្រាកដ​រួមគ្នា ពលរដ្ឋ​ក៏​សុំ​ចិត្ត​បរិច្ចាគ​ក្បាលដី របស់ខ្លួន ម្នាក់ៗ ជូន​អាជ្ញាធរ ក្នុងការ​សម្រួល​ដល់ ការស្ថាបនា​ផងដែរ ករណី​អាជ្ញាធរ ពុំមាន​ថវិកា​អភិវឌ្ឍន៍​។ ក្រុម​ពលរដ្ឋ បង្ហាញ​ក្តី​រំពឹងថា នៅពេល​មាន​ផ្លូវ​ហើយ គឺ​មុខរបរ​ចិញ្ចឹមជីវិត មានតែ​ធ្វើស្រែ​ចម្ការ និង​នេសាទ​នេះ នឹង​ទទួល​ជីវភាព​រស់នៅ ប្រសើរ​ក្នុង​គ្រួសារ ក្នុង​សហគមន៍ បើ​គ្មាន​ផ្លូវ​ងាយស្រួល​ធ្វើដំណើរ​ទេ គឺ​ពួកគាត់​នឹង​បន្ត​ខ្វះខាត​ដដែល​៕/V​

ទីតាំងផ្សាយពាណិជ្ជកម្ម

- Advertisment -

Most Popular