Home ព័ត៌មានសំខាន់ៗ ចិន​និយាយថា វ...

ចិន​និយាយថា វត្តមាន​យោធា​អាម៉េរិក​នៅ​សមុទ្រ​ចិន​ខាងត្បូង មិនល្អ​សំរាប់​សន្តិភាព​ទេ​

​ប្រែ​សម្រួលៈ​វាសនា​/​ប៉េកាំង​៖ ក្រោយ​ពី​នាវា​ផ្ទុក​យន្តហោះ​អាម៉េរិក​មួយ​ធ្វើ​ដំណើរ​ចូល​សមុទ្រ​ចិន​ខាងត្បូង ក្រសួងការបរទេស​ចិន​កាលពី​ថ្ងៃ​ចន្ទ​ទី​២៥​មករា​នេះ​បាន​និយាយថា អាម៉េរិក​ច្រើនតែ​បញ្ជូន​នាវា​​និង​យន្តហោះ​ចូលមក​ផ្លូវទឹក​មាន​ជម្លោះ​នេះ​ដើម្បី​«​បង្ហាញ​សាច់ដុំ​របស់ខ្លួន​» តែ​វា​មិនល្អ​សំរាប់​សន្តិភាព​ទេ​។​

​ក្រុម​នាវា​ផ្ទុក​យន្តហោះ​អាម៉េរិក​មួយ​ដឹកនាំ​ដោយ​នាវា​ផ្ទុក​យន្តហោះ USS Theodore Roosevelt និង​នាវា​អម​ចំនួន​បី​កាលពី​ថ្ងៃ​សៅរ៍​បាន​ចូលមក​ក្នុង​ដែនទឹក​នេះ​ដើម្បី​អ្វី​ដែល​អាម៉េរិក​អះអាងថា​​ការជំរុញ​«​សេរីភាព​នាវាចរណ៍​របស់​សមុទ្រ​» ។​វា​បាន​កើតឡើង​តែ​ប៉ុន្មាន​ថ្ងៃ​បន្ទាប់ពី​ប្រធានាធិបតី​អាម៉េរិក​ថ្មី ចូ បៃ​ដិន ចូលកាន់​តំណែង​។​

​អ្នកនាំពាក្យ​ក្រសួងការបរទេស​ចិន លោក​ហ្សា​វ លី​ជាន បាន​ប្រាប់​អ្នកយកព័ត៌មាន​ថា « អាម៉េរិក​ច្រើនតែ​បញ្ជូន​នាវា​និង​យន្តហោះ​ចូលក្នុង​សមុទ្រ​ចិន​ខាងត្បូង​ដើម្បី​សម្ញែង​សាច់ដុំ​របស់ខ្លួន​។​វា​មិន​ជា​ទង្វើ​​ឆ្ពោះទៅ​រក​សន្តិភាព​និង​ស្ថិរភាព​នៅក្នុង​តំបន់​ទេ​»​។​

​ចិន​តែងតែ​ង​តវ៉ា​ប្រឆាំង​នឹង​ការបើក​នាវា​អាម៉េរិក​ចូល​ជិត​បណ្តា​កោះ​ដែល​ខ្លួន​កាន់កាប់​នៅ​សមុទ្រ​ចិន​ខាងត្បូង កន្លែង​ដែល​ប្រទេស​វៀតណាម ហ្វីលីពីន ម៉ាឡេស៊ី ព្រុយ​ណេ និង​កោះ​តៃវ៉ាន់ សុទ្ធតែ​អះ​​អាង​កម្មសិទ្ធិ​ត្រួត​លើ​ចិន​។​

​ក្រុម​នាវា​ផ្ទុក​យន្តហោះ​នេះ​បាន​បង្ហាញ​ខ្លួន​នៅ​សមុទ្រ​ចិន​ខាងត្បូង ចំ​ពេល​តៃវ៉ាន់​បាន​អះអាង​ថា យន្តហោះ​ចិន​ជាង​ដប់​គ្រឿង​បាន​ហោះចូល​ក្នុង​ដែនអាកាស​របស់ខ្លួន​ជាហេតុ​នាំ​អោយ​អាម៉េរិក​ចេញមក​​បង្ហាញ​ការគាំទ្រ​តៃវ៉ាន់​ភ្លាមៗ​។​

​រដ្ឋាភិបាល​អាម៉េរិក​ថ្មី​របស់​លោកបៃ​ដិន និយាយថា ការប្តេជ្ញា​ចិត្ត​របស់​អាម៉េរិក​ចំពោះ​តៃវ៉ាន់​«​រឹងមាំ​ដូច​ថ្ម​»​។​

​តែ​អ្នកនាំពាក្យ​ក្រសួងការបរទេស​ចិន​បានបញ្ជាក់​ថា តៃវ៉ាន់​ជា​ផ្នែក​មួយ​របស់​ចិន ហើយ​អាម៉េរិក​គួរតែ​គោរព​តាម​គោលការណ៍​«​ចិន​មួយ​»៕

​នាវា​ផ្ទុក​យន្តហោះ USS Theodore Roosevelt និង​នាវា​អម​បើក​ចូល​សមុទ្រ​ចិន​ខាងត្បូង​កាលពី​ថ្ងៃ​២៣​មករា​

ទីតាំងផ្សាយពាណិជ្ជកម្ម

- Advertisment -

Most Popular