Home ព័ត៌មានជាតិ សន្តិសុខ ស្លាប់​ម្នាក់...

ស្លាប់​ម្នាក់ របួសធ្ងន់ ២​នាក់ ដោយសារ​រថយន្ត បុក​ម៉ូតូ ក្នុងទិសដៅ​ផ្ទុយគ្នា

ដោយៈ គ្រញូង /បាត់ដំបងៈ បុរស​ចំណាស់​ម្នាក់ របួសធ្ងន់​បាក់​ភ្លៅ ទាំង​២ ហើយ​បាន​ស្លាប់ នៅពេល​កំពុង​បញ្ជូនទៅ​មន្ទីរពេទ្យ និង ២ នាក់​ទៀត ជា​កូនប្រុស​ស្រី រងរបួស​ធ្ងន់ ដោយ​រថយន្ត ១​គ្រឿង បើកបរ​មិន​ប្រកាន់​ស្តាំ រេ​ចង្កូត​ទៅបុក​ម៉ូតូ ដែល​កំពុងបើក បញ្ច្រាសទិស​គ្នា មួយ​ទំហឹង​។ គ្រោះថ្នាក់​ចរាចរណ៍​នេះ បានកើត​ឡើង កាលពី​យប់ ថ្ងៃទី​២៥ ខែមករា ឆ្នាំ​២០២១ នៅ​ចំណុច​ផ្លូវបំបែក​ជា​៤ ត្រង់​រង្វង់​មូល​ត្រាក់ទ័រ​ចាស់ លើផ្លូវ​ជាតិ​លេខ​៥៩ ក្នុងភូមិ​អូរ​ស្ងាត់ ឃុំ​សន្តិភាព ស្រុក​សំពៅ​លូន​។​

​លោក​វរសេនីយ៍ឯក ពេជ្រ សា​រ៉ែ​ន អធិការនគរបាល ស្រុក​សំពៅ​លូន បាន​ឲ្យ​ដឹងថាៈ អ្នកស្លាប់ និង​អ្នករបួសធ្ងន់​២ នាក់ មានៈ ១.​ឈ្មោះ នុ​ច យិន ភេទ​ប្រុស អាយុ​៥៩​ឆ្នាំ (​ឪពុក​) អ្នកបើក​ម៉ូតូ បាន​ស្លាប់​នៅពេល​បញ្ជូនទៅ​មន្ទីរពេទ្យ ស្រុក​សំពៅ​លូន និង របួសធ្ងន់ ២​នាក់ ត្រូវជា​កូនៈ ១.​ឈ្មោះ ទិន ញូ​ង ភេទ​ប្រុស អាយុ​២៧​ឆ្នាំ និង​២.​ឈ្មោះ អាន ចាន់​រ៉ា ភេទ​ស្រី អាយុ​១៤​ឆ្នាំ​។ ទាំង​៣​នាក់ រស់នៅ​ភូមិ​អូរ​កាច់ ឃុំ​បឹងបេង ស្រុក​ម៉ាឡៃ ខេត្ត​បន្ទាយ​មា​ជ័យ​។ ចំណែក​តៃកុង រថយន្ត​បង្ក មានឈ្មោះ ស៊ួ ប៊ុន​រ័ត្ន ភេទ​ប្រុស អាយុ​៣៦​ឆ្នាំ រស់នៅ​ភូមិ -​ឃុំ​បារាំង​ធ្លាក់ ស្រុក​ភ្នំព្រឹក ខេត្តបាត់ដំបង​។​

​សាក្សី​ដែល​បានឃើញ​ហេតុការណ៍ បាន​ប្រាប់​ប៉ូលិស​ចរាចរណ៍​ស្រុក ដែល​ចុះទៅ​វាស់ វែង​ថាៈ មុនពេល​កើតហេតុ មាន​រថយន្ត​មួយគ្រឿង ម៉ាក​តូយ៉ូតា កាមរី (​គូទ​ហើម​) ស៊េរី​៩៥ ពណ៌​បៃតង ពាក់​ស្លាក់​លេខ បាត់ដំបង 2,A0178 បើកបរ​ពី​ទិសខាងកើត មក​ខាងលិច​។ ពេលមកដល់​ចំណុចកើតហេតុ រថយន្ត​នោះ បាន​រេ​ចង្កូត ទៅបុក​ជាមួយនឹង​ម៉ូតូ​មួយគ្រឿង ម៉ាក​ហុងដា ស៊េរី​២០១២ ពណ៌​ខ្មៅ ពាក់​ស្លាក​លេខ បាត់ដំបង 1P3956 ជិះ​ឌុប​គ្នា ចំនួន ៣​នាក់ ក្នុងទិសដៅ​ពី ខាងលិច ទៅខាង​កើត (​បញ្ច្រាសទិស​គ្នា​) បណ្ដាល​ឲ្យ​មនុស្ស​ម្នាក់ រងរបួស​ធ្ងន់ ដោយ​បាក់​ភ្លៅ ទាំងសងខាង ហើយ​ស្លាប់ នៅពេល​បញ្ជូនទៅ​មន្ទីរពេទ្យ​ស្រុក និង ២ នាក់​ទៀត រងរបួស​ធ្ងន់ ត្រូវបាន​បញ្ជូនទៅ​សង្គ្រោះ នៅ​មន្ទីរពេទ្យបង្អែក ស្រុក​សំពៅ​លូន ។​

​ចំណែក​មធ្យោបាយ ទាំង​២​គ្រឿង ត្រូវ​ប៉ូលិស​ការិយាល័យ​ចរាចរណ៍​ខេត្ត យកមក​រក្សាទុក នៅ​ស្នងការដ្ឋាន រង់ចាំ​ធ្វើការ​ដោះស្រាយ​ជា​ក្រោយ​៕/V-PC

រថយន្តបុក​ជាមួយ​ម៉ូតូ​ស្លាប់​ម្នាក់​និង​របួសធ្ងន់​ធ្ងន់​២​នាក់

រថយន្តបុក​ជាមួយ​ម៉ូតូ​ស្លាប់​ម្នាក់​និង​របួសធ្ងន់​ធ្ងន់​២​នាក់

ម៉ូតូ​ជនរងគ្រោះ​

រថយន្តបុក​ជាមួយ​ម៉ូតូ​ស្លាប់​ម្នាក់​និង​របួសធ្ងន់​ធ្ងន់​២​នាក់

រថយន្ត​បង្ក​ម៉ាក​កាមរីគូទ​ហើម

ទីតាំងផ្សាយពាណិជ្ជកម្ម

- Advertisment -

Most Popular