Home ព័ត៌មានអន្តរជាតិ ថ្ងៃនេះ​ថៃ​មា...

ថ្ងៃនេះ​ថៃ​មាន​អ្នកស្លាប់​ដោយកូវី​ដ​១៩​ពីរ​នាក់ និង​១៨៧​នាក់​ឆ្លង​ថែម​

​ប្រែ​សម្រួលៈ​វាសនា​/​បាងកក​៖​រដ្ឋាភិបាល​ថៃ​នៅ​ថ្ងៃ​ចន្ទ​ទី​២៥​មករា​នេះ បាន​អះអាង​អំពី​ការរកឃើញ​អ្នក​ឆ្លង​វីរុស​កូរ៉ូណា​ថ្មី​ចំនួន​១៨៧​នាក់ និង​អ្នកជំងឺ​កូវី​ដ​១៩​ពីរ​នាក់​ទៀត​បាន​ស្លាប់​។​តួលេខ​ឆ្លង​និង​ស្លាប់​​ចុងក្រោយ​នេះ​ធ្វើអោយ​ថៃ​ឥឡូវ​មាន​អ្នក​ឆ្លង​វីរុស​កូរ៉ូណា​ឡើងដល់​១៣.៦៨៧​នាក់ និង​៧៥​នាក់​ស្លាប់​ដោយកូវី​ដ​១៩​។​

​ករណី​ឆ្លង​ថ្មី​១៨៧​ករណីនេះ រួមមាន​១១៦​ករណី​រក​ឃើញ​តាមរយៈ​ការ​ធ្វើតេស្តិ៍​សកម្ម ៦១​នាក់​ត្រូវបាន​រកឃើញ​នៅ​តាម​មន្ទីរពេទ្យ​និង​គ្លីនិច ហើយ​១០​នាក់​ជា​អ្នក​ទើប​ចូលមក​ពី​ក្រៅ​ប្រទេស​។​

​អ្នកនាំពាក្យ​រង​នៃ​មជ្ឈមណ្ឌល​គ្រប់គ្រង​ស្ថានភាព​កូវី​ដ​១៩​ថៃ បាន​និយាយថា អ្នក​ស្លាប់​ម្នាក់​ជា​បុរស​ជនជាតិ​អង់គ្លេស ដែល​បាន​មកដល់​ក្រុង​បាងកក​កាលពី​ថ្ងៃ​២៥​ធ្នូ និង​ត្រូវបាន​ពិនិត្យ​ឃើញកូ​វីដ​១៩​កាលពី​ថ្ងៃ​២៩​ធ្នូ​។​បុរស​នេះ​បាន​ស្លាប់​កាលពី​ថ្ងៃអាទិត្យ​។​

​អ្នក​ស្លាប់​ម្នាក់​ទៀត​ជា​ស្ត្រី​ថៃ​អាយុ​៥៦​ឆ្នាំ ដែល​បាន​ស្លាប់​កាលពី​ថ្ងៃ​ព្រហស្បតិ៍​នៅ​ខេត្ត​សាមុត សា​ខន តែ​ទើប​រាយការណ៍​នៅថ្ងៃនេះ​។​

​អ្នកនាំពាក្យ​បាន​បន្ថែមថា​ខេត្ត​សាមុត សា​ខន មាន​អ្នក​ឆ្លង​ថ្មី​ច្រើនជាងគេ គឺ​៣៥​នាក់ បន្ទាប់​មក​ក្រុង​បាងកក​២០​នាក់ ។​

​ថៃ​កាលពី​ថ្ងៃអាទិត្យ​បាន​រក​ឃើញ​អ្នក​ឆ្លង​វីរុស​កូរ៉ូណា​ថ្មី​ចំនួន​១៩៨​នាក់ ហើយ​អ្នកជំងឺ​កូវី​ដ​១៩​ម្នាក់​ក៏​បាន​ស្លាប់​ផងដែរ ។​ខេត្ត​សាមុត សា​ខន មាន​អ្នក​ឆ្លង​ថ្មី​ច្រើនជាងគេ គឺ​៧៦​នាក់ បន្ទាប់មក​​ក្រុង​បាងកក​២១​នាក់ និង​ខេត្ត​សាមុត ប្រា​កាន ១២​នាក់​៕

​មន្ត្រី​សុខាភិបាល យក​សំណាក​សំរាប់​ពិនិត្យ​រក​វីរុស​កូរ៉ូ​ណា​នៅ​ផ្សារ​មួយ​ក្នុង​ខេត្ត​សាមុត សា​ខន កន្លែង​ដែល​ការឆ្លង​ថ្មី​មាន​ច្រើន​ជាង​កន្លែង​ណាៗ​ទាំងអស់​នៅ​ថៃ​

 

ទីតាំងផ្សាយពាណិជ្ជកម្ម

- Advertisment -

Most Popular