Home ព័ត៌មានជាតិ នយោបាយ ​កម្ពុជា​-​ឥណ...

​កម្ពុជា​-​ឥណ្ឌា​ជម្រុញ​ឲ្យ​មាន​សន្ធិសញ្ញា​ពាណិជ្ជកម្ម​សេរី និង​អនុវត្ត​សន្ធិសញ្ញា​វិនិយោគ​ទ្វេភាគី

ដោយ​: មុនី​រ័ត្ន / ភ្នំពេញ​: កម្ពុជា និង​ឥណ្ឌា ជម្រុញ​ឲ្យ​មាន​សន្ធិសញ្ញា​ពាណិជ្ជកម្ម​សេរី ខណៈដែល​ភាគី​ទាំងពីរ​កំពុងតែធ្វើការ​សិក្សា និង​ជម្រុញ​ឲ្យ​អនុវត្ត​សន្ធិសញ្ញា​វិនិយោគ​ទ្វេភាគី​រវាង​ប្រទេស​ទាំងពីរ ដើម្បី​ជម្រុញ​ឲ្យ​ចំនួន​វិនិយោគទុន និង​ពាណិជ្ជកម្ម​រវាង​ប្រទេស​ទាំងពីរ​ឲ្យ​មាន​ភាព​កាន់តែ​រីកចំរើន​បន្ថែមទៀត​។ ការ​ជម្រុញ​នេះ​បាន​ធ្វើឡើង​នៅក្នុង​ជំនួប​ពិភាក្សា​រវាង​លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ ជាមួយ​លោកស្រី ដេ​វី​យ៉ា​នី ឧ​ត្តាំ ខូ​ប្រា​ហ្គោ​ដ ឯកអគ្គរដ្ឋទូត​ឥណ្ឌា​ប្រចាំ​នៅ​កម្ពុជា កាលពី​ព្រឹក​ថ្ងៃទី​២៥ ខែមករា ឆ្នាំ​២០២១ នៅ​ទីស្តីការ​ក្រសួងការបរទេស​។

​លោក​កុយ គួ​ង អ្នកនាំពាក្យ​ក្រសួងការបរទេស​មាន​ប្រសា​ស​ន៏​ឲ្យ​ដឹងថា នៅក្នុង​ជំនួប​ឯកអគ្គរដ្ឋទូត​ឥណ្ឌា​បាន​បញ្ជាក់ថា នឹង​ខិតខំ​ធ្វើយ៉ាងណា​ឲ្យ​ទំនាក់ទំនង​ការទូត​រវាង​ប្រទេស​ទាំងពីរ ដែលមាន​ស្រាប់​ឲ្យ​កាន់​តែមាន​កម្រិត​កាន់តែ​ខ្ព់ស់​ឡើង ប្រកបដោយ​ផ្លែ​ផ​ផ្កា​បន្ថែមទៀត ចាប់ពី​កិច្ចសហប្រតិបត្តិការ​ផ្នែក​សេដ្ឋកិច្ច វប្បធម៌ ពាណិជ្ជកម្ម វិស័យ​អប់រំ និង​យោធា​…​។

​អ្នកនាំពាក្យ​បន្តថា ភាគី​ទាំងពីរ​ក៏បាន​ពិភាក្សា​អំពី​កិច្ចសហប្រតិបត្តិការ​រ​វាង​ប្រទេស​ទាំងពីរ​ដែល​កន្លងមក​មា​នក​យន្តការ​ផ្នែក​ការទូត គឺមាន​គណៈកម្មការ​ចម្រុះ​ទ្វេភាគី ដែល​បាន​ជួបប្រជុំគ្នា​ចំនួន​ពីរដង​ហើយ​។ ដោយ​លើក​ទី​៣ កម្ពុជា​ធ្វើជា​ម្ចាស់ផ្ទះ​នៃ​កិច្ចប្រជុំ​គណៈកម្មការ​ចម្រុះ ក៏​ជម្រុញ​ឲ្យ​មាន​ទំនាក់ទំនង​រវាង​ប្រទេស​ទាំងពីរ​មាន​លក្ខណៈ​ស៊ីជម្រៅ បន្ថែម​ពីនេះ ក៏មាន​យន្តការ​ពិគ្រោះ​ពិភាក្សា​នៃ​ក្រសួងការបរទេស​ប្រទេស​ទាំងពីរ​ផងដែរ​។

​លោក​កុយ គួ​ង បន្តថា ទាក់ទង​កិច្ចសហប្រតិបត្តិការ​ផ្នែក​សេដ្ឋកិច្ច​រវាង​កម្ពុជា និង​ឥណ្ឌា កាលពី​ឆ្នាំ​២០១៨ គឺមាន​ទំហំ​ពាណិជ្ជកម្ម​ជាង ២០០​លាន​ដុល្លារ ដោយ​នៅពេលនោះ ឥណ្ឌា​បានផ្តល់​ប្រព័ន្ធ​អនុគ្រោះ​ផ្នែក​ពាណិជ្ជកម្ម គឺ​ទំហំ​ពាណិជ្ជកម្ម​មានការ​កើនឡើង​ពី ២០៥​លាន​ដុល្លារ (​ឆ្នាំ​២០១៨) រហូតដល់ ២៥៥​លាន​ដុល្លារ​នៅក្នុង​ឆ្នាំ​២០១៩​។ ប៉ុន្តែ​ប្រទេស​ទាំងពីរ​ក៏​ជម្រុញ​ឲ្យ​មាន​សន្ធិសញ្ញា​ពាណិជ្ជកម្ម​សេរី ដែល​ប្រទេស​ទាំងពីរ​កំពុងតែធ្វើកា​រ​សិក្សា និង​ជម្រុញ​ឲ្យ​អនុវត្ត​នៅ​សន្ធិសញ្ញា​វិនិយោគ​ទ្វេភាគី​រវាង​ប្រទេស​ទាំងពីរ ដើម្បី​ជម្រុញ​ឲ្យ​ចំនួន​វិនិយោគទុន និង​ពាណិជ្ជកម្ម​រវាង​ប្រទេស​ទាំងពីរ​ឲ្យ​មាន​ភាព​កាន់តែ​រីកចំរើន​បន្ថែមទៀត​។​

​ក្រៅពី​កិច្ចសហប្រតិបត្តិការ​ផ្នែក​សេដ្ឋកិច្ច ភាគី​ទាំងពីរ​ក៏បាន​ពិភាក្សា​ខាង​វិស័យ​កងទ័ព ដោយ​កន្លងមក​បាន​ផ្លាស់ប្តូរ​ទស្សនកិច្ច​គ្នា ហើយ​កន្លងមក​ភាគី​ឥណ្ឌា​បាន​គោរព​អញ្ជើញលោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ទៅ​បំពេញ​ទស្សនកិច្ច​នៅ​ឥណ្ឌា តែដោយសារ​បញ្ហា​កូ​វីដ​មានការ​អាក់ខាន ប៉ុន្តែ​កំពុង​ពិនិត្យ​លទ្ធភាព​ដែល​ត្រូវ​ទៅ​បំពេញ​ទស្សនកិច្ច​នៅពេល​ខាងមុខនេះ​។​

ទីតាំងផ្សាយពាណិជ្ជកម្ម

- Advertisment -

Most Popular